Den Bybel met groter neersticheyt ghecorrigeert (Liesveltbijbel 1542)

¶ Een gelijckenisse van eenen quaden meyer, ende hoe niemant twee Heren dienen mach, ende hemel ende aerde eer vergaen soude, dan een tittel van die woorden Gods, ooc van ouerspel, ende ooc vanden rijcken man, ende vanden armen Lazaro

Dat .xvi. Capittel

[afbeelding]

1

† MAer hi sprac tot sinen discipulen? Het was een rijc man, die eenen huyshouder hadde die wort voor hem gediffameert, als hadde hi hem sijn goet te quiste gebracht,

2

ende hi riep hem, ende seyde tot hem, wat hoore ic dat van v? doet rekenscap van uwer rentmeesterscap, want ghi en moecht voortaen niet meer mijn goeden regeren.

3

Ende doen sprac die rentmeester in hem seluen, wat sal ic doen? want mijn here neemt die officie van mi, Ic en can niet grauen, ic scame mi te bidden,

4

Ic weet wel wat ic doen sal, op dat als ic nv vander officie ghesedt werde, dat si mi in haren huysen ontfaen

5

Ende hi riep tot hem alle die sculdenaren sijns heren, ende seyde tot den eersten, hoe veel sidi mijnen here sculdich Hi seyde hondert vaten olyen,

6

Ende hi heeft hem geseyt Neemt v hantteeken, ende sidt ende scrijft terstont vijftich

7

Daer na seide hi tot den anderen, mer ghi hoe veel sidi

[p. *]

culdich? Hi seyde, Hondert maten terwen. Ende hi seyde tot hem, neemt v hantteeken, ende scrijft tachtentich,

8

Ende die here heeft gepresen den boosen rentmeester, dat hi wijselijcken gedaen hadde, Want die kinderen deser werelt, zijn wijser dan die kinderen des lichts in haer geslachten

9

Ende ic segge v ooc, Maect v vrienden met den ongherechtigen Mammon, op dat wanneer ghi nv behoeft si v ontfangen in die eewige wooninge. *

10

⁺† Wie inden cleynsten getrou is, die is ooc inden grootsten getrouwe, ende wie in dat cleynste ongerechtich is, die is ooc inden grooten ongerechtich.

+ C vers 10

11

Daerom ist dat ghi nv inden ongerechtigen Mammon niet trou en sijt geweest, wie wil v dat warachtige betrouwen,

12

ende ist dat ghi inden vreemden niet getrou geweest en sijt, wie wil v geuen dat v is?

13

Geen knecht en can twee Heren dienen, oft hi sal den eenen haten, ende den anderen lief hebben oft hi sal den eenen aenhangen, ende den anderen verachten Ghi en condt niet God ende Mammon tsamen dyenen.

14

Dat hoorden alle die Pharizeen, die waren gierich ende bespotten hem,

15

Ende seyde tot haer, ghi sijt die v seluen rechtueerdicht voor den menscen, mer God kent v herten, Want wat hooge geacht wert voor den menschen, dat is een afgrijselicheydt voor God *

16

Die wet ende Propheten propheteerden tot op Iohannem, ⁺ ende van dier tijt aen wert dat rijcke Gods door dat Euangelium gepreect, ende een yegelijc mensche dringet met gewelt daer in.

+ mat. v.b mar x.a.

17

Mer het is lichter dat hemel ende aerde vergae, dan dat een tittel vander wet valle

18

Wie hem sceit van sijnder huysurouwen, ende trout een ander, die doet ouerspel, ende wie die afgesceyden vanden man trout, die doet ouerspel.

[afbeelding]

19

⁺† Ende het was een rijc man, die cleede hem met purperen ende costelijcke lijnwaden, ende leefde alle dage leckerlic,

+ E vers 19

20

Ende daer was een brootbidder, genoemt Lazarus, die lach voor sijnder doren, vol sweeren,

21

ende begeerde hem te versaden vanden brocken die van des rijcken tafel vielen, doch so quamen die honden ende lecten hem zijn sweeren.

22

Het gesciede dat die brootbidder sterf, ende wert gedragen vanden engele in ^a Abrams scoot,

a Abrahams scoot, dat is dye ruste der heyligen ende der ghelouigen, dye si hebben op die belofte Goods van Cristo.

23

Die rijcke sterf ooc, ende wert in die helle begrauen

Als hi nv inder pinen was, sloech hi sijn oogen op ende sach Abraham van verre, ende Lazarum in sinen scoot,

24

riep hi, ende seyde, vader Abraham, ontfermt mijnder, ende seynt Lazarum, op dat hi dat wterste zijns vingers in dat water steke, ende vercoele mijn tonge, want ic lijde grote pijne in deser vlammen.

25

Mer Abraham seyde, gedenct sone dat ghi dat goet ontfangen hebt in uwen leuen, Ende Lazarus daer tegen quaet ontfangen, Mer nv wert hi getroost, ende ghi wert gepijnicht,

26

Ende bouen dat alle is tusscen ons ende v een groote versceydinge, also dat die gene die wouden van hier door gaen tot v, en connen niet, ⁺ noch ooc niet van daer tot ons hier comen.

+ G vers 26

27

Doen seyde hi, so bidde ic v vader, dat ghi hem seyn-det in mijns vaders huys,

28

want ic heb noch vijf broeders, dat hi hen getuyge, op dat si ooc niet en comen in dese plaetse der tormenten.

29

Abraham sprac tot hem. Si hebben Mosen ende die propheten, laetse die selue horen

30

Hi seyde, Neen vader Abraham, mer waert dat yemant vanden dooden tot hen ginghe, so sullen si penitencie doen.

31

Mer hi seyde tot hem, hooren si Moysen ende die propheten niet, so en souden si ooc niet gelouen, als yemant vanden dooden op stonde.