Den Bybel met groter neersticheyt ghecorrigeert (Liesveltbijbel 1542)

Vanden vasten ende tempteringe Cristi, ende van sijn leeringhen, ende predicatie, Ende hoe Iesus eenen beseten mensche verlost, ende ooc die swagerinde van sinte Peeter, ende veel ander siecten ghesont maecte,

Dat .iiij. Capittel

1

⁺IEsus vol vanden heyligen geest, weder vander Iordanen gecomen sijnde, ⁺ werdt vanden geest gedreuen in die woestijne xl. dagen,

+ A vers 1

+ mat, iiij,a mar. i,b,

2

ende wert vanden duuel ghetempteert, ende hi en adt niet in dien dagen, ende doen die een eynde hadden, hongerde hem.

3

Ende die duuel seyde tot hem. Sidi Gods sone, so segt tot desen steen dat hi broot worde.

4

Ende Iesus antwoorde ende sprac tot hem. ⁺ Daer staet gescreuen, dat die mensche niet alleen biden broode en leeft, mer van eenen yeghelijcken woorde Gods.

+ de. viij,a

5

Ende die duuel voerde hem op eenen hogen berch ende toonde hem alle die rijcken der werelt in eenen oogenblic, ende sprac tot hem.

6

Dese mogentheyt wil ic v al geuen, ende haer heerlicheyt, want si is mi ouergegeuen ende wien ic wil geue icse,

7

daerom ist dat ghy mi wilt aenbeden, so salt al v sijn.

8

⁺Iesus antwoorde hem ende seyde. ⁺ Gaet wech van mi ghi duuel, daer staet gescreuen Den HERE uwen God suldy aenbeden, ende hem alleen dienen.

+ B vers 8

+ deu. vi.b

9

Ende die duuel voerde hem tot Iesusalem, ende sette hem opter tinnen des tempels, ende seyde tot hem, Sidy Gods sone, so worpt v neder,

10

want daer staet gescreuen, ⁺ Sinen engelen sal hi beuelen van v, datse v bewaren,

+ psa, x c deu, vi,c

11

ende inden handen dragen, op dat ghi lichtelic uwen voet niet en stoot aenden steen,

12

Ende Ihesus antwoorde hem, ende seyde? Het is gescreuen, Ghi en sult niet tempteren den HERE uwen God,

13

Ende als die duuel alle temptatien volbracht hadde, so ginc hi van hem eenen tijt lanc

[afbeelding]

14

⁺† Ende Iesus is weder gekeert inder cracht des heyligen geests in Galilea, ende dat geruchte ginc wt ouer al dat rijcke van hem,

+ C vers 14

15

Ende hi leerde in haer scolen, ende hi wert gepresen van hen allen.

16

Ende hi quam tot Nazareth daer hi geuoet was, ende hi ginc na zijn ghewoonte opten Sabboth in de scole, ende hi stont op, ende wilde lezen

17

Ende hem wert gegeuen den boec esaias des propheten, ende doen hi omkeerde dat boec, vant hi die plaetse daer gescreuen staet. ⁺

+ esa, xli a

18

Den geest des HEREN op mi, om dat hi mi gesalft heeft, om te vercondigen dat Euangelium den armen, heeft hi mi gesonden, ende om te genesen die bedructe herten,

19

ende te preken den geuangenen verlossinge, ende den blinden dat gesichte, ende los te laten die ghequetste door verlatinge, ende te preken dat ontfanckelic iaer des HEREN.

20

Ende als hi den boec sloot, gaf hy hem den dienaer, ende ginc sitten, ende al die oogen die inder scolen waren, sagen op hem.

21

Ende hi begost tot haer te seghen. Heden is veruult die scriftuere in uwen ooren.

22

Ende si gauen alle getuygenisse van hem, ende verwonderden hen inden woorden van gracien die wt sinen monde gingen, * ⁺ ende seyden, Is dit niet Iosephs sone?

+ Io. iiij,f ende .vi,c, mot, xiij g mar. vi a

23

Ende hi seyde tot haer. Ghi sult vrylijc tot mi segghen, dit ghemeyn woort. Medecijn geneest v seluen.

⁺† Hoe veel grote dingen hebben wi gehoort die gheschiet sijn in Capernaum, doet ooc also hier in ws vaders lant.

+ D vers 23

24

Mer Iesus seyde. Voorwaer segghe ic v, Dat geen propheet aengenaem en is in zijn lant,

25

Ic segge v inder waerheyt, dat veel weduwen waren in Helias tijden des propheten in Israel, doen die hemelen waren gesloten drie iaren ende ses maenden, doen daer grooten honger was in alle die werelt,

26

ende tot geen van dien was Helias gesonden dan in Sarepta Sidonie, tot eender weduwen.

27

Ende vele lazers waren in Israel, inden tijden van Helizeo den propheet, ende geen van haer en wert gesuuert, dan alleen Naaman van Syrien.

28

⁺Ende alle sijnse veruult met toornicheit, die inder scolen waren, doen si dat hoorden,

+ E vers 28

29

ende si stonden op, ende stieten hem wter stadt, ende leyden hem opt hoochste van eenen berge, op welcken haer stadt was ghetimmert, op dat si hem daer af neder souden stooten,

30

Mer hy ginc midden door haer lieden wech. *

31

Ende hi quam tot Capernaum inder stadt Galilea, ende daer leerde hijse op die Sabbathen,

32

Ende si verwonderden haer van sijnre leeringen, want sijn woort was machtich. ⁺

+ mar, i,c,

33

Ende inder scholen was een mensce beseten met eenen onsuueren duuel, ende hi riep luyde

34

ende sprac Hout wat hebben wi met v te doen Iesu van Nazareth? sijt ghi gecomen om ons te verdoen? Want ic weet dat ghy sijt die heylige Gods.

35

Ende Iesus berispten, ende seyde. Wert stom, ende gaet wt van hem. Ende die duuel werp hem int middel onder haer, ende hi voer wt van hem, ende en lette hem niet.

36

Ende daer quam een vreese ouer haer allen ende spraken onderlinge, ende seyden, Wat dinc is dit? want met machte ende met crachte gebiet hi den onsuueren geesten ende si gaen wt,

37

Ende die fame van hem wert wtgebreyt in allen landen, daer ontrent liggende. ⁺

+ mar, i c,

38

⁺† Ende hi stont op wter scholen, ende ginc in Symons huys, ende Symons huysurouwen moeder was beuangen met een harde cortse, ende si baden hem voor haer.

+ F vers 38

39

Ende hi ginc tot haer, ende hi gheboot der cortsen, ende si liet haer, ende terstont stont si op, ende diende haerluyden.

40

Ende doen die sonne onder was, quamen alle, die menigerley crancken hadden, ende brachtense tot hem, ende hy leyde op eenen yegelijcken sijn hant, ende maectese ghesont,

41

Ende die duyuelen ghinghen wt velen, roepende ende seggende. Ghi sijt Christus die Gods sone, ende hi berisptese, ende en lietse niet spreken, Want si wisten wel dat hi Christus was.

42

Ende alst dach was ginc hi in een woeste plaetse, ende dat volc socht hem, ende quamen tot hem, ende wouden hem hou-

[p. *]

den, dat hi niet van haer gaen en soude, Totten welcken Iesus seyde.

43

Ic moet anderen steden preken dat Euangelium vanden rijcke Gods, Want daer toe ben ic gesonden.

44

Ende hi preecte in die scolen van Galilea. *