Den Bybel met groter neersticheyt ghecorrigeert (Liesveltbijbel 1542)

Vanden thien maechden, Vanden ponden, die sommighe grote ghewichten van ghelde sijn Vanden schapen, die ter rechterhant comen sullen, ende vanden bocken die in die verdoemenisse comen sullen

Dat .xxv. Capittel.

[afbeelding]

1

⁺† DAn sal dat ^a rijc der hemelen thien maechden gelijc worden, die haer lampen namen ende ghinghen wt den bruydegom te gemoete,

+ A vers 1

a Dat rijc der hemelen is hier dye vergaderinge der ghelouigher lu. xvij.e

2

Mer vijf van desen waren sot ende vijf waren wijs,

3

die sotte namen haer lampen, ende en hebben geen olye met haer genomen

4

Mer die wijse namen olye in haer vaten, met haer lampen.

5

Doen nv die bruydegom vertoefde, werden si alle slaperich ende sliepen,

6

Mer ter middernacht, so isser eenen roep geschiet, Siet, die bruydegom coemt, gaet wt hem te gemoete,

7

Doen stonden alle dese maechden op ende verchierden haer lampen,

8

Mer die sotte spraken totten wijsen, Geeft ons van uwe olye, want onse lampen worden wtgebluscht.

9

Doen antwoorden die wijse, ende spraken, Dat en sal niet sijn, op dat ons ende v niet en gebreke, mer gaet totten genen diese vercoopen, ende coopt voor v seluen.

10

Ende doen si ghingen om te coopen, doen quam dye bruydegom, ende die daer bereyt waren, sijn met hem in gegaen totter bruyloft, ende die dore wert ghesloten.

11

Ten laetsten quamen ooc die ander maechden, ende spraken, here Here doet ons op,

12

Mer hi antwoorde, ende sprack

13

Voorwaer segge ic v, ic en ken v niet. Daeromme soe waect, want ghi en weet noch den dach noch die vre, in welcke die sone des menscen comen sal. *

14

† Ghelijc als een mensche die een vreemt landt reysde, ende riep sijn knechten, ende dede haer sijn goet,

15

Den eenen gaf hi vijf pont, den anderen twee pont, ende den derden een pont, eenen yegelijcken nae sijn vermogen, ende is wech gereyst, ⁺

+ luc. xiij. luc. xix b Marci. xiij.b

16

Doen ginc die een die vijf pont ontfangen hadde, ende heeft daer mede also gewrocht ende heefter noch vijf ander pont toe gewonnen.

17

Desgelijc oock die twee pont ontfangen hadde, heeft twee ander daer toe gewonnen,

18

Mer die een pont ontfanghen hadde ginc wech, ende maecte een kuyle inder aerden, ende heeft sijns heeren gelt daer in gegrauen.

19

Ouer een lange tijt quam die here deser knechten, ende heeft rekeninge met hen gehouden,

20

Ende tot hem is ghecomen die knecht die vijf pont ontfangen hadde, ende heeft voor hem gebrocht noch ander vijf pont, ende sprac, Here ghi hebt mi vijf pont gedaen, Siet daer, ic hebbe daer mede ander vijf pont gewonnen,

21

Ende sijn here heeft tot hem gesproken, Ey du goede ende getrouwe knecht, ouer luttel soo hebdy getrouwe geweest, ic wil di ouer vele setten, gaet in tot die blijscap ws heeren,

22

Doen quam oock, die daer twee pont ontfangen hadde, ende sprac, Here ghy hebt mi twee pont gedaen Siet daer, ic hebbe metten seluen twee ander gewonnen,

23

Ende sijn here sprac tot hem Ey ghi goede ende ghetrouwe knecht, ghi hebt ouer luttel getrouwe geweest, ic wil di ouer vele setten, gaet in totter blijscap ws heeren

24

⁺Doen quam ooc die daer een pont ontfangen hadde ende sprac, Here ic wiste dat ghi een hart man sijt, ghy maeyt, daer ghi niet gesaeyt en hebt, ende vergadert dat ghi niet gestroeyt en hebt,

+ C vers 24

25

ende so vreesde ic v, ende ghinc henen, ende groef dat pont inder aerden, Ende siet, daer hebdi dat v is,

26

Sijn Here antwoorde, ende sprac tot hem, Du schalc ende traghe knecht, wist ghi dat ick maye, daer ic niet ghesaeyt en hebbe, ⁺ ende vergadere daer ic niet gestroeyt en hebbe,

+ Marci. xiij.b lu. xvi.a. ende .viij.

27

Daerom sout ghy mijn gelt totten wisselaren ghedraghen hebben, ende als ic gecomen ware, hadde ic dat mijne tot mi genomen met den woecker,

28

Daerom so neemt van hem dat pont, ende gheuet hem die thien pont heeft,

29

Want wie daer heeft, sal gegheuen worden, ende sal oueruloedich sijn Ende die niet en heeft, sal ooc van hem genomen worden, dat hi heeft,

30

Ende worpt den onnutten knecht in die wterste duysternisse, daer sal weeninge sijn, ende crijsselinge der tanden. *

[afbeelding]

31

† Maer als die sone des menscen comen sal in sijn heerlicheit, ende alle engelen met hem, dan sal hi sitten op den stoel sijnder heerlicheyt,

32

ende alle dat volc sal voor

[p. *]

hem vergadert worden, ende hi salse van malcanderen sceyden, gelijc als die herder die scapen vanden bocken sceydet,

33

ende hi sal die scapen tot sijnder rechter hant stellen, ende die bocken totter slincker hant,

34

Dan sal die Coninc seggen den genen die tot sijnder rechter hant sijn sullen, Comt hier ghi gebenedide mijns vaders besidt dat rijc, dat v bereyt is vanden beghinne der werelt,

35

Want ic ben hongerich geweest, ende ghi hebt mi gespijst, Ic ben dorstich geweest, ende ghi hebt mi te drincken gegeuen.

36

Ic ben een gast geweest, ende ghy hebt mi geherbercht, Ic ben naect geweest, ende ghi hebt mi gecleet,

37

Ic ben cranc geweest, ende ghi hebt mi besocht, ⁺ Ic ben geuangen gheweest, ende ghi sijt tot mi gecomen.

+ D vers 37

38

Dan sullen hem die rechtuaerdige antwoorden, ende seggen, HERE, wanneer hebben wi v ghesien hongerich, ende hebben v gespijst? oft dorstich, ende hebben v drincken gegeuen?

39

ende gast gesien, ende geherbercht, oft naect, ende v gecleet?

40

oft wanneer hebben wi v ghesien cranc oft geuangen, ende sijn tot v gecomen?

41

Ende die coninc sal antwoorden ende haer seggen, Voorwaer ic segge v, wat ghi van desen mijnen alder minsten broederen gedaen hebt, dat hebt ghi mi gedaen.

42

Dan sal hi ooc seggen totten genen die tot sijnder slincker hant zijn sullen, Gaet wech van mi ghi vermaledide, in dat eewige vier, dat bereyt is den duuel ende sijn engelen,

43

Ic ben hongerich geweest, ende ghi en hebt mi niet gespijst, Ic ben dorstich geweest, ⁺ ende ghi en hebt mi niet te drincken gegeuen

+ luc. xiij.

44

Ic ben een gast geweest, ende ghi en hebt mi niet geherbercht, Ic ben naect geweest, ende ghi en hebt my niet gecleet, Ic ben cranc ende geuangen geweest, ende ghi en hebt mi niet besocht

45

Dan sullen si hem ooc antwoorden, seggende, HERE, wanneer hebben wi v gesien hongherich, oft dorstich, oft een gast, oft naect, oft cranc, oft gheuangen ende wi v niet ghedient en hebben?

46

Dan sal hi haer antwoorden, seggende, Voorwaer segge ic v, wat ghi niet gedaen en hebt eenen van desen alder minsten, dat en hebt ghi ooc mi niet gedaen.

47

Ende dese sullen ghaen in die eewige pijn, mer die rechtuaerdige int eewich leuen *