Den Bybel met groter neersticheyt ghecorrigeert (Liesveltbijbel 1542)

¶ Hoe .s. Ian zijn discipulen tot Iesum sant, ende hoe Iesus die steden strafte, die gheen penitencie gedaen en hadden, hoe dat den last ende gordel Cristi, licht ende genoechlick is.

Dat .xi. Capittel

1

⁺ENde het is geschiet doen Iesus voleyndt hadde sulcke gheboden tot sinen twaelf discipulen, ⁺ ginc hi van daer voordts, om te leeren ende prediken in haer steden

+ A vers 1

+ Lu. vij.b

2

† Ende doen Ioannes verhoorde inden kercker dye wercken cristi, sant hi twee van sinen discipulen ende dede hem seggen,

3

sijt ghy dye ghene die comen soude oft verbeyden wi eenen anderen,

4

ende Ihesus antwoorde haer, gaet ende bootschapt Ioanni wederom wat ghy siet ende hoort,

5

die blinde sien ende die cruepelen wandelen, die malaetse worden gesuuert, die doue hooren, die dooden worden verwect, ende den armen wort gepredict dat Euangelie,

6

ende salich is hi die in my niet verarghert en wort.

7

Ende doen die wech ginghen, begost Iesus te spreken

[p. *]

totten volc van Ioannes. Waerom so sidy wtghegaen inder woestijne, om te sien, ist om een ^a riet dat metten winde beroert wort?

a Riet, dat is leeringe dye wt God niet en is, maer draeyet met allen winde

8

oft waerom sidy wtgegaen, wildi eenen mensche sien die met saechten cleederen gecleet is? Siet, die saechte cleederen dragen, sijn in die huysen der coninghen,

9

oft waer toe sidy wtgegaen te sien? wilt ghi eenen Propheet sien? Ia, ic segghe v dat hi meer is dan een Propheet,

10

want dese is die ghene daer af gescreuen is. Siet ick seynde mijnen enghel voor v, dye uwen wech bereyden sal voor v. *

11

† Voorwaer ic segge v. Onder alle die gheboren sijn van vrouwen, ⁺ so en is niet opgestaen, dye meerder is dan Ioannes Baptista, ⁺ Mer die die minste is int rijc der hemelen die is meerder dan hi

+ mal. iij a

+ B vers 11

12

Maer van dye daghen Ioannis Baptiste tot noch toe, ⁺ so lijdt dat rijc der hemelen gewelt, ende die ghewelt doen, trecken dat tot haer,

+ lu. xvi d Lu. vij.d

13

want alle Propheten ende die wet hebben ghepropheteert tot Ioannem,

14

ende ist dat ghijt wilt ontfangen, hi is Helias die toecomende is,

15

die ooren heeft om te hooren, die hoore.

16

Maer bi wien sal ic dit gheslachte ghelijcken? het is gelijc den kinderen, die sitten op die marct, ende die haren medegesellen aenroepen ende seggen.

17

Wy hebben v ghepepen, ende ghi en wout niet danssen, Wi hebben v gheclaecht, ende ghi en wout niet weenen,

18

Ioannes is ghecomen, noch etende noch drinckende, ende si segghen, hi heeft den duuel.

19

Die sone des menschen is ghecomen, etende ende drinckende, ende si segghen. Siet den mensche, die een verslinder ende wijnsuyper is, die een gheselle der tollenaren, ende der sondaren is. Ende die wijsheit moedt haer laten rechtuaerdighen van haren kinderen. *

[afbeelding]

20

† Doen begonst Iesus te verwijten ende te straffen dye steden, ⁺ in die welcke meest sijn wercken gheschiet waren ⁺ Ende en hadden hen nochtans niet gebetert.

+ Luc. x.b

+ C vers 20

21

Wee v Chorazin. Wee v Bethsaidan, want waren in die steden Tyrus ende Sidon sulcke wercken geschiet, dye in v gesciet sijn, si hadden voortijden in sacken ende asschen penitencie gedaen,

22

nochtans segge ic v, dat den steden Tyro ende Sydon verdraechlijcker wesen sal, inden dach des oordeels dan v.

23

Ende ghi Capharnaum, die totten hemel verheuen sijt, sult totter hellen neder ghetrocken worden Want hadden inder stadt Zodoma die wercken geschiet dye in v geschiet sijn, si stont noch tot huyden op desen dage,

24

Mer ic segghe v dat den landen van Zodomen verdraechlijcker sijn sal inden dach des ordeels dan v. *

25

⁺† In dien tijden seyde Iesus voort ende sprack. Ick dancke v vader HERE des hemels, ende der aerden, dat ghi dit den wijsen ende verstandighen verborghen hebt ende te kennen ghegeuen hebt den cleynen ende den simpelen,

+ D vers 25

26

iae vader also heuet voor v behagelijc geweest.

27

Alle dingen sijn mi ouerghegeuen van mijnen vader, ende nyemant en kent den sone, dan dye vader, noch den vader en kent niemant, dan die sone, ende dient die sone wil openbaren

28

Coemt tot mi alle die ^b arbeyden ende beladen sijt, ende ick sal v vertroosten.

b arbeyden, dat is die hare sonden bekennen ende daer door beladen sijn

29

Neemt mijn iock op v, ende leert van mi, want ick saechtmoedich ende ootmoedich van herten ben, ende ghi sult uwe sielen in ruste vinden,

30

want mijn iock is soete, ende mijnen last is licht. *