Den Bybel met groter neersticheyt ghecorrigeert (Liesveltbijbel 1542)

¶ Nae Ionathan so wordt Symon sijn broeder hooftman ouer tvolck, hi tooch tegen Triphonem, begraeft sinen broeder, Triphon slaet doot Antiochum, Simon maect vrede met Demetrio, Simon beleyt Gazam.

Dat .xiij. Capittel

1

⁺SImon hoorde dat Triphon een groot heyr vergaderde, om int lant van Iuda te comen, ende om dat te branden, ende om dat hi sach, dattet volck in ancxt ende in vreesen was,

+ A vers 1

2

so reysde hi te Ierusalem, ende vergaderde dat volc ende riet hen segghende.

3

Ghi weet wat strijden dat ic ende mijn broeders, ende mijns vaders huys gedaen hebben, om die wet, ende die heylige stadt, ende dat verdriet dat wi geleden hebben,

4

om dese sake sijn mijn broeders doot ghebleuen om Israel wil, ende ic ben alleen ouerghebleuen, ende nv en hoort mi mijn siele niedt te sparen, in alle den tijt des verdriets.

5

Want ic en ben niet beter dan mijn broederen, ende hierom sal ic mijn volc wreken, ende dat heilige, ende onse wijuen, ende onse kinderrn,

6

want alle dye heydenen sijn vergadert, om ons te verderuen, ende wt te roeyen.

7

⁺Ende doen tvolc dese reden hoorde, wert haren geest verwermt, ende antwoorden met luyder stemmen segghende.

+ B vers 7

8

Du biste onse leytsman, in die stede van dijnen broeder Iuda, ende in Ionathas dijns broeders stadt, vecht onse strijden,

9

ende wi sullen al doen, dat ghi ons seggen sult.

10

Ende hi vergaderde alle dye strijtbare mannen, ende haeste hem te volmaken die mueren van Ierusalem, ende hi verwaerdet al om ende om.

11

Ende hi sandt Ionathas die sone Absolomi, ende met hem een nyeu heyr in Ioppen, ende verdreefse wt die daer binnen waren, inden slote, ende bleef daer selue binnen,

12

ende Triphon vertrack met eenen grooten heyr, van Tholomaiden, om int landt van Iuda te comen, ende Ionathas was bi Triphon, als sijn geuangen,

13

ende Simon tooch in Addudis tegen die wijde velden,

14

Ende doen Triphon vernam, dat Simon opgheresen was, in die stede van Ionathan sinen broeder, ende want hi teghen hem strijden soude, doen seynde hy legaten tot hem, ende seyde.

15

Wi hebben Ionathan uwen broeder ghehouden voor dat siluer dat hi ons sculdich was, in des conincx rekeninge.

16

Ende nv so seyndt ons hondert talenten siluers, ende beyde sijn sonen in ostagie, dat hi ons niet en ontuliede, als wi hem laten gaen, ende wi sullen hem weder seynden,

17

ende Simon verstont dat hi dit met boosheden seyde, nochtans beual hi dat siluer ende die kinderen te geuen, om dat hi geen grote viantscap beiagen en soude aent volc van Israel, die seggen souden,

18

om dat hi dat siluer ende die kinder niet en sandt, so is hi ghedoot,

19

ende hi sandt die kinder, ende hondert talenten siluers. Ende Triphon looch, ende en liet Ionathas noch niet gaen.

20

Ende hier na quam Triphon binnen den landtscappe, om dat hijt bederuen soude, ende si toghen om den wech die tot Ador waert leydt.

21

Ende Simon met sinen heyr trac telcker stede daer si ginghen. Ende dye inden slote waren, sonden boden tot Triphon, dat hi hem haeste door die wildernisse te comen, ende dat hi hen prouande sonde.

22

⁺Ende Triphon bereyde alle dat reyseger volck op dat hi binnen dier nacht comen soude. Want het was harde veel sneeus, ende hi en quam in Galaad niet

+ C vers 22

23

Ende doen hi te Baschaman gecomen was, so doode hi Ionathas ende sijn sonen.

24

Ende Triphon keerde hem om ende trac weder in sijn landt.

25

Ende Simeon sandt ende nam Ionathas sijn broeders ghebeente, ende groeft in Modin, in sijnre vaders stadt

26

Ende alle Israel beweenden met grooten geween ende bescreyden hem vele daghen,

27

ende Symon stichte op sijne vaders, ende sijnder broederen graf, een hooch getimmert van aensien, met gehouwen steenen, van achter tot voren, ende hi sette seuen calomnen,

28

die eene teghen die ander, sinen vader, sine moeder, ende sijn vier gebroeders ter eeren.

29

Ende hi sette hierom grote

[p. *]

colomnen, ende op die calomnen haer wapenen gesneden tot een eewige gedenckenisse, ende bi die wapenen wtgesneden scepen, die die lieden sien, die inder zee varen

30

Dit is tgraf dat hi in Modyn maeckte, tot in desen dage.

31

Ende doen Triphon wech voer metten iongelinc Anthiocho den coninc, so doode hi hem valschelic, ende hi regneerde in sijn stede,

32

ende hi sette dye croon van Asien op sijn hooft, ende hi dede grote scade in dat lant

33

Doe stelde Simon bewaringe ouer dat lant van Iudea ende bewaerdet, met hooghen toornen, groote mueren, ende starcke poorten, ende sloten, ende hi leyde victalie in die steden.

34

Ende Simon coos mannen wt ende santse tot Demetrium den coninc biddende, dat hi dat lant vry houden soude van tribute, Want Triphon had tlant iammerlijcken berooft ende bedoruen.

35

⁺Ende die coninc Demetrius, antwoorde ende screef hier toe.

+ D vers 35

36

Demetrius die coninc, Simone den hogen priester, sinen vrient, ende den ouders, ende den volck der Ioden saluyt.

37

Die gulden croon, ende den gulden halsbant, die ghi ons gesonden hebt, hebben wi ontfaen

38

ende sijn ghereet met v eenen vasten vrede te maken, ende te scriuen des conincx rentmeesteren, dat si laten v dat wi v ghegeuen hebben, ende so wat wi dy ghegeuen hebben, dat si uwe.

39

Ende die vaste steden die ghi ghemaect hebt, blijuen uwe, wi vergheuen v ooc alle roeckeloosheit ende quaet dat ghi ghedaen hebt, tot in desen daghe toe, ende die crone dye ghi schuldich waert, ende wat dat anders was onder tribuyt in Ierusalem, dat en sal nv gheen tribuyt schuldich wesen.

40

Ende sijnder eenige onder v lieden, die bequaem sijn, die laten haer onder ons hofghesien scrijuen, ende tusschen ons si vrede.

41

Inden hondersten ende tseuentichsten iare, na den tijt der griecken, so werde der heydenen macht van Israel ghenomen.

42

Ende dat volck begonste doe te scrijuen in tafelen in haren openbaren brieuen, die si maecten, int eerste iaer, onder Simon den hoogen priester ende leytsman ende prince van Iudea.

43

In dyen daghen track Simon te Gazam, ende hi omleydet met een heyr, ende hi maeckte daer bolwercken, ende track totter stadt waert, ende hy sloech eenen houten toren ende wan dye stadt.

44

Ende die daer in braken, waren tusschen tbolwerck ende der stadt, ende inder stadt wert groot geruchte, ende die ghene dye inder stadt waren

45

ghinghen opten muer met haren wijuen, ende met kinderen, ende schoorden haer cleederen, ende riepen met luyder stemmen, ende si begeerden van Simon, dat hi den vrede gaue, ende seyden,

46

En verghelt ons niet na onser boosheit, ⁺ maer na dijnre ontfermherticheydt, ende wi sullen v dienen.

+ E vers 46

47

Doe werdt Simeon gheneycht tot ontfermherticheydt, ende en beuachtse nyet, maer hi verdreefse wter stadt, ende suyuerde die huysen, daer dye afgoden in gheweest hadden,

48

doen ghinck hy daer binnen, met loue den HEERE ghebenedyende, Ende doen alle onsuyuerheydt wter stadt gheworpen was, soo leyde hy mannen daer binnen, die de wet souden houden, ende hi bewaerdese ende settese in eenre wooninghen tot sinen behoef.

49

Ende men en lietse niedt wt trecken die inden slote te Iherusalem waren, ende die int landtschap te varen plegen, ende men en lietse copen noch vercoopen, ende si hadden grooten honghere, ende veel van haer sterffer van honger.

50

Ende si riepen aen Simon, dat si vrede ontfangen wouden. Ende hi ghaf hen vrede, ende dreefse daer wt, ende suuerde dat slot, vander onsuuerheydt.

51

Ende si ginghen daer in opten drientwintichsten dach vander andere maent, inden hondert ende eenenseuentichsten iare, met loue ende met telgeren van palmen, ende met harpen, ende cymbalen, ende met sanctorien loue ende sange, om dat die grote vyant van Israel tonder ghegaen was.

52

Ende hi oordineerde datmen alle iare dese daghen houden soude, met blijscappen,

53

ende bewaerde den berch vanden tempel, die bi dat slot was ende daer woonde hi selue, ende die met hem waren.

54

Ende Symon sach Ioannem sinen soone, dat hi een sterck man wesen woude, ende hi maeckte hem hooftman ouer dat ruyter volck, ende hi woonde in Gasam.