Den Bybel met groter neersticheyt ghecorrigeert (Liesveltbijbel 1542)

Vander eerlijcker victorie, die God gaf Iuda tegen Gorgiam ende Lisiam, ende hoe hi die stadt weder wan, ende den tempel weder suuerde ende wijde

Dat .iiij. Capittel

1

⁺GOrgias nam vijfduysent mannen met hem, ende duisent wtuercorene reyseners,

+ A vers 1

2

Ende si togen inder nacht, totten ioden legere, dat sise onuersienlic slaen souden, Ende die vanden slote, waren haer leytsmannen

3

Ende Iudas die hoordet, ende hi stont op om die machtighe te slaen,

4

die macht van des conincx heyr dye in Ammaum waren, want dat heyr en was noch nyedt bi malcanderen.

5

Ende Gorgias die quam in Iudas legher bi nachte, ende Gorgias en vanter niemant. Ende hi socht ooc int geberchte, meynende datse daer geuloden waren

6

Ende doet dach geworden was, so stont Iudas inden vlacken velde, met drie duisent mannen alleen, die noch harnasch, noch swaert en hadden na haren wille.

7

Ende si sagen daer tegen dat der heydenen heyr, starck, ende al omme ende om hen lieden, die ghewapende knechten, ende dye wel getuychde reysegers, die al wel waren geleert ten strijde. ⁺

+ Deu. xx

8

Ende Iudas die seyde totten mannen die met hem waren. En ontsiet dese menichte niet, ende en veruaert v niet van haren geruchte.

9

Ghi sult gedencken hoe onse vaderen worden behouden, in die roode zee, daer hen Pharao na volchde met eenen groten heyr.

10

⁺Ende nv laet ons roepen inden hemele. Ende die HERE sal ons ontfermen, ende sal gedencken onser vaderen beloften,

+ B vers 10

11

ende sal huyden dit volc tonder doen, voor onse aensichten, ende alle die heydenen sullen weten wantet Godt is, die Israel vrymaect ende verlost.

12

Ende die vreemde geboren hieuen haer ooghen op, ende sagense comen tegen haer.

13

Ende si toghen wten tenten ten strijde, ende die met Iudas waren, si trompten metten trompetten.

14

Ende als si vergaderden die heydenen ghingen tonder, ende vloden opt velt. Maer dye

[p. *]

achterste vielen inden swaerde,

15

ende si volchden hem tot Gezoron ende totten velde van Ydumea, ende van Azoten, ende van Iamniel, ende van dien vielen drie duysent mannen.

16

Ende Iudas die keerde weder, ende sijn heyr volchde hem, Ende seyde totten volcke,

17

En begheert noch gheenen roof, want den strijt is teghen ons,

18

ende Gorgias, ende sijn heyr is inden bergen bi ons, maer nv staet tegen onse vianden, ende veriaechdese. Ende daer na suldy sekerlijc den roof nemen.

19

Ende doen Iudas noch dit sprac, so saghen si noch een partie dalende vanden berge.

20

Ende Gorgias sach dat die zijn geuloden waren, ende dat sijn tenten ontsteken waren, want den rooc diemen sach bewees wat aldaer geuallen was.

21

Ende doe si dit sagen, so ontsaghen si hen herde seer, om dat si die Ioden sagen gereet om te strijden op dat velt.

22

Ende si vloden al inder Palestijnen lant.

23

Ende Iudas keerde hem ten rooue waert, vanden tenten, ende si namen veel gouts, ende siluers, ende blaeu cleederen, ende purpur, ende ooc veel costelicke cleynodien ende groot goet.

24

Ende als si weder keerden, songen si lof, ende dancten God vanden hemel,

25

want hi is is goet, ende inder eewicheyt is sijn ontfermherticheit. Ende in dien dage gheuiel groote salicheyt in Israel.

26

Ende die ghene die vanden heydenen ontgaen waren, die quamen ende seydent Lisias al datter gheschiet was.

27

Ende doen hi dit hoorde, so wort hi crachteloos van grooten rouwe, ⁺ om dattet in Israel also niet geuallen en was, also hi woude, ende alsoo als die coninck beuolen had.

+ C vers 27

28

Ende ten anderden iare vergaderde Lisias tsestich duysent mannen te voet, ende vijf duysent gheredenen, om Iudam te verwinnen,

29

ende si quamen in Iudea, ende sloegen tenten in Bethoron, ende Iudas quam hen te ghemoet, met thien duysent mannen.

30

Doen nv Iudas dat machtige heyr sach, riep hi tot God, segghende, O God verlosser van Israel, du biste gebenedijt, dye des machtichs geruchte neder worpste, in Dauids dijns knechts hant, ende leuerdeste der Palestinen heyr, inden handen van Ionathas, des soons Sauls, ende inden handen zijns schiltknechts.

31

Besluyt dit volc O HERE in dijns volcx van Israels handen, ende si moeten gheschent werden, in haer heyr ende in haer gheredenen.

32

Gheeft hen ancxt, ende die stouticheyt haerder macht moet smelten, ende si lieden moeten worden verueert, in haer lieden verderffenissen.

33

⁺Verdrijuet ghise HEERE, met der gheenre swaerden, die v lief hebben ende minnen, ende alle die dijnen naem bekennen, moeten v louen in blijscappen,

+ D vers 33

34

ende si vergaderden, ende maecten strijdt Ende van Lisias heyr, vielen vijf duysent mannen,

35

ende doen Lisias sach dat zijn lieden vloden, ende der Ioden stoutheit ende dat si bereet waren te leuen oft te steruen, so voer hi wech tot Antiochien, ende koos ridders wt, dat hi met grooter menichten weder comen soude in Iudea.

36

Ende Iudas ende zijn broeders seyden, Siet onse vianden sijn nv tonder ghedaen, laet ons optrecken, ende den heylighen tempel suyueren ende vernyeuwen

37

⁺Ende al theyr vergaderde, ende trock opten berch van Sion,

+ E vers 37

38

ende si sagen den tempel verwoest, ende den outaer ontsuuert, ende die poorten verbrant, ende inden vrijthof vanden tempel Gods schueten ghewassen, gelijc si inden bosschen ende in bergen plegen te wassen, ende die eetcameren omgeworpen.

39

Ende si scoorden haer cleederen, ende weenden met groten geweene, ende si deden asschen op haer hooft

40

ende vielen op haer aensichten, op die aerde, ende riepen met trompetten, ende riepen inden hemel.

41

Iudas ordineerde mannen die vechten souden, tegen die gene die in dat slot waren tot dat si den tempel ghesuyuert souden hebben

42

Ende hi koos wt priesters sonder smette, dye den wille in Gods wet hadden, ende die suuerden den tempel.

43

Ende si droegen die steenen der besmetheyt in een onsuyuer plaetse.

44

Ende Iudas peysde vanden outaer des brantoffers, die veronreynighet was, wat hy daer mede doen soude,

45

ende hem docht dat beste sijn, dat hijen breken soude, op dat hy hem in gheenen lachter en worde, want die heydenen hadden besmet,

46

ende si brakent, Ende leyden die steenen op inden berghen vanden huyse, in een tamelike plaetse, tot dat een propheet comen soude, die hen seggen soude watmen daer mede doen soude

47

Ende si namen heel steenen na der wet, ende si maecten eenen nyeuwen outaer, dien gelijc, die te voren was,

48

ende si maecten dat heylichdom, ende heylichden dat binnen int huys was, ende inden poortale, ende binnen die vrijthof.

49

Ende si maecten nyeuwe heylige vaten, ende droegen eenen candelaer inden tempel, ende den brantoffer outaer,

50

ende die tafel inden tempel, ende si ontstaken die lichten die opten candelaer waren, ende si lichteden inden tempel.

51

Ende si leyden opter tafelen toonbrooden, ende hingen die gordijnen, ende voldeden alle haer werc, dat hen toebehoorden.

52

Ende opten .xxv.sten dach der negender maent die Casleu heet, ⁺ int honderste ende achtenueertichste iaer stonden si voor den daghe op,

+ Casleu is December.

53

ende offerden opten nyeuwen outaer brantoffer, dien si gemaect hadden, om offerhande, daer op te doen, nader wet

54

na der tijt, ende na den dach, dat die heydenen den outaer besmetten, inden seluen daghe wert hi vernyeut met sange, met fluyten, harpen, ende cimbalen

55

Ende alle tvolc viel op sijn aensicht, ende aenbeden, ⁺ ende loofden God inden hemel die hen voorspoet gaf,

+ F vers 55

56

ende si hielden die wijnghe des outaers .viij. daghen, ende si offerden brandtoffer, ende danckelijcke spijsoffer met blijschappen.

57

Ende verchierden dat aensicht vanden tempel met gulden croonen ende met schildekens, ende si volmaecten die poorten ende weerschaps cameren, ende hinghen daer doren aen.

58

Ende het wert herde grote bliscap inden volcke, ende der heydenen kinderen werden van hen gekeert.

59

Ende Iudas ende sijn broederen, ende alle die vergaderinghe van Israel, ordineerden datment van iare te iare soude doen, ende houden te sinen tijde den dach van des outaers wijnge met vruechden ende met blijschappen acht daghen lanc. vanden .xxv. dach vander maent Casleu.

60

Ende in dien tijden stichte Iudas, ende sijn broeren den berch Zion, met hooghen mueren ende vaste toornen, alom ende omme, op dat die heydenen nemmermeer comen en souden ende verraden, alsoo si te voren ghedaen hadden, ende leyden daer een heyr om, dat si hem houden souden,

61

ende si maecten vast om Bethsuram te behouden, ende om dattet volc een vaste stede hebben soude tegen dat aensicht van Idumea.