Den Bybel met groter neersticheyt ghecorrigeert (Liesveltbijbel 1542)

Lof ende prijs Symons des soons Onie

Dat .l. Capittel

1

⁺SImon Onias sone, die grote Priester die dat huys in sinen leuen ondersettede, ende in sinen dagen stercte hi den tempel

+ A vers 1

3

Die hoocheit des tempels is ooc van hem gesticht, die dubbele timmeringhe ende die hoge wanden des tempels.

3

In sinen daghen wtuloeyden die putten der wateren, ende werden veruult bouen maten.

4

Die sijn volc besorchde, ende verlostese vander verderffenisse.

5

Die zijn stat bewaerde, ende datse niet belegen en wert, die vermocht die stadt te wijdene die glorie vercreech in des volcx wandelinge, ende hi wide den inganc des huys ende des vrijthoofs.

6

Gelijc die morgensterre int midden des neuels, ende als een volle mane in haren dagen lichtet.

7

Ende als een blinckende sonne, also blincte hi inden tempel Gods, Als die blinckende boge onder die wolcken der glorien ende als een roosbloeme inden meydagen,

8

ende gelijc die lelien die inden doorganc des waters sijn, ende welrieckende wierooc inden dagen des somers.

9

Als blinckende vier, ende als wierooc bernende inden viere.

10

Als een dicht gulden vat verciert met alderhande costelike gesteente, als een wtspruytende oliue

11

ende eenen cypressenboom, hem in die hoocheyt verheffende

12

In dien dat hi dat cleet der glorien ontfinc, ende gecleet wert in volmaectheit der duecht, inden opganc des heiligen outaers, so gaf hi glorie, dat gewaet der heylicheit,

13

⁺Mer in te ontfaen die deelen vander priesters hant, ende hi staende neffens den outaer. Ontrent hem was dien rinc des broeders, ende als die plantinge des cederbooms inden berch Libanon, also stonden si om hem als palmtacken,

+ B vers 13

14

ende alle die kinderen Aaron in haer eerlike cieragie. Mer die offerhande des HEREN was in haren handen, voor alle die vergaderinge Israels,

15

ende bedienende de voleyndinge opten outaer, om te meerderen des hogen conincx offerhande,

16

stac hi sijn hant voort in dat dancoffer, ende schincte vanden wijndruyuen bloede

17

Hi wtstortede in dat fundament des outaers eenen goeden ruec, ⁺ den alderhoochsten prince.

+ C vers 17

18

Doen riepen die kinderen Aaron wt, ende si bliesen inden geslegenen basuynen, ende si deden een groote stemme horen, tot ghedachtenisse voor God.

19

Doen verscricte allet volc te gader, ende si vielen op haer aensicht ter aerden, den HERE haren God te aenbeden ende gebeden te geuen, den almachtigen hoogen God,

20

ende si vermeerderende singende met haren stemmen, ende in dat grote huys is een geluyt vol soeticheits gemaeckt.

21

Ende dat volc badt den hogen HERE inden ghebede tot dat die eere des Heeren was volbracht, ende si volmaecten haer offerhanden.

22

⁺Doen nedercomende stac hi zijn handen wt tot alle die vergaderinge der kinderen Israels. Gode glorie te geuen van haren lippen, ende in sinen name te glorieren.

+ D vers 22

23

Ende hi dede anderwerf sijn gebet, willende toonen die dancsegginge Gods, te weten also,

24

Ghi alle segt lof ende danc den HERE onsen God, die groote dingen in allet lant heeft gedaen, die onse dagen van onser moeder buyc verheuen heeft, ende heeft met ons nae zijn ontfermherticheyt gedaen.

25

Hi geue ons vrolicheyt des herten, ende vrede te werden in onsen dagen in Israel.

26

Ten eewigen dagen Israel te gelouen, dat Gods ontfermherticheyt met ons is dat hi ons verlosse ter bequamer tijt.

27

Mijn siele hatet twee volcken, mer dat derde en is geen volc dat ic hate

28

Die sittende inden berch Samarie ende Philisteen, ende dat sotte volck dat in Sichimis woont.

29

⁺Ic Iesus een sone Sirach Eleazari van Hierusalem, heb dese leeringe der wijsheyt wt mijnder herten gestort.

+ E vers 29

30

Wel dyen die in desen goeden ongaet ende diese in sijnder herten set, sal altoos wijs sijn.

31

Ist dat hi dese dingen doet, so sal hi tot allen dinghen sterck sijn want dat licht des HEREN is sinen voetstap.