Den Bybel met groter neersticheyt ghecorrigeert (Liesveltbijbel 1542)

Wijsheyt leert bermhertich ende vriendelijc zijn tegen alle menschen, wat loon si den genen geeft dier haer soecken ende liefhebben

Dat .iiij. Capittel.

[p. *]

1

⁺Mijn kint en ontreckt noch en vermindert die aelmoesse des armen niet, enbe en keert v ooghe niet omme vanden behoeftighen, ⁺ en versmaet die hongerige siele niet,

+ A vers 1

+ deu. xv d Math. xxiij.a

2

noch en spreect den armen niet spijtelic toe in sinen ghebreke,

3

en bedroeft dat herte niet des gheens die verbaest is, ende en vertrect den behoeftighen die ghifte niet.

4

En verworpt die bede des benauden niet, ende en keert v aensicht niet af vanden behoeuenden,

5

en keert v ooghen niet vanden allendighen, op dat ghi hem gheen oorsake en gheuet, tot di quaet te spreken.

6

Wandt dat ghebet des gheens, die tot v quaet spreect, midts bitterheyt sijnre sielen sal worden verhoort, want die hem ghemaect heeft, dye sal hem verhooren.

7

Maect v ghespreecsaem, met der vergaderinge der armen, ende verootmoedicht den oudere v siele, ende den voorbarighen boocht v hooft,

8

Neycht neder v oore den armen sonder droefheyt, ende betaelt v scult, ende antwoort hem vredelijc in saechtmoedicheit.

9

Verlost hem die onrecht lijdt, van des houeerdichs hant ende en weest niet cleynmoedich in uwer sielen.

Als ghi oordeelt,

10

sijt den weesen ontfermhertich als een vader, ende sijt haerder moeder voor eenen man,

11

⁺ende ghi sult ghehoorsaem sijn, als des alderhoochsten soon, ende hi sal uwer meer ontfermen dan v moedere.

+ B vers 11

12

Die wijsheyt ingheestet haren kinderen dat leuen, ende si ontfanctse die haer versoecken,

13

ende sy sal voorgaen inden wech der gherechticheyt, Ende wiese bemint, die bemint dat leuen, ende die tot haerwaert waken, die sullen haer met behaghen omhelsen.

14

Diese houden, die sullen dat leuen beeruen, ende waer si in gaen sal, daer salt God gebenedien,

15

Dye haer dienen, dye sullen den heylighen ghedienstich sijn, ende diese beminnen, die bemint ooc God,

16

Diese hoort, sal die heydenen oordeelen, ende diese aenschout sal betrouwende blijuen.

17

Ist dat hi haer gelooft, so sal hise beeruen, ende sijn geslacht sal staende blijuen,

18

Want als hi valt, sal si voor allen met hem gaen. ⁺ Vreese, ancxt ende proeuinge, sal si op hem brengen, ende si sal hem beproeuen in haerder leeringhen, totter tijt toe,

+ C vers 18

19

dat si hem beproeft heeft in sinen gedachten, ende dat hi haer sijn siele betrouwe. Ende si sal hem vast maken,

20

ende si sal den rechten wech tot hem brenghen, ende si sal hem verblijden,

21

ende si sal hem haer verborgentheden ontdecken,

22

ende si sal hem tot eenen schat vergaderen, kennisse, ende verstandenisse der gerechticheit Maer ist dat hi doolt, so sal si hem laten, ende sal hem in sijns viants hant leueren.

23

⁺Mijn kint neemt waer den tijt, ende schouwet dat quaet.

+ D vers 23

24

En schaemt v niet die waerheyt te segghen voor v siele,

25

Want daer is een beschaemtheit die sonde toebrengt, ende daer is een bescaemtheyt, dye glorie ende ghenade toebrengt,

26

En aensiet den persoon niet aen, op dat ghi niet bespot en wort tot eenen val.

27

⁺En schaemt v ws naesten niet in sinen ongeualle, noch en verhout den raet niet, inder tijt des noots, En verbercht v wijsheit niet in haerder claerheit,

+ E vers 27

28

Want men bekent die wijsheyt in die tonge, ende dat verstant, kennisse ende leeringe, in dat woort des verstandighen, ende die vasticheyt, in die wercken der gherechticheyt.

29

En segt in gheender manieren teghen dat woort der waerheyt, ende wort beschaemt vander loghen uwer gheleertheyt,

30

En schaemt v niet v dwalinghen te bekennen,

31

ende en onderworpt v niet allen mensche om der boosheyt, En wilt niet wederstaen tegen des machtighen aensicht, noch en arbeyt niet tegen den blixem.

32

Strijdt om die gerechticheyt voor v siele, ende strijt ter doot toe, voor die gerechticheyt, ende God sal v vianden voor v vechtende, verwinnen

33

En wilt niet haestich sijn in v tonge, ende onnutte ende slap in uwen wercken,

34

En wilt nyet sijn in v huys als een leeu, omkeerende v huysghesin, ende verdruckende die v onderworpen sijn.

35

Dijn hant en si nyet wtghestrect, om gheschencken te nemen, ende ooc gesloten om die te gheuen.