Den Bybel met groter neersticheyt ghecorrigeert (Liesveltbijbel 1542)

Wat profijts ende goets wt der wijsheydt den menschen aenstaende si

Dat .x. Capittel

1

⁺DEse wijsheyt bewaerde, dien die eerst van God ghemaeckt is een vader der werelt, ⁺ als hi alleen was gheschapen ende bracht hem wt van sijnder misdaet Ende hi bracht hem wt vanden slime der aerden,

+ A vers 1

+ Ge. i. ij. iiij vij.

2

ende hi gaf hem cracht alle dinghen te regeren.

3

Als nv die onrechtuerdige wech ginc van deser wijsheyt in sijnder gramscappen, so is die broederlicheidt vergaen, door die gramscappe des dootslachts.

4

Doen dat water die ganssche werelt verdorf, so heeft dye wijsheyt wederom den rechtueerdighen, door een slecht hout behouden.

5

Dese wijsheyt als hen die volcken inder houerdicheit hadden verheuen, so kende si den rechtuerdigen, ende si behielt hem Gode, sonder claghinge, ende die ontfermherticheyt bewaerde den stercken inden kinderen.

6

Dese wijsheyt verloste den rechtueerdigen, vliedende vanden vergaenden godlosen, alst vier neder viel inden vijf steden,

7

den welcken tot een getuygenisse dat woeste lant roocachtich blijft, ende boomen in sekere tijt vruchten hebbende, ende eenen sout steen, staende tot een gedachtenisse der ongelouiger sielen.

8

Want die de wijsheyt veracht hebben, die en vielen niet alleen daer inne, ⁺ dat si die goeden niet en wisten, mer si lieten den menschen een gedachtenisse haerder onwijsheyt achter, also dat si ooc niet verborgen en mochten bliuen, inden dingen daer si in sondichden.

+ B vers 8

9

Mer die wijsheyt verlostese van lijden die haerder waernemen

10

† Dese wijsheyt beleyde den rechtueerdigen vluchtende der gramschappen zijns broeders, door rechte weghen ende si thoonde hem dat rijcke Gods, ende si gaf hem der heyliger kennisse, si maecte hem eerlic inden arbeyden, ende si veruulde zijn arbeyden,

11

Int bedroch der geender die hem bedrogen is si bi hem, ende maecte hem rijck. Si bewaerde hem vanden vyanden, ende beschermde hem vanden verleyders

12

Ende si gaf hem eenen stercken strijdt op dat hi verwinnen soude, ende weten, dat die wijsheyt machtigher is dan alle dinck.

13

⁺Dese wijsheit en heeft den vercochten rechtueerdigen niet verlaten, mer si verloste hem vanden sondaers, ende si daelde met hem neder inden cuyle,

+ C vers 13

14

ende si en verliet hem niet inder geuanckenissen, tot dat si hem dat sceptrum des rijcx toe brochte, ende machticheit tegen die gene die hem verdructen, ende thoondese luegenachtich te wesen die hem besculdichden, ende si bracht hem tot grooter eeren.

15

Dese wijsheyt verloste dat rechtuerdige volc, ⁺ ende dat saet sonder claginge verlostedese si vanden natien die hem verdructen.

+ ex. iij iiij v. vij. ix

16

Si ginck in die siele des knechts Gods, ende stont bi hem, tegen veruaerlike coninghen in wonderen ende teekenen.

17

Ende si wederghaf den rechtuerdigen, loon van haren arbeyden, ende si beleyde die in eenen wonderlijcken wech, ende si was dyen in een scaduwe des daechs, ende snachts in een lichte der sterren

18

Ende si leydese door dye roode zee, ende si voerdese door een seer groot water.

19

Mer hare vianden verdranc si in die zee, ende si leydese wt der diepten weder op.

20

Hierom namen die rechtueerdige der ongodlijckker roof wech, ende si songen, O HEERE, uwen name is heylich, ende si loofden te gader die verwinnersse v hant.

21

Want die wijsheyt dede der stommer mont open, ende si maecte die tongen der ontsprekender ^a kinderen, wel sprekende.

a Kinderen dat zijn slechte simpelmenschen dye haer seluen niet achten, mer god alleen groot achten ende wijs, also inden viij. psalme staet.