Den Bybel met groter neersticheyt ghecorrigeert (Liesveltbijbel 1542)

Een gebet tot God, om die gaue der wijsheyt

Dat .ix. Capittel.

1

⁺GOdt mijnder vaderen, ⁺ ende HERE der ontfermherticheyt, die alle dingen met uwen woorde hebt gemaect,

+ A vers 1

+ Gebet.

2

ende den mensche mits v wijsheyt hebt ghestelt, dat hi die creatuere soude verheren, die van v ghemaect is, ⁺

+ Gene.

3

op dat hi dat aertrijc soude regeren in gelijckheyt, ende rechtuerdicheyt, ende dat hi in gherechter herten, dat oordeel, ende dat gerecht is spreke

4

geeft mi die wijsheyt, die een bistaenster ws throons is, ende en wilt mi niet versteken van uwen kinderen,

5

want ic ben v knecht, ende die sone uwer dienstdeernen, een onsterck mensch van corter tijt, ende te ionc totten verstande des oordeels, ende der wetten.

6

Ende so wye volmaect sal sijn onder der menschen sonen, ist dat uwe wijsheyt van hem is, ⁺ hi sal voor niet worden gherekent,

+ Psal. c.

7

Maer ghi hebt mi tot eenen coninc dinen volcke vercoren, ende eenen rechter uwer sonen ende dochteren.

8

Ende ghi beuaelt my, v eenen tempele te timmeren, in uwen heylighen berch, ende eenen outaer, in die stadt uwer wooningen, een gelijckenisse ws heiligen tabernakels, ⁺ welcke ghy van beghin bereyt hebt,

+ B vers 8

9

ende v wijsheyt met v, die welcke uwe wercken weet, dye welcke doen daer ooc bi was, doen ghy dat aertrijc maeckte, ende wiste dat uwen oogen behagelijc was ende wat oprecht was in v gheboden

10

Seynt die van uwen heyligen hemelen, ende vanden stoele dijnre grootheydt, ⁺ op dat si met mi si ende met mi arbeyde, op dat ic mach weten wat bi v aengenaem si,

+ psal. v..

11

want die weet ende verstaet alle dingen, ende si sal mi matelijcke leyden in mijn wercken, ende si sal mi bewaren in hare macht,

12

ende mijne wercken sullen aenghenaem sijn, ende ic sal v volc rechtueerdelijc regeren, ende ick sal waerdich sijn, mijns vaders stoel te besitten.

13

Want wat mensch mach den raet Gods weten? ⁺ of wie mach dencken wat God wilt,

+ de xvij f i.cor xiij rom. xij. Act. i.

14

Want die gedachten der sterflijcker menschen zijn vreesachtich, ende onse voorsienicheden sijn onseker.

15

⁺Want dat lichaem dat verdoruen wort, beswaert die ziele, ende die aertsche inwoninge druct dat verstant neder dat vele denckende is

+ C vers 15

16

Ende wi begripen swaerlic die dingen die inder aerden zijn ende die int aenscouwen zijn, vinden wy met arbeyt. Mer wie sal die dingen ondersoecken, die inden hemel zijn?

17

Och HERE, wie sal uwen sin geweten, het en sy dat ghi uwen heiligen geest seynt vanden alderhoochsten,

18

Ende ist dat die paden der geender die inder aerden zijn, gebetert zijn, ende die menschen die dingen geleert hebben, die v behagen Want door die wijsheyt zijn si gesont geworden, dye den HERE behaget hebben van beginne.