Den Bybel met groter neersticheyt ghecorrigeert (Liesveltbijbel 1542)

Vanden lof ende profijte der duechden, vander scande der godloosen, wat eeren dat weert si een eerlic goduruchtich ouder ende vanden schandelijcken doot der Godloosen

Dat .iiij. Capittel

1

⁺O Hoe scoon is een suuer generatie met liefden, want haer gedachtenis is onsterflijc, want si is bi gode ende by die menschen bekent.

+ A vers 1

2

Als si tegenwoordich is, so volgen sise na, ende si begerense, als si haer wt brengen, ende si triumpheert gecroont inder eewicheyt, verwinnende der onbeulecter strijden loon.

3

Mer die menichte der godlooser kinderen en is niedt nut, ende die ouerwonnen scoeten en sullen niet diep wortelen, noch si en sullen gheen staende vasticheyt leggen,

4

Ende ist dat si inden tacken inder tijt groeyen, onuastelijcken gheset, ⁺ sullen si vanden winde beweghet werden ende van ouerlasticheyt der winden, sullen si wtgewortelt worden.

+ Ier. xvij mal. i,d. mat. vi.

5

Want dye onuolmaecte tacken sullen ghebroken werden, ende haer vruchten sullen onnut sijn, ende bitter om eten, ende nergens toe bequaem.

6

Want alle die kinderen die vanden ongerechtigen worden geboren, sijn getuygen der schalcheit tegen haer ouders, die wile datmense opuoet.

7

Maer ist dat dye rechtuaerdige metter doot oueruallen wert, so sal hi nochtans in rusten sijn.

8

⁺Want die outheyt is eerlic, niet alleen metten getale der iaren ghetelt. ⁺

+ B vers 8

+ heb. xi.c.

9

Dat verstant des menschen is grijs, ende die beste outheydt, is een onbesmet leuen. ⁺

+ ij.co.. xij

10

Die Gode behaecht, die is liefgetal gemaect, ende leuende onder die sondaren, is hi ouer gheuoert.

11

Hi is wech geruct, op dat die boosheyt sijn verstant nyet veranderen en soude, oft dat die hypocrisie zijn siele niet bedriegen en soude.

12

Want die betooueringe der logenachticheyt verdonckert goede dingen, ende dye verkeerde ende boose aenuechtingen verkeeren tverstant der simpelen,

13

ende hoe wel hi corts ghestoruen is, nochtans heeft hi vele tijden veruult.

14

Sijn siele was Gode behaechlijck, daerom haeste hi hem dyen wt te leyden, vant midden der ongherechticheden.

15

⁺Maer die lieden siende, ende niet verstaende noch niet ter herten nemende sulcke dingen, want Gods gratie ende ontfermherticheit is tot sinen heyligen, ende sijn aenscouwen is ouer sijn wtuercorene.

+ C vers 15

16

Want die rechtuerdige doode, verdoemt den leuenden godlosen, ende die ioncheyt snellijcken voleynt, verdoemt dat lange leuen des onrechtuerdigen.

17

Want si sullen dat eynde des wijsen sien, ende si en sullen niet verstaen wat God van dyen gedacht heeft, ende waeromme, dat hem die HEERE heeft laten steruen,

18

want si sullen sien, ende versmaden hem, mer dye sal God bespotten, ende na dese dingen sullen si af vallen sonder eere, in smaet onder die dooden inder eewicheyt.

19

Want hi sal die opgheblasene, sonder stemme verscoeren, ende hi salse bewegen vanden fundamenten, ende si sullen totten ouersten toe verlaten worden Ende si sullen suchtende sijn ende haer gedachtenisse sal vergaen.

20

Si sullen beureest in ghedachten haerder sonden comen, ende haer ongerechticheden, sullense beureest maken ende verraden.