Den Bybel met groter neersticheyt ghecorrigeert (Liesveltbijbel 1542)

¶ Holofernes beleyt die stadt Bethuliam, waerom die Israeliten veruaert, tot God om hulpe roepen. Hi beneemt haer dat water, dat si inder stadt grooten dorst leden, si worden onlijdsaem, Ozias die priester sterctse

Dat .vij. Capittel

1

⁺DEs anderdaechs geboot Holofernes sinen heyscharen dat si op souden trecken voor Bethuliam, ende der strijtbaer knechten waren hondert duysent, ende ,xx. duysent, ende der reysenaers .xxij. duysent, behaluen die bereydinghe der mannen, die verwonnen waren, ende ooc wt allen landen ende steden, die hi gewonnen hadde,

+ A vers 1

2

dese alle te samen bereyden hen ten strijde tegen die kinderen Israel, ende si quamen door die wterste des berchs totten toppe toe, die daer ouer Dothaim siet, vander plaetsen die daer heet Belma, tot Chelmon toe, die daer is teghen Esdrelon.

3

Doen die kinderen Israels haer groote menichte sagen, so vielen si plat neder ter aerden, ⁺ worpende asschen op haer hoofden, biddende eenmoedelijc, dat God Israel zijn bermherticheyt thoonen woude, ouer zijn volc.

+ B vers 3

4

Ende nemende tot hen haer oorloochs wapenen, saten si op die plaetsen, die daer stieren den pat des engen weechs, tusschen die geberchten, ende si bewaerdense alle den dach ende nacht.

5

Maer doen Holofernes die stadt omghinc, vant hi dat die fonteyne, die in haren waterganc vloeyde vanden zuyden deele, buyten der stadt haer rechtede, ende geboot haren waterganc af te snijden.

6

Daer waren nochtans fonteynen, niet verre vanden mueren, wt welcken si heymelijck schenen water te putten, meer om te lauen, dan om te drincken.

7

⁺Maer die kinderen Ammon ende Moab, ghingen tot Holofernem seggende. Die kinderen Israel en betrouwen noch in glauie, noch in geschutte, mer dye bergen bescermense, ende die houelen, die daer steyl zijn, die makense sterck

+ C vers 7

8

Hier om, op dat ghise sonder beloop des strijts mocht verwinnen, soo set bewaerders der fonteinen, dat si daer niet en mogen putten, ende ghi sultse so sonder sweert dooden, oft vermoeyt zijnde, sullen si haer stadt ouerleueren, die si meynen dat niet gewonnen en mach worden, inden berghen ghelegen zijnde.

9

Ende dese woorden behaechden Holoferni wel, ende alle sinen ruyteren, ende hi stelde daer hondert rontsom, om elcke fonteyne.

10

⁺Ende doen dese bewaringe .xx. daghen geduert had so gebraken die putten, ende die vergaderinge der wateren, allen den ghenen die te Betulia woonden, also datter niet inder stadt en was, daer si eenen dach af versaet mochten worden.

+ D vers 10

11

Want den volcke werdt dagelicx in een mate water ghegheuen.

12

Doen vergaderden tot Oziam, alle die mannen ende vrouwen, ende ionge kinderkens, ende seyden alle te samen met eender stemmen tot Oziam,

13

God oordeele tusschen ons ende v, want ghi hebt quade dingen tegen ons ghedaen, niet willende vredelijc spreken metten Assyriers,

14

ende daerom heeft ons God in haren handen vercocht, ende daerom en isser nyemant die ons verlost, als wy vernedert worden, voor haer oogen in dorste, ende grote verderffenisse.

15

Ende vergadert nv alle die int stadt zijn, dat wi ons willichlijck den volcke Holofernis ouer leueren.

16

Want het is ons beter, dat wi geuangen den HERE leuende gebenedien, dan wi steruende, zijn eenen lachtere allen vleesche, als wi onse huysurouwen ende onse ionge kinderen, voor onse oogen sien steruen,

17

Wi betuyghen heden hemel ende aerde, ende God onser vaderen, die ons straft na onse sonden,

18

dat ghi de stadt nv ouergheeft in die hant der ruyterschap Holofernis, op dat ons eynde cort si inder scerpte des sweerts dwelc langer wort in droocheyt des dorsts.

19

⁺Ende als si dit gheseyt hadden, soo isser een groote weeninge ende huylinge geschiet, van allen die gemeynte, ende si riepen een gantse vre lanc, met eender stemmen totten HERE, seggende.

+ E vers 19

20

Wi hebben met ons vaders ghesondicht, wi hebben onrechtueerdelic gedaen, wi hebben ongerechticheden gehandelt.

21

Ghi die goedertieren zijt, ontfermt onser, wreect ons ongherechticheden in v gheessel,

22

ende en wilt die ghene die v belijden niet ouerleueren, den volcke dat v niet en kent, op datse onder die heydenen niet en seggen. Waer is haer God?

[p. *]

23

Ende als si vermoeyt waren mits dit roepen, ende mits dese weeningen mat zijnde, geswegen hebben, so stont Ozias op begoten met tranen, ende seyde.

24

Sijt ghelijcx moets mijn broeders, ende laet ons dese vijf dagen ontfermherticheyt vanden HERE verwachten, hi sal misschien zijn verbolgentheyt afsnijden, ende sal sinen naem glorie gheuen.

25

Mer ist datter geen hulpe en coemt, als vijf dagen voorbi zijn, so sullen wi dese woorden doen, die welck, ghi ghesproken hebt.