Den Bybel met groter neersticheyt ghecorrigeert (Liesveltbijbel 1542)

Achior wort gheuanghen, ende den Iootschen volcke gheleuert den welcken Achior die ganssche ghelegentheyt vertelt, waer van tvolc beweghet sijnde tot Gode den Here om hulpe roepen.

Dat .vi. Capittel.

1

⁺HEt is geschiet doen si ophielden te spreken, dat Holofernes seer verbolghen wert, ende seyde tot Achior, Want ghy ons hebt gepropheteert seggende,

+ A vers 1

2

dat dat volc Israel van sinen God wert bescermt, op dat ic v toone datter geen God en is dan Nabuchodonosor,

3

als wise geslagen hebben als een mensche, dan suldi oock vergaen met hen, met der Assyrien swaert, ende alle Israel sal met v vergaen, metten doot,

4

ende dan sult ghi beuinden, dat Nabuchodonosor een heere si der geheelder aerden, Ende dan sal tsweert mijnder ruyterscap door v siden gaen, ende ghi sult doorsteken vallen onder die ghewonde Israels, ende ghi en sult niet weder versaemen, tot dat ghi met hen ghedoot wert.

5

Mer ist dat ghi meynt, dat v prophecie warachtich si? warom wert ghi dan bleeck? ende waerom zijt ghi verscrict? meynt ghi dat dese mijn woorden niet veruult en mogen werden?

6

Maer op dat ghi

[p. *]

weet, dat ghi dese dingen met hen tsamen sult onderuinden, siet, so suldi van deser vren, haren volcke toe gestelt werden, op dat, als si weerdige peyne, mijns swaerts ontfaen, ghi selue mede der wraken onderworpen zijt

7

⁺Doen gheboot Holofernes zijn knechten, dat si Achior souden vangen, ende hem leyden in Bethuliam, ende hem ouerleueren inde handen der kinderen Israhels.

+ B vers 7

8

Dye knechten Holofernis namen hem, ende zijn gereyst door die velden, mer doen si genaecten totten geberchten, so toghen teghen haer wt, die slinger werpers.

9

Mer si keerden af ter siden des berchs, ende bonden Achior handen ende voeten aen eenen boom, ende lieten hem also met zelen gebonden, ende keerden weder tot haren heere.

10

Mer die kinderen Israel daelden van Bethulia, ende quamen tot hem, den welcken si ontbonden, ende leyden hem tot Bethuliam, ende hem int middel des volcx stellende, vraechden si hem, wat dat ware, dat dye Assyriers hem ghebonden hadden ghelaten.

11

⁺In dien dage, waren daer die princen Ozias die sone Micha, vanden geslachte Simeons, Charmin die ooc Gothoniel hiet. Aldus seyde Achior int middele, in dat aensichte haerder allen, alle die dingen die hi ghesproken hadde van Holoferne geuraecht zijnde, ende hoe dat volc Holofernis hem om dat woort hadden willen dooden,

+ C vers 11

12

ende hoe Holofernes selue gram was, ende geboden hadde, datmen hem om dier saken wil, den Israheliten soude leueren, op dat, als hi die kinderen Israels verwonne, dat hi dan oock Achior selue met verscheyden pinen soude gebieden te verdoen, daerom dat hi geseyt had, God des hemels is haer beschermer

13

Ende doent Achior altemael vertelt hadde, so viel alle tvolc op sijn aensicht, den HERE aenbiddende, ende met eender ghemeynder clagen ende weeningen hebben si den HERE haer gebet wtgestort, seggende.

14

HERE God des hemels ende der aerden, aensiet haer hooueerdicheyt, ende aenscout ons nederheyt, ende aenmerct dat aensicht uwer heiligen, ende betoont dat ghi niet en verlaet die hen beroemen van v, ende vernedert die hen van hen seluen beroemen, ende van haer cracht glorieren.

15

Aldus doen dese weeninge was voleynt, ende dat gebet des volcx al den dach door veruult was, ⁺ so hebben si Achior getroost, seggende.

+ D vers 15

16

God onser vaderen, welcx cracht ghi vercondicht hebt, die selue vergelde v, dat ghi meer haer verderuinghe sult sien, dan der onser.

17

Ende als die HERE ons God zijn knechten dese vriheyt gheuen sal, so si God oock met v int middel van ons, op dat ghi alsoot v belieft, met allen den uwen met ons woont.

18

Ende doen Ozias den raet voleynt hadde, so ontfinc hi hem in sijn huys, ende maecte een groot auontmael. Ende hi riep alle de ouders te samen, na dat die vasten voleyndt was, zijn si vermaect,

19

ende daer na is al dat volc te samen geroepen, ende al den nacht baden si binnen der ghemeynten, begheerende hulpe van God Israel.