Den Bybel met groter neersticheyt ghecorrigeert (Liesveltbijbel 1542)

Tobias geeft sinen sone (doe hi meende dat den doot hem ware by) schoone leeringhen ende onderwijsinghen te leuen onstraffelick ende Godsalichlijc.

Dat .iiij. Capittel

1

ALdus doen Tobias meynde, dat sine gebet worde verhoort, dat hi soude moghen steruen, so riep hy Thobiam sinen soone tot hem ende seyde tot hem. Mijn sone hoort dye woorden mijns mondts, ende legtse in v herte, als een fundament.

2

Als God mijn siele tot hem neemt, so begraeft mijn lichaem, ⁺ ende hebt v moeder in eeren, alle die daghen haers leuens.

+ exo. xx c deu. v.f.

3

Ghi sult gedachtich wesen, welcke ende hoe groote periculen si in haren lichaem gheleden heeft om v, Ende als si den tijt haers leuens oock veruult heeft, so begraeftse bi my.

4

Hebt God alle die tijt ws leuens, in dijne ghedachte, ⁺ ende wacht v dat ghi der sonde niet tot eeniger tijt en consenteert, ⁺ ende niet achter en laet die geboden des HEREN ons Gods.

+ ro. vij.d

+ pro. iij b

5

⁺Doet aelmoessen wt uwen goede, ⁺ ende en wilt v aensicht niet afkeeren van eenighen armen. ⁺ Want also salt gheschieden dat het aensicht des HEREN van v niet en sal worden afgekeert. ⁺ Sijt ontfermhertich alsoo ghy vermoecht.

+ B vers 5

+ Lu. x.d.

+ mat. vi.c

+ ij.corint viij.g.

6

Hebt ghi vele, so gheeft oueruloedelic. ⁺ Hebt ghy weynich, so doet neersticheyt, dat weynich ooc gheerne mede te deylen,

+ Phi. iiij.b

7

want ghi vergadert v tot eenen schat, ⁺ een goet loon inden dage der noot, want die aelmoesse verlost van alle sonden, ende vander doot, ende si en sal die siele niet in dye duysternisse laten gaen. ⁺

+ ro. xij.e. act. iij.d

+ i.Thess. iiij.d.

8

Die aelmoesse sal een groot betrouwen zijn biden hoochsten God, allen den ghenen dyese doen,

9

Mijn soon wacht v van alle hoorderie, ende behalue v huysurouwe en lijdet nemmermeer eenige misdaet te weten

10

En latet die houaerdicheyt nemmermeer in dinen sin noch in dinen woorde heerscappie hebben Want in haer heeft alle verderffenisse begin genomen

[p. *]

11

⁺Die v yet ghewracht heeft dyen gheeft terstont sijn loon, ende dat loon dijns huerlings en bliue in gheender manieren bi v. ⁺

+ C vers 11

+ Leu xxv.b

12

Dat ghi hatet v van eenen anderen ghedaen te werdene, siet dat ghi dat niet eenen anderen te eeniger tijt en doet. ⁺

+ Deu. xiij e

13

Eedt v broot met den hongherighen, ⁺ ende met den behoeuenden, ende bedect den naecten van uwen cleederen.

+ Mat. vi b

14

Stelt v broot ende uwen wijn op dye begrauinghe des gherechten, ende en wilt daer niet wt eten ende drincken metten sondaers.

15

Soect altijt raet metten wijsen. Gebenedijt God altoos, ende heyscht van hem dat hi v wegen stuere, ende laet alle v raden in hem bliuen.

16

Mijn sone ic geue v ooc te kennen, dat ic heb gegeuen thien talenten siluers, doen ghy noch een cleyn kindeken waert. Gabelo in Rages der Meden stadt ende ick heb sijn hantscrift bi my.

17

Aldus ondersoeckt hoe ghi tot hem mocht comen, ende dat ghi van hem ontfanghen moecht, dat voorgenoemde ghewicht siluers, ende hem zijn hantscrift weder gheeft

18

Mijn sone en wilt niet vreesen het is wel waer, ⁺ wi leuen een arme leuen, ⁺ maer wi sullen vele goeden hebben, ist dat wi God vreesen, ende wi van alle sonden scheyden ende wel doen.

+ Ro. viij.c

+ Mat. v.d