Den Bybel met groter neersticheyt ghecorrigeert (Liesveltbijbel 1542)

Den tempel is volmaect. Van die wijdinghe des tempels, ende thoochtijt der soeter brooden.

Dat .vij. Capittel.

1

⁺DOen waren Sisennus onderconinck Celosyrie ende Phenicis, ende ander lantsheeren, ende hare gesellen gehoorsaem den dingen, die van Dario den coninck besloten waren,

+ A vers 1

2

ende waren aen die heylighe wercken neerstich, alder neerstelijcste mede werckende, metter Ioden ouders, ende princen Syrie,

3

ende die heylighe wercken sijn voorspoedich gheweest Als Haggeus ende Zacharias die propheten propheterende waren.

4

Ende si volbrachtent altemale, door datghebot des HEREN des Gods Israels, ende wt den raet Cyri ende Darij, ende Artaxerxis der Persen coninck.

5

Ende ons huys is voleynt totten drientwintichsten dage der maent Adar, inden sesten iaer des Conincx Darij.

6

Ende die kinderen Israel, ende die priesters, ende die Leuiten, ⁺ ende die ander die wt der geuanckenisse waren, die daer toe geset sijn, deden, na tghene, dat inden boecken Mosi gescreuen is.

+ B vers 6

7

Ende si offerden totter wijdingen des tempels des HEEREN, hondert stieren, twee hondert rammen, vierhondert lammeren,

8

ende .xij. gheyten, voor die sonden des geheelen Israels, na dat ghetal der geslachten Israels.

9

Ende die priesters ende die Leuiten, stonden gecleet met priesterlijc gewaet, bi geslachten, ouer die wercken des HEREN des Gods Israels, na dat boeck Mosi, ende die duerwachters, bi elcke dueren.

10

⁺Ende Israels kinderen, hielden dat Phase, met dien, dye wter gheuanckenisse waren, opten veertiensten dach der eerster maent, doen die priesters ende Leuiten gheheylicht waren.

+ C vers 10

11

Alle die kinderen der geuanckenissen, en sijn niet ghelijc gheheylicht, Want die Leuiten sijn te samen geheylicht.

12

Ende alle die kinderen der gheuanckenisse, offerden dat Phase haren broederen den priesteren, ende haer seluen.

13

Ende Israels kinderen, die wt der geuanckenisse waren, al die daer bleuen waren, ⁺ hebben gheten van al die verfuwingen der heydenen des lants, soeckende den HERE,

+ D vers 13

14

ende si vierden den hoochtijdeliken dach der soeter brooden, seuen daghen, weerschappende, in dat aenschouwen des HEREN,

15

want hy keerde den raet des conincx der Assyriers tot hen, om haer handen te stercken, totten wercke des HEREN Gods Israel.