Den Bybel met groter neersticheyt ghecorrigeert (Liesveltbijbel 1542)

¶ Door die lichamelike beloften leyt die propheet op die beloften die in Christo veruult sijn, Hy dreycht met die straffinghe den valschen propheten ende Herders.

Dat .x. Capittel

1

⁺DAeromme biddet nv vanden HERE spaden reghen, soo sal dye HEERE wolcken maken, ende v reghens ghenoech gheuen tot alle vruchten op dijnen velde,

+ A vers 1

2

Wandt die Godekens oft beelden spreken enckel moeyte, Ende die waersegghers sien enckel loghenen, ende si spreken ydel onnutte droomen, Ende haer troosten en is niets nyet. Waeromme si oock dolende gaen, ghelijc een cudde schapen, Ende si sijn versmacht, Wandt sy gheenen Herder en hebben.

3

Daerom is mijnen toorne op dye Herders vergramt, Ende ic wil die bocken besoecken, want dye HERE der heyrscaren sal sijn cudde des huys Iuda besoecken, Ende hi salse oprusten ende toe maken ghelijc een heerlijc ende chierlijc peert inden strijt,

4

Iae van Iuda sullen die hoecken, die nagels, dye strijtbogen ende alle quelleerders tsamen wech zijn,

5

ende si sullen noch-

[p. *]

tans sijn, gelijc die stercke mannen, die dat slijc opter straten inden strijt vertreden, Ende si sullen strijden Want die HERE sal met haer sijn, dat ooc alle reisegers sullen tot schanden comen.

6

Ick wil dat huys Iuda stercken, ende dat huys Iosephs helpen. Ende ick wilse weder insetten. Want si ontfermen mi, Ende si sullen sijn, gelijc si waren doen icse niet verstooten en hadde. ⁺ Want ic die HERE haer God wilse verhooren

+ B vers 6

7

ende Ephraim sal sijn als een Ruese, ende haer herte sal vrolijc worden, als vanden wijn. Iae haer kinderen sullent sien, ende haer verblijden. Haer herte sal inden HERE blijde sijn.

8

Ic wil tot haerlieden blasen, ende haer versamen ende verlossen, Ende si sullen haer vermeerderen, gelijc si haer voormaels vermeerdert hebben.

9

Ende ick wilse onder die volcken saeyen, dat si mijnder ooc gedencken in hare landen, Ende si sullen met haer kinderen leuen ende wedercomen,

10

Want ick wilse weder brengen wt Egypten landt, ende wilse versamen wt Assiria, ende wilse int landt Gilead, ende op den Libanon brengen. Ende aldaer en sal haer nyet gebreken.

11

Ende hi sal door dat meyr des ancxts ghaen, ende die baren der zee slaen. Also dat alle diepe wateren verdrooghen sullen, Dan sal de stoute opgeblasentheyt Assirie verootmoedicht worden. Ende dat scepter in Egipten sal ophouden.

12

Ick wilse stercken inden HERE, dat si in sinen name wandelen spreect die HERE.