Den Bybel met groter neersticheyt ghecorrigeert (Liesveltbijbel 1542)

¶ Blijde dinghen worden hier vercondicht, ende belooft van die roepinghe der Heydenen.

Dat .ix. Capittel

1

⁺DIt is den last daer die HERE af spreect ouer dat lant Hadrach, ende ouer Damascon, op welcke dattet hem verlaet, want die HERE siet op alle menschen, ende op alle stammen Israels,

+ A vers 1

2

daer toe ouer Hamach, die met haer paelt, ende ooc ouer Tyron ende Zidon, wandt si seer wijs sijn.

3

Tyrus sal haers selfs een veste tymmeren, Ende si scrabt siluer tsamen, ghelijck als stof ende zant, ende gout als slijck opter straten,

4

mer siet die HERE salse verderuen, ende hy sal hare macht diese op die zee heeft, vernielen, dat si sijn sal, als dye ghene die metten viere verbernt is.

5

Als dat Asklon sien sal, so sal hi veruaert sijn, ende Gaza sal seer beancxt worden, Daer toe Ekron sal bedroeft sijn, als si sulcx siet, Want het sal met den coninck tot Gasa gedaen sijn, ende tot Asklon en salmen niet meer woonen.

6

Ende tot Asdod sullen die vreemde woonen. Alsoo sal dye opgheblasentheyt der Philisteen wtgeroeyt worden.

7

Ende ick wil haer bloet van haren monde doen, ende haren grouwel van haren tanden, Op dat si oock onsen Gode ouerblijuen, ende worden gelijc princen in Iuda ende Ekron, als een Iebusite.

8

Ende ic wil mijn huys besetten met crijschuolck, dye daer wt ende in trec-ken, op dat gheen quelleerders haer voortaen meer en doorloopen, Want ic hebt nv aengesien met mijnen ooghen.

9

⁺Maer O ghi dochter Zion verblijt v seer, Ende O ghi dochter Hierusalem iuycht, Siet dijn coninc coemt tot dy, een gerechte, ende een hulper, Arm, ootmoedich ende slecht, Hy rijdet op een Ezellinne, ende op een ionck voolken der Ezellinne.

+ B vers 9

10

Ic wil die heyrwaghens Ephraim wtroeyen, metten peerden ende ruyters van Hierusalem. Ende die boghen dyemen inden crijch ghebruyct, sullen ghebroken worden, want hi sal vrede leeren onder die heydenen, ende sijn heerschappie sal sijn, van die een zee tot dye andere, Ende vanden wateruloet aen tot aen dye eynden der werelt toe.

11

Ghi laet oock door tverbont dijns bloets wt, dijne ganghen wt dye grauen, daer gheen water in en is.

12

Daeromme keert nv weder totter vesten, O ghy die in grooten hope ende verlangen gheuangen ligt, Want ick wilt v ooc huyden vercondighen, dat ickt v dubbel betalen sal,

13

Want ick hebbe Iuda gespannen ghelijc eenen boge, Ende Ephraim heb ic ghewapent. Ende ic wil dijne broeders Zion verwecken ouer dijne kinderen van Griecken landt, Ende ic wil v maken als een sweerdt eens Ruesen,

14

ende dye HERE sal ouer haer verschijnen, ende sijne pijlen sullen wt varen, ghelijck den blixem, ende dye HEERE god sal die basuyne blasen, Ende hy sal daer henen varen, ghelijck dat onweder wt dat Suyden,

15

Die HERE der heyrscharen salse beschermen, Sy sullent verteeren ende verslinden, ende haer met die slinger steenen onder haer brenghen, Sy sullen drincken, rasen ende roepen, als dye van wijn droncken sijn, Ende si sullen vol worden als die waterbeecken, ende ghelijc als die boecken des outaers,

16

Ende dye HEERE haer God, sal haer ter seluer tijt beschermen, als een cudde sijns volcx, Want in sinen lande sullen ghewijde steenen opgericht worden.

17

Och wat hebben si goets voor die andere? Ende wat hebben si al schoons bi die andere? Dat coorn sal die ionghelinghen, ende den most die ioncfrouwen op voeden.