Den Bybel met groter neersticheyt ghecorrigeert (Liesveltbijbel 1542)

¶ In dese openbaringhe wert bewesen dat God ouer die sonde des volcx vertoornt is, Want alle lasteringhen hebben dye ouerhant ghenomen. Ende die boosheyt regneert in die plaetse der duecht ende der gherechticheyt.

Dat .v. Capittel

1

⁺ICk hief mijn oogen weder op, ende sach, Ende siet daer was eenen vliegenden brief,

+ A vers 1

2

Ende hi seyde tot my, Wat sietstu? Ende ic seyde, Ic sie eenen vliegenden brief twintich ellen lanc, ende thien ellen breedt,

3

Ende hi sprack tot mi, Dit is die vlucht, die ouer die ganssche werelt wtgaet, Want alle dieuen sullen nae desen brief wtghesproken worden oprecht te sijn, Ende alle meyneedighe sullen ooc na dat inhoudt van desen brief wtghesproken worden gherecht te sijn,

4

Daerom wil ic desen brief voort brenghen seyt die HERE der heyrscharen dat hi den dieuen thuys come, ende den ghenen die bi mijnen name valschelic sweeren, ende in haren huyse blijue, datmen met sijn hout ende steenen verslinde.

5

⁺Ende die Enghel die met mi sprac, die ghinc wt ende seyde tot my. Heft dijn ooghen opwaerts, ende siet wat daer wt gaet.

+ B vers 5

6

Ende ick sprack? Wat ist? Ende hi seyde, Een Epha vaert wt. Ende hi seyde, Also gatet met allen die op dat ganssche aertrijck woonen.

7

Ende siet, daer dreef een pont loots, Ende daer was een wijf die sadt midden int Epha,

8

Ende hi sprac, Dat is die afgoderie, Ende hi worpse in dat Epha, ende den clomp loots worp hi daer bouen op.

9

Ende ick hief mijn ooghen op, ende sach, Ende siet, Twee wijuen voeren daer wt, ende si hadden vloghelen, die die wint voort dreef, Ende die vloghelen waren ghelijck als Oyuaers vloghelen, Die welc voerden dat Epha opwaerts, tusschen hemel ende aerde

10

Doen seyde ick totten Enghele, die met my sprack, Waer voeren dese dat Epha henen?

11

Hy antwoorde my, Int lant Sinear, op dat si hem aldaer een huys tymmeren, ende alst bereet is, datment aldaer op sine stede sette.