Den Bybel met groter neersticheyt ghecorrigeert (Liesveltbijbel 1542)

Hier beghint dye Propheet Haggai

¶ Hi vermaent dat volc tot tymmeragie des tempels, Ende hi straft haer langsaem vertrecken.

Dat .I. Capittel.

[afbeelding]

1

⁺INden anderen iaer des Conincx Darij, in dye seste maendt, opten eersten dach der maendt, ⁺ gheschiede dat woordt des HEEREN door den Prophete Haggai, tot SeruBabel den sone Sealthiel, den Prince in Iuda, ende tot Iuda, den sone Iozadak, den hooghen Priester, ende sprack,

+ A vers 1

+ i.Es. vi.

2

also spreect die HERE der heyrscharen ende seyt. Dit volc spreect Daer en sal niet af comen, datmen des HEEREN huys tymmere.

3

Ende des HEREN woort gheschiede door den propheete Haggai, ende seyde.

4

Vwen tijt is ghecomen, dat ghi in uwe beschotene ende ghewelfde huysen woont, ende dit huys moet woest blijuen staen.

5

⁺Daeromme spreect die HERE der heyrscharen alsoo.

+ B vers 5

6

Siet, hoe dattet v gaet, Ghi zaeyt veel, maer ghi brengt weynich in, Ghy eet, maer en wort niet versaeydt. Ghy drinct, mer ghi en verslaet uwen dorst niet, Ghi cleet v, nochtans en condt ghi v niet verwermen, Ende die loon verdient dye steket in eenen gebroken buydele

[p. *]

7

Alsoo seyt die HERE der heyrscharen. Aensiet hoe dattet v gaet,

8

Trect henen op dat gheberchte, ende haelt hout, ⁺ ende tymmert dat huys, dat sal my aenghename sijn. Ende ick wil mijn eere bewijsen, spreect die HERE,

+ i.cor. ij. ij.cor. vi

9

Want ghi wacht wel op vele, ende siet v wort weynich. Ende al brengt ghijt thuys, so blaes ick daer in ende verwaeyt. Waeromme dat? spreect dye HERE der heyrscharen. Daeromme dat mijn huys so verwoest leyt, ende een yeghelijck loopt na sinen huyse toe,

10

daeromme heeft den hemel v den dauwe, ende dat aertrijcke sijn vruchte onthouden.

11

Ick hebbe een droochte gheroepen, beyde ouer dat lant ende die berghen, ouer coren, most ende olye, Ia ouer alle ghene, dat wter aerden coemt, ooc ouer menschen ende beesten, ende ouer alderhanden arbeyt.

12

Doen nv SeruBabel die sone Sealthiel, ende Iesua, die sone Iozadak, die hooghe Priester, met alle dat ouerghebleuen volc des HEREN haers Gods stemme hoorden, ende die woorden des Propheten Haggai, hoe dat hem die HERE haer God ghesonden hadde, doen veruaerde hem dat volc voor den HERE

13

Doen sprac tot Haggai dye Enghel des HEREN die de bootschappe des HEEREN hadde aen dat volc, Ick ben met v seyt die HERE.

14

Also ^a verwecte die HERE den geest SeruBabels, des soons Sealthiel, des Princen in Iuda, ende den geest Iesua des soons Iozadac des hogen priesters, ende oock den gheest des gansschen ouerghebleuen volcx, dat si terstont ghinghen, ende arbeyden aen dat huys des HEREN der heyrscharen.

a God verwect der menscen geest als hy hen door sinen heylighen Gheest sterct, ende crachte van herten gheeft, om voor tgelooue die gherechticheydt te volbrenghen. Danie. xiij.c