Den Bybel met groter neersticheyt ghecorrigeert (Liesveltbijbel 1542)

¶ Hi straft die lasteringhe der booser stadt, Ende hi vercondicht haer hare straffinghe

Dat .iij. Capittel

1

⁺WEe der bloetghierigher stadt die van logenen ende roouerie vol steect, ende van haren roouen ende verschoren nyet aflaten en wil,

+ A vers 1

2

want aldaer hoortmen dye geesselen ende sweepen clappen, die raders ratelen dye peerden briesschen, ende die wagens rollen.

3

Hi brengt

[p. *]

ruyters heyr op met blinckende sweerden, ende met glinsterende spiesysers. Daer ligghen vele verslagene ende groote hoopen dooder lichamen, also dat der seluer gheen ghetal en is, Ia datmen ouer die doode lichamen vallen moet.

4

Ende dat al om der grooter hoererijen wille, der schoonder ende vriendelijcker hoeren, die oock met toouerije omgaet. Ende met haerder hoererije die heydenen, ende met haerder toouerijen landen ende luyden vercregen heeft.

5

⁺Siet, ic wil aen v, spreeckt die HERE der heyrscharen, Ick wil di dine cleet ouer dijn hooft opslaen ende wil die heydenen dijn blootheydt, ende den Conincrijcken dijn schamelheyt wijsen,

+ B vers 5

6

Ic wil v gansch grouwelijck maken, ende v schenden, ende v tot een gaepsel maken,

7

also dat alle die v sien, van v vlieden ende segghen sullen. O Niniue is verdestrueert. Wie wil medelijden met haer hebben? Waer sal ic dijnen vertrooster soecken?

8

Meenstu dat ghi beter sijt dan die grote stadt No die daer int water leyt, ⁺ ende rontomme water heeft Welcker mueren ende vesten die zee is?

+ No, dat is Alexandria.

9

Moorenlant ende Egipten is haer ontellicke macht. ⁺ Put ende Libia sijn dine hulpers,

+ Put is Africa

10

Nochtans heeftse verdreuen moeten worden, ende geuanghen wech trecken. Ende hare kinderen sijn op alle straten verslagen, ende om hare edelen wierpmen dat lot. Ende alle hare gheweldighe werden in ketenen ende banden geleyt

11

Also moetstu ooc droncken worden, v verbergen, ende hulpe ende bescerminge voor dijne vianden soecken.

12

Alle dijne vaste steden sijn gelijc vijgheboomen met ripe vijghen, die welcke so haest alsmense scout, ende ten monde brengt, so sijn si geten.

13

Siet dijn volck sal ghelijc vijgen in v worden. Ende die poorten dijns lants sullen dijnen vyanden gheopent worden, Ende dat vier sal dijne grendelen ende sluytboomen verteren

14

Daeromme schept ende put nv water, want ghi sult beleghert worden, sterct dine vesten, gaet in dat cley, ⁺ ende tredet dat leem, oft mortele, ende maeckt tijchelen, ende bact steenen,

+ C vers 14

15

Mer dat vier sal v verteren ende dat sweert dooden, Iae het sal v verslinden, ghelijck die coolsprengers. Het sal v oueruallen, ghelijck die sprinchanen.

16

Dijne cooplieden sijn meer gheweest dan sterren aenden hemel, maer nv sullen si haer wtbreeden, gelijc die coolspringers, ende vlieghen daer henen.

17

Dijnder heeren isser so vele, als sprinchanen ende dijnder hooftlieden, als der coolspringhers, dye haer alst cout is, aen die tuynen ende wanden hangen Mer so haest als die sonne opgaet, so scicken si haer wech, datmen niet geweten en can waer si geweest sijn, ende waer si blijuen

18

O du Coninck tot Assur dijne herders sullen slapen. Dijne stercken sullen stille sitten, Ende dijn volc sal op die berghen verstroyt worden, ende niemant en salse versamen.

19

Niemant en sal dijne schande beclaghen, noch hem om dijnder plaghen wille becommeren, Mer alle die sulcx van v hooren, dye sullen hare handen ouer v tsamen slaen. Wandt waer is yemant? dien ghi niedt sonder ophouden beschadicht ende gheplaecht en hebt?