Den Bybel met groter neersticheyt ghecorrigeert (Liesveltbijbel 1542)

¶ Hi ontworpt ende schildert ons die grouwelijcke straffinghen voor onsen oogen

Dat .ij. Capittel.

1

⁺DIe verderuer sal hier op teghen v optrecken, ende die veste belegheren, Maer Ia bernt die straten wel, wapent v op tbeste, ende sterckt v op dalder sterckste. Men sal v nochtans reyn aflesen, ende dine vaten verderuen,

+ A vers 1

2

Want die HERE sal Iacob dye victorie geuen, ghelijc hi Israhel die ouerhant gaf.

3

Die schilden sijnder stercken sijn root, Sijn crijschvolc is met purpur gecleedt, Sijn waghens lichten gelijc een vyer, als hi slaen wil. Haer spiessen gaen door malcanderen heyr.

4

Die wagens rollen op dye strate, ende ratelen op die blacke velden, Haer aensien is gelijc fackelen, Ende si varen onder malcanderen heyr gelijc eenen blixem

5

Mer hi sal op sine gheweldighe dencken nochtans sullen die selue vallen, in dien si wech willen Ende si sullen haesten tot die mueren, ende tot een beschudtsel, daer si vry sijn,

6

Mer die poorten aen dwater sullen nochtans gheopent worden, Ende des conincx palleys sal vergaen.

7

Die Coninginne sal gheuanghen wech gheuoert worden, Ende haer ioncfrouwen sullen suchten, gelijc die duyuen ende voor hare borsten slaen.

8

Wandt Niniue is ghelijck een watergracht, vol waters maer dat selue sal veruloeyen moeten. Staet, Staet (sullen si roepen) Maer nyemant en sal hem omkeeren

9

Daeromme rooft nv siluer, rooft gout, Want hier en is der schatten geen eynde. Ende dye menichte aller costeliker clenodien.

10

Mer nv moetse reyn afgelesen ende geplondert worden, ⁺ Also dat die herten moeten versaghen, ende die knien sloeteren, ende alle lendenen beuen, ende alle aensichten bleeck sien ghelijc eenen siepot.

+ B vers 10

11

Waer is nv die wooninghe der leeuwen? ende dye weyde der iongher leeuwen? daer die leeuwe ende dye leeuwinne metten ionghen leeuwen wandelen, ende datse nyemant en dorste veriagen?

12

Maer daer die leeuwe genoech roofde voor sine iongheren ende verworchde voor sijnder leeuwinnen, sijn holen vuldt hi met roof, ende sine wooninge met dien, dat hi verschoort heeft.

13

Siet, ic wil aen v, spreect die HEERE der heyrscharen. Dijne wagens wil ic aensteken, ende eenen roock maken. Dat sweert sal dijne ionghe leeuwen verslinden, Ende ick wil dijns roouens een eynde maken opter aerden, datmen dijnder boden stemme niet meer hooren en sal.