Den Bybel met groter neersticheyt ghecorrigeert (Liesveltbijbel 1542)

Een ander straffinghe ende berispinghe, Die lichamelicke offerhanden worden verstooten ende die gheestelijcke aenghenaem verthoont.

Dat .vi. Capittel.

1

⁺HOort doch wat de HEERE seit. Maket v op, ende berispt die bergen, dat die hueuelen sijn stemme hooren,

+ A vers 1

2

O ghy berghen hoort, hoe dat dye HEERE straffen sal. Ende ghi machtighe dye dat

[p. *]

fundament der aerden zijt. Want die HEERE wil zijn volc berispen, ende wil Israel straffen.

3

O mijn volck wat hebbe ic v ghedaen? Oft waer mede heb ic v hinderlijck gheweest? dat segt my.

4

Ick heb v doch wt den lande Egypti gheleyt, ende wt den diensthuyse verlost? ⁺ ende heb voor v heyr ghesonden Mosen, Aaron, ende MirIam?

+ exo. xv

5

O mijn volck weest doch ghedachtich, wat Balak dye Coninck Moab voorghenomen hadde, ende wat Bileam dye sone Beor hen antwoorde, van Sittim aen tot Gilgal toe, ⁺ Waer aen ghi mercken soudt, hoe die HEERE v alle goet bewesen heeft.

+ nu. xxi.

6

Waer mede sal ic den HEERE versoenen? Met neyghen voor den hooghen God? Sal ic hem met brantofferen ende iarighe calueren versoenen?

7

Meenstu, dat die HERE een behaghen heeft aen veel duysent rammen? oft aen olie? Ia al warender oock ontallike loopende stroomen vol van olien. Oft sal ick mijnen eerstgheboren soon voor mijn ouertredinghe gheuen? ende dye vruchte mijns lichaems voor dye sonden mijnder sielen?

8

⁺O mensche het is v vercondicht, wat goet si, ende wat dye HEERE van v eyscht, te weten, Goods woordt te onderhouden, die liefde te oeffenen, ende ootmoedich te zijn voor dijnen God.

+ B vers 8

9

Die stemme des HEEREN sal ouer dye stadt roepen, Maer wie dijnen name vreest, dyen salt gelucken. Hoort O ghi stammen, wat daer ghepredict wordt.

10

En soude ick niet gram zijn ouer dat onrecht goet inden huysen der godlosen, ende datmen die mate so cleen maeckt?

11

Ia soude ick die onrechte waghe dat valsche ghewichte inden Sickel voor gherecht houden?

12

door dye welcke uwe rijcken veel onrechts doen, ende uwe inwoonders gaen met logenen omme, ende hebben bedrieghelijcke tonghen in haren mont.

13

Ia daeromme wil ick oock v beghinnen te plagen ende v om dijnder sonden wille woest te maken.

14

Eten sult ghi, mer niedt versaet worden, ende versmachten, Ghi sult wel vlieden, mer nyedt ontulieden.

15

Ende so wat ontuliedt, dat wil ick metten sweerde verslaen Ghi sult saeyen, mer nyedt maeyen. Ghy sult olye perssen, ende nochtans gheen olye hebben, om v daer mede te saluen Most sult ghy perssen, maer ghy en sult gheenen wijn drincken,

16

Want ghy onderhoudt den godsdienst Amri, ende alle dye wercken des huys Ahabs, ende volget hare leeringhen na. Daeromme wil ick v tot eender woestijnen maken, ende dijne inwoonders, Ia datmense aen iuycten ende bespotten sal Ende ghi sult ooc tot schande comen.