Den Bybel met groter neersticheyt ghecorrigeert (Liesveltbijbel 1542)

¶ Van die toecoemst ende dat rijcke Christi, ende der cracht des Euangelijs, Mer dit alle onder bedecte woorden.

Dat .v. Capittel.

1

⁺ENde du Bethlehem Ephrata, du dye cleen bist, teghen den duysenden in Iuda, Wt v sal dye comen, dye in Israhel een HEERE si, welcx wtganc van beghinne, ende van eewicheyt heyr geweest is.

+ A vers 1

2

Binnen dier tijdt laet hijse plagen, totter tijt toe dat die ghene, die baren sal, gebaert hebbe, Dan sullen die ouerghebleuenen zijnder broederen weder comen totten kinderen Israhels.

3

Mer hi sal optreden, ende weyden inder cracht des HEREN, ende in victorie des naems des HEEREN zijns Gods, ende si sullen sonder sorghe woonen. Wandt hy sal ter seluer tijt heerlijck worden, so wijt als die werelt is.

4

Daer toe sullen wi oock vrede hebben voor die Assiriers, die nv in onsen landen gheuallen zijn, ende onse huysen vertreden hebben.

5

Want daer sullen ^a seuen herders ende acht Vorsten ouer haer verweckt worden, die dat landt Assur verderuen sullen metten sweerde, ende dat lant Nimrod met haren blooten wapenen.

a door dat ghetal .vij. ende acht, wordt verstaen, volmaecte ende geheele cracht om sulcx te doene.

6

Alsoo sullen wi van Assur beschermt ende verlost worden, die in ons landt comen is, ende onse lantpalen vertreden heeft.

7

Ende die ouergebleuene wt Iacob, sullen ooc onder vele volckeren zijn, ⁺ ghelijc als eenen dauwe vanden HERE, ende gelijc een dorppelken op dat gras, dwelcke nyemandt en mocht verhopen op te nemen ende te versamen.

+ B vers 7

8

Ia dye ouerghebleuene wt Iacob sullen onder die heydenen bi vele volckeren zijn, ghelijc een leeuwe byden dieren in die wildernisse, ende ghelijck een leeuwen welpen onder een cudde schapen, den welcken niemant ghekeeren en can, als hy daer door gaet, vertreedt, ende verschoordt

9

Want dijne handt sal die victorie behouden, teghen alle dijne tegenpartijders, Also dat alle dijne vyanden wtgheroeyt sullen worden.

10

Ter seluer tijt spreeckt dye HERE, wil ick dijne peerden van v wtroeyen, ende dine wagens verderuen

11

Ende wil die steden in dijnen lande ter neder werpen, ende alle dijne vesten ende welbewaerde steden afbreken,

12

Ende alle touerye bi dy wtroeyen, Also ooc dat geen Teekenbedieder meer bi v blijuen en sal.

13

Ick wil dijne Godekens ende beelden van di wtroeyen, also dat ghy nyedt meer aenbidden en sult dye wercken dijnre handen.

14

Dijne bosschen wil ick afhouwen, ende dine steden vernielen. Ende ick wil wrake oeffenen met toorne ende verbolgentheyt, aen alle heydenen, die nyedt en hebben willen hooren.