Den Bybel met groter neersticheyt ghecorrigeert (Liesveltbijbel 1542)

¶ God die HERE en straft niet, ten si dat hi eerst te voren ghewaerschout heeft, door sine Propheten, Waeromme soo wye die waerschouwinge niet ter herten en nemen, die worden met rechts gheplaecht

Dat .iij. Capittel.

1

⁺NV hoort O ghi kinderen Israhels, wat die HERE met v spreeckt, te weten, met alle gheslachten, die ic wt Egipten gebracht hebbe, ⁺ ende sprack also,

+ A vers 1

+ Deu. iiij.

2

wt alle die gheslachten oft natien op aertrijcke, heb ic v alleen wtgelesen, daeromme wil ic v ooc besoecken in alle uwe misdaden.

3

Mogen daer ooc twee tsamen wandelen, ten si dat sijs te voren met malcanderen eens zijn? ⁺

+ Deu. v.

4

Brult ooc eenen leeuwe in een wout ten si dat hi eenen roof heeft. Crijscht ooc een ionge leeuwen welp wt sinen hole, ten si dat hi wat hebbe geuangen?

5

Valt ooc eenen vogel inden strick opter aer-den daer gheenen vogelaer en is? Oft heftmen oock eenen strick vander aerden? alsmen niet gheuangen en heeft?

6

Blaestmen ooc in eender stadt met die trompette een Alarme, ende dattet volc hem daer niedt af en verscrict? Isser ooc ergens een ongheluck in eender stadt, dat die HERE God niet en doet,

7

Want die HERE God en doet gheen dinc, ten si dat hijt eerst sinen knechten den Propheten gheopenbaert hebbe.

8

Als eenen leeuwe brullet, wie isser doch die niet versaecht en is? Die HERE God spreect, wye en soude niet propheteren oft prediken

9

Vercondiget inden palleysen tot Asdod, ende in die palleysen inden lande Egipti, ende segt versaemt v op dat geberchte Samarie, ⁺ ende siet wat groter onrecht gewelt, ende moort gescrey dat daer is.

+ B vers 9

10

Si en achten op geen recht seyt die HERE, Mer violentie, ende scade te doen, die gaen doen ouer dandere in haren huysen omme.

11

Daeromme spreeckt die HERE, Men sal dit lant rontomme belegeren, ende v van dijnder macht hier onder stooten, ende dijne paleysen plonderen

12

Also spreect die HERE. Gelijc als een herder den leeuwe twee beenderen, oft een lapken van eenen oore, wt den muyle schoort, Also sullen dye kinderen Israels, ooc wtgheruct worden, die in Samaria woonen ende hebben in die hoecken een bedde. Ende tot Damasco een coetse.

13

Hoort, ende betuyget inden huyse Iacobs spreeckt die HERE God, een God der heyrscharen.

14

Dan ter tijt, als ick dye sonden Israels besoecken sal. So wil ick oock dye outaers tot BethEl versoecken. Ende dye hoornen des outaers afbreken, alsoo dat si ter aerden neder vallen sullen.

15

Ende ick wil beyde dat winterhuys ende dat somerhuys, terneder slaen. Ende die yuoren huysen sullen verghaen, Iae alle huysen seyt dye HERE sullen verderft worden.