Den Bybel met groter neersticheyt ghecorrigeert (Liesveltbijbel 1542)

¶ Hi verwijt Iuda ende Israhel hare schalcheyt. Ende vercondicht haer hare straffinge

Dat .ij. Capittel

1

⁺ALso spreeckt die HERE om drie ende vier lasteringhen wille Iuda, en wil ic sijnder niedt sparen, daerom dat si de wet des HEREN verachten, ⁺ ende sine rechten niedt en houden, Ende laten haer hare logenen verleyden. Welcke haer vooruaders na gheuolcht hebben,

+ A vers 1

+ Mat. i.

2

Mer ic wil een vier in Iuda seynden dat sal die palleysen tot Hierusalem verslinden

3

Also spreect die HERE om drie ende vier sonden wille Israels, en wil ic haerder niet sparen, daerom dat si die vonnissen om gelt, ende den armen om schoen vercoopen. Si gaen met voeten ouer die armen, ende hinderen die ellendige op alle plaetsen.

4

Die vader ende soon gaen tot eender deernen, op dat si mijnen naem ontheylighen souden.

5

Ende bi alle outaren ^a brassen si van die verpande cleederen, Ende drincken den wijn inden huysen haerder Goden, vanden bruecken die welcke si met listicheyt ende ghewelt afghedrongen hebben.

a Brassen van dye. etc. dat is, vreemden Goodsdienst ordineren ende insetten om des ongoddelicx ende leelicx gewints wille, tegen die ordonnantie Gods

6

Nv heb ic emmer den Amorite voor haer henen wtgheroeyt, die hooch was als die Cederboom. Ende sine macht also sterc als een eycke. Nochtans heb ic sine vruchten daer bouen af, ende sine wortelen van onder wtgeroeyt

7

Ooc hebbe ic v wt Egipten ghebracht ende veertich iaer door die woestijne gheleyt, op dat ghi des Amoriten lant besitten soudt.

8

Ende ick hebbe wt uwe kinderen Propheten op verweckt, ende Nazareen wt uwe ionghelinghen, O ghi kinderen Israels, ist niet alsoo spreeckt die HERE.

9

Maer ghi hebt den Nazareen wijn te drincken ghegeuen ende den Propheten beuolen ende geseyt. En propheteert ons niet

10

Siet, ic wil v ooc also doen kirren, gelijc eenen waghen kirret, die vol schoouen oft gerwen is,

11

Alsoe dat die gene die snel is, niet ontulieden, noch die sterc is, yet vermogen en sal. Ende die Ruese en sal zijn leuen niet beschermen connen.

12

Ende die boge scutters en sullen niet blijuen staen. Ende die gerasch te voet is, die en sal niet ontloopen mogen. Ende dye te peerde rijdet die en sal sijn leuen niet connen bescermen.

13

Ende die onder die stercken manlic is, die en sal dan nauwelijcken naect ontulieden connen, op die tijt spreect die HERE.