Den Bybel met groter neersticheyt ghecorrigeert (Liesveltbijbel 1542)

¶ Die openbaringhe ende prophecie van die tseuentich weken welcke haer op die verlossinghe des volckx strecken, ende op die verlossinghe die door Christum ghescheit is.

Dat .ix. Capittel.

1

⁺INden eersten iare Darios, des soons Ahasueros, die wt der Meden stamme was, die ouer der Chaldeen Conincrijc een coninc gheset wert,

+ A vers 1

2

Iae inden seluen eersten Iare zijns Conincrijcx begeerde ic Daniel, dat getal der iaren te verstaen wt die boecken, daer van die HERE gesproken hadde totten prophete Hieremiam, Dat Hierusalem soude tseuentich iaer woest liggen

3

ende ic keerde mi tot God den HERE te bidden ende te smeecken met vasten, in sacken, ende inder asschen,

4

Ende ick badt tot den HERE mijnen God ende biechte ende sprack. ⁺

† Ach lieue HEERE ghi groote ende verschrickelijcke God, ghi dye dat verbont ende bermherticheyt houdt, den ghenen die v liefhebben, ende dijne gheboden houden,

+ Hiere. xxix.

5

Wy hebben ghesondicht, Wy hebben onrecht gedaen, Wy zijn godlose geweest, ende afgeuallen Wy zijn van dijne geboden ende rechten geweken,

6

Wy en hebben nyet gehoort na die Propheten dijnen knechten welcke in dijnen name onsen Coningen, Princen, Vooruaders, ende alle den volcke inden lande predicten

7

O HEERE dye gherechticheydt hoort v toe, ende ons en behoort nyet toe, dan openbaerlijcke schande ghelijck alst ooc nv huyden sdaechs gaet den inwoonders Iuda ende Ierusalem, ende den gansscen Israel, si zijn na by oft verre, in alle landen, derwaerts ghy ons verstooten hebt, om haerder misdaden wille, dye si aen v bedreuen hebben.

8

Ia O HEERE, Wy, onse Coninghen, onse princen, ende onse Vooruaders, moeten ons scamen, dat wi ons aen v besondicht hebben,

9

Maer O HERE onse God, dijn is die barmherticheyt ende vergeuinge

10

Want wi zijn afuallich geworden, ende en zijn nyet gehoorsaem geweest der stemme des HEREN ons Gods, ⁺ dat wi gewandelt hadden in sine geboden Dye welcke hi ons door dye propheten sine knechten voor gheleyt heeft,

+ B vers 10

11

Maer dat ganssche Israel heeft uwe gesetten ouertreden, ende is afgeweken, om dat si zijnre stemmen niet gehoorsaem en zijn gheweest. *

Van daer henen comet ooc, dat ons die vermaledidin- ende den eedt dye ghescreuen staedt inder wedt Mosi des knechts Gods, op ons reyct, om dat wi ons aen hem besondicht hebben.

12

Ende hy heeft sine woorden gehouden, die hi gesproken heeft tegen ons, ende onse rechters die ons dat recht wt spreken souden, dat hi sulcken groote ongheluc ouer ons heeft laten gaen, dat dyes gelijcx noyt onder den gansschen hemel geschiet en is, gelijck ouer Hierusalem gheschiet is.

13

Gelijc alst gescreuen staet in die wet Mosi, alsoo is alle dit groot ongeluc ouer ons gecomen, Nochtans en hebben wi voor den HERE onsen God niet gebeden dat wi ons vanden sonden bekeert hadden, ende dijn waerheyt hadden mogen vernemen.

14

Daeromme en heeft die HERE ooc niet vertoeft met dit ongeluc, ende heuet ouer ons laten gaen Want die HERE onse God is gerecht, in alle sine wercken die hi doet, Want si en hebben zijnder stemmen niet gehoorsaem geweest.

15

⁺† Ende nv O HERE onse God, ghi die v volc wt Egipten geleyt hebt, met een stercke hant, Ende ghi hebt v eenen name gemaect die noch heden des daechs blijft Wi hebben gesondicht, ende zijn leyder godloos geweest

+ C vers 15

16

Ach HERE, om alle dijns gerechticheits wille, laedt af van dijnder gramscappen ende verbolgentheyt, van dijnder stadt Hierusalem, ende dijnen heylighen berch, Want om onser sonden, ende onser Vooruaders misdaden wille: is Hierusalem ende v volc van allen rontom ons liggende versmaet.

17

Ende nv O onse God, hoordt dat ghebet dijns knechts, ende sijn smeecken, Ach laet doch, om dijns selfs wille, dijn aensicht ouer dijn Heylichdom schijnen dat daer verwoest is,

18

O HERE, neycht dijne ooren mijn Godt, ende hoort, Doet dijne oogen op, ende siet, hoe dat wi verwoest zijn, ende ooc dye stadt dye na dijnen name genoemt is, in die welcke dijnen name aengeroepen is, Want wy en liggen niet voor v met ons gebet op onse gerechticheyt, Mer alleen, op dijne groote bermherticheit.

19

Ach HERE hoort, Ach HERE weest doch genadich, O HERE aenmerct ende doeget, Ende en vertrect niet, om dijns selfs wille, O mijn Godt Want dijn stat ende dijn volck is na dijnen name genoemt.

20

Als ic noch also sprack ende badt, ende ick mijne, ende mijns volckx Israhel sonden bekende, ende lach met mijn ghebet voor den HEERE mijnen Godt, om des heyligen berchs wille mijns Gods,

21

Effen doen ic noch also in mijn gebet sprac, so vlooch herwaerts tot my den man Gabriel, welcken ic te voren ghesien hadde inden ghesichte, Ende hy taste mi aen omtrent den tijt des auonts offers,

22

Ende hy onderwees my ende sprac met my, ende seyde, O Daniel nv ben ick wt ghesonden v te onderwijsen,

23

Want soo haest als ghy beghonst te bidden, so ginc dit beuel wt, Ende daeromme come ic, dat ict v vercondigen soude, Wandt ghi zijt lief ende weerdt, Hyeromme soo merct nv daer op dat ghi dit gesicht verstaen moget

24

⁺Tseuentich weken zijn geoordineert ouer dijn volc, ende ouer dijn heylige stadt, So sal dan die ouertredinge gekeert, ende die sonde bedect worden, Ende die misdaet versoent, ende die eewige gerechticheyt gebracht worden, ende die visioenen ende prophetien toe gesegelt (oft toeghesloten) Ende die alderhoochste gesalft worden. ⁺

+ D vers 24

+ he. ix. x. Hag. I.

25

Daeromme weet nv, ende merct, dat van die tijt aen, als dat beuel wtgaet, dat Hierusalem wederomme sal getimmert worden, tot op Christum oft gesalfden Prince, dat zijn seuen weken ende .lxij. weken, Ende also sullen die straten ende mueren ghetymmert worden, maer met harder ende commerliker tijt,

26

Ende na die tweentsestich weken sal Christus (oft Messiach) ghedoot worden, Ende si en sullen zijnder niet willen.

Ende dan sal een volc met den Prince comen, dye stat, ende dat Heylichdom verdestrueren. Ende zijn eynde sal comen als een wateruloet, Ende nae dien strijdt salt woest blijuen.

27

Ende hi sal met velen een sterc verbont maken een weke lanck. Ende als dan die weke recht half wech is, dan sal dat offer ende spijsoffer ophouden, Ende by den Vlogelen sullen staen grouwelen der verwoestinghen, Ende het is besloten dattet totten eynde toe woeste blijuen sal.