Den Bybel met groter neersticheyt ghecorrigeert (Liesveltbijbel 1542)

¶ Aenghesien dat dat Iootsche volc in alderley boosheyt ende lachteringe besmet ende beschaemt worden is, So ghebruyct dye propheet ooc een scandelijcke ende onreyne, gelijckenisse om haer te straffen

Dat .xxiij. Capittel

1

⁺ENde des HEREN woort ghesciede tot mi, ende sprack.

+ A vers 1

2

Du menschen kindt, Daer waren twee wijuen, die hadden een moeder,

3

die begonsten van haerder ioncheyt aen hoererie te bedrijuen in Egypten, Aldaer lieten si haer borsten handelen, ende haer tepelkens in haerder ioncheit tasten,

4

De grootste ende outste hiet Ahala, ende haer suster Ahaliba, Ende ick namse te houwelic, ende si baerden mi sonen ende dochteren

5

Ende Ahala heet Samaria, Ende Ahaliba Ierusalem. Ahala bedreef hoererie doen icse genomen hadde, Ende si bernde tegen haer boelen, te weten, tegen de Assiriers die tot haer quamen,

6

tegen die Princen ende Heeren, dye met siden ende costelic gewaet gecleet waren, ende alle ionge lieflicke gesellen, te weten, die op peerden ende wagens daer henen rijden,

7

ende si boeleert met alle schoone ende ionge gesellen in Assiria, ende si veronreynicht haer met alle haer Beelden, so waer dat si op eenen verualt.

8

Daer en bouen so en verliet si ooc niet hare hoererie metten Egyptenaers, Die met haer geboeleert hadden in haerder ioncheyt, ende haer borsten ghetast in haerder iuecht, ende grote hoererije met haer bedreuen hadden.

9

Doen gaf icse ouer in die handen haerder boelenden kinderen Assur, tegen den welcken si bernde van luste.

10

Die ontdecten haer schamelheyt, ende namen haer sonen ende dochteren wech, ende si doodense metten sweerde, Ende het quam wt, also dat dese wijuen gestraft waren.

11

Maer doen Ahaliba haer suster dat sach So ontstac si noch veel ontsinniger dan die gene, ⁺ ende bedreef der hoererijen noch meer dan haer suster,

+ B vers 11

12

ende si bernde tegen die kinderen Assur, te weten, tegen die Princen ende heeren die tot haer quamen in costelijc gewaet, ruyters ende wagens, ende alle ionge lieflicke gesellen,

13

Doen sach ic dat si alle beyde gelijckerwijs ontsuyuert waren, Maer dese bedreef haer hoererije noch meer,

14

Want doen si sach gescilderde mannen aender want, met rooder verwen ende figueren der Caldeen, om hare lendenen gegort sijnde,

15

ende bouen scerpe hoeden oft huyuen op hare hoofden, ende al wat den geweldigen ghelijc sach (gelijc als die kinderen Babel ende die Chaldeen dragen in hare landen)

16

So bernde ende ontstac si teghen haer, so haest als si haerder ghewaer wert, ende so seynden si Ambassaten tot haer in Chaldeen lant.

17

Ende als nv die Babiloonsche ionghelinghen tot haer quamen, om bi haer te slapen, so wert si door dye selue ontreynicht in haerder hoererije, ende wert so veronreynicht dat si moede werdt,

18

Ende doen beyde haer hoererije ende schamelheyt so gheheel openbaer wert, So wert ic haerder moede, gelijc als ic haerder suster ooc moede was,

19

mer si bedreuen hare hoererije altijt meer ende meer, ende ghedacht op die tijdt haerder ioncheyt, doen si in Egypten lant hoererije bedreuen hadde,

20

ende si bernde weder tegen haer boelen, welcker brant was gelijc des ezels ende des henxtsts,

21

Ende ghi bedreeft dijn oneerbaerheyt, als in dijnder iuechden, doen v uwe boelen in Egypten uwe borsten handelden, ende uwe tepelkens tasten.

22

Daeromme o Ahaliba, also spreect die HERE God, ⁺ Siet, ic wil dijne boelen, der welcker du moede bist geworden, tegen v verwecken, ende ic wilse rontomme tegen v brengen,

+ C vers 22

23

te weten, die kinderen van Babel, ende alle Chaldeen, metten Hooftlieden, Princen, ende Heeren, ende alle die Assyriers met haer, Die schoone ionghe ghesellen, alle Vorsten ende Heeren, Ridders ende edelinghen, ende alderley ruyters,

24

Ende si sullen ouer comen met een reysegers heyr, ende met grote hoopen volcx Ende si sullen v beleggen, met spiessen, schilden, ende helmen rontomme. Den seluen wil ic dat recht beuelen, dat si v oordeelen sullen na hare rechten.

25

Ic wil mijn zeloersce ernstige liefde ouer v laten gaen, also dat si sonder ontfermherticheit met v om gaen sullen, Si sullen v die nuesen ende ooren af snijden, Ende so wat daer ouerblijft dat sal door tsweert vallen,

26

Si sullen dijne sonen ende dochteren wech nemen, ende datter ouerblijft dat sal metten viere verbernen, Si sullen dy dijne cleederen wt trecken, ende dijne costelijcke cleynodien met haer wech nemen,

27

Also wil ic dijnder oneerbaerheyt, ende dijnder hoererije in Egypten lant een eynde maken, also ooc dat ghi uwe oogen niet meer na haer opheffen, ende Egipten niet meer gedencken en sult

28

⁺Want als spreect die HERE God. Siet, ic wil v leueren den ghenen dien ghi vyant geworden, ende welcker du moede bist,

+ D vers 28

29

Die sullen als vyanden met v omme gaen, ende alle tsamen nemen, so wat ghi verworuen hadt ende v naect ende bloot laten, also dat dijne scamelheyt ontdect worde, met dijnder oneerbaerheyt ende hoererije.

30

Alsulcx sal v geschieden, om uwer hoererijen wille die ghi metten heydenen bedreuen hebt, aen welcker Goykens, ende beelden ghi v besmet hebtste,

31

Ghi sijt opten wege dijnder susteren gegaen. Daeromme geue

[p. *]

ick v oock der seluer beker in uwe hant.

32

Also spreeckt die HERE God. Du moest den beker dijnder susteren drincken, hoe diep ende hoe wijdt dat hy ooc is. Du sulst tot also grooten spot ende gheckernie worden, dattet onlijdelijck zijn sal,

33

Ghy moet v van dien stercken dranc ende iammer vol suypen, Want den beker dijnder suster Samarie, dat is eenen beker des iammers ende droeffenissen,

34

Den seluen moetstu reyn wt drincken, ende daer na dye scheruers ooc daer toe werpen, ende op eten, ende dijne borsten verschoren, Want ick hebt ghesproken, seyt dye HERE God.

35

Daeromme spreect dye HERE God, om dat ghy mijnder vergeten, ende my te rugghe gheworpen hebt Daeromme draecht oock nv dijne oneerbaerheyt ende dijne hoererije.

36

Ende die HERE sprac tot mi, Du menschen kint, wilt ghi Ahala ende Ahaliba straffen? soo bewijst haer hare grouwelen,

37

hoe dat si ouerspel bedreuen ende bloet ghestort, ⁺ ende met den beelden oft Goykens dat houwelijck ghebroken hebben. Daer toe ooc hare kinderen, die si gebaert hadden, verbernden si den seluen tot eenen offer.

+ E vers 37

38

Bouen dat so hebben si mi dat ghedaen, Si hebben mijn Heylichdom altemael ontreynicht, ende mijnen Sabbath ontheylicht ende ontwijdt.

39

Want doen si hare kinderen den Godekens ende Beelden ghedoot hadden, so ghinghen si noch des seluen daechs in mijn Heylichdom, op dat zijt ontheylighen souden, Siet sulcx hebben si aen mijnen huyse bedreuen.

40

Sy hebben ooc legaten ende boden na luyden wt ghesonden, dye wt verren landen comen souden. Ende siet doen si quamen, so baydet ghi v, ende blanckettede v palleerde ende verchierde v opt alder faeytste met dijnen clenodien, haer luyden ter eeren,

41

Ende ghy saet op een heerlijc bedde, voor den welcken stondt een tafele toeghemaeckt, op den welcken wieroocte ghi ende offerde mijnen olye,

42

Aldaer verhief hem een groot gheroep van genoechten, Ende si gauen den luyden dye ouer al wt vele volckx, ende wt der woestijnen ghecomen waren, dat armen cyraet aen hare handen, ende scoon croonen setten si op hare hoofden.

43

Doen gedachte ic, Sy is des ouerspeels gewoone van oudts herwaerts, ⁺ Si en can die hoererije niet gelaten.

+ F vers 43

44

Want met gaet tot haer in ghelijck alsmen tot eender hoeren plach in te gaen, Effen also ghaetmen tot Ahala ende Ahaliba, den oneerbaren wijuen.

45

Daeromme sullen haer dye mannen straffen, die dat recht volbrenghen ghelijc alsmen dye ouerspeelderssen, bloet stortersten te straffen behoordt, Want si zijn ouerspeelderssen, ende hare handen zijn vol bloets.

46

Also spreect die HERE God, Brengt eenen grooten hoop volckx herwaerts op haer, ende gheeftse om gheplondert ende berooft te worden, ende inden handen der gheenre diese steenighen, ende met hare sweerden doorsteken, ende hare sonen ende dochteren vermoorden, ende hare huysen metten viere verbernen,

47

Also wil ick der oneerbaerheyt inden lande een eynde maken, dat alle wijuen haer daer aen spieghelen sullen, ende na sulcker oneerbaerheyt niet doen. Ende men sal uwe oneerbaerheydt op v legghen, Ende ghy sult uwer Goykens sonden dragen, ende betalen moeten, op dat ghi weet dat ic die HERE God ben.