Den Bybel met groter neersticheyt ghecorrigeert (Liesveltbijbel 1542)

¶ Hier wort bewesen wat straffinghe ouer dat volck comen sal.

Dat .vij. Capttel.

1

⁺ENde des HEREN woort gheschiede tot my, ende sprac.

+ A vers 1

2

Du menscen kint, Also spreect die HERE God, vanden lande Israels.

3

Dat eynde coemt, Dat eynde ouer alle die vier hoecken des aertrijcx. Nv coemt dat eynde ouer v, Want ic wil mijnen toorne ouer v seynden, ende ic wil v ordeelen ghelijc ghi verdient hebt, ende wil v gheuen al dat uwen grouwelen toebehoort,

4

Mijn ooghe en sal v niedt sparen, noch voorby gaen, Mer ic wil v gheuen ghelijc ghi verdient hebt, ende dijne grouwelen sullen onder v comen, dat ghijt beuinden sult dat ic die HERE si

Also spreeckt die HERE der heyrscharen,

5

Siet, dat een ongheluck coemt ouer dandere,

6

Dat eynde coemt, iae dat eynde coemt, Het ouerualt v.

7

Siet, het coemt, het gaet schoon op, ende het breect voorwaerts ouer v, ghi inwoonders des lants. Dye tijt coemt, den dach des iammers is na bi, datter geen singen opten bergen sijn en sal.

8

Nv wil ic haest mijnen thoor-ne ouer v wtscudden, ende mijn gramscappe aen v voleynden, ende ic wil v oordeelen, gelijc ghi verdient hebt, ende v gheuen, al wat dijnen grouwelen toebehoort

9

Mijn ooghe en sal v niet sparen, noch ouertreden, Maer ic wil v gheuen gelijc ghi verdient hebt, Ende dijne grouwelen sullen onder v comen, dat ghi beuinden sult, dat ic die HERE ben, die v slaet.

10

Siet, den dach, Siet, hi coemt daer, hi breect in, Dye roede bloeyt, ende die stoute groeyt

11

Die tyranne heeft hem op gemaect, om wt te roeyen ouer die godlosen, also dat niemant van haer, noch van haren volcke, noch van haren hoope, troost hebben en sal.

12

Daeromme comt die tijt, Den dach coemt na bi, Die cooper en verblijde hem niet, ende die vercooper en truere niet, Want den toorne coemt ouer alle hare rijcdommen.

13

Daeromme en sal die vercooper na sijn vercoft goet niet weder dencken, Want die daer leeft, die salt hebben, Want dye prekinge van alle haer rijckdommen, en sal nyet te rugge keeren ⁺ Daeromme en laet hem nyemant in sijnder misdaet verharden door sijn goet

+ B vers 13

14

Laetse nv die basuyne blasen, ende alle dinc ter wapeninghe bereyden. Daer en sal doch nyemant inden crijch trecken, Want mijn gramschappe gaet ouer alle haer volc, Op die straten gaet dat sweert, Inden huysen gaet pestilencie ende honger,

15

So wie opten velde is die sal vanden sweerde steruen, Maer die inder stat is dien sal die pestilentie ende den honger verslinden. Ende soo wie onder haer ontulieden, die moeten opten geberchten sijn,

16

Ende gelijc als die duyuen inden dalen dye alle te samen onder malcanderen knorren, een yegelijc om sijnder misdaet wille.

17

Alle handen sullen neder sincken ende alle knien sullen soo onseker staen, als dat water

18

Ende si sullen sacken om haer gorden, ende met vreese ouergoten worden, ende alle aensichten sullen iammerlijcken sien, ende alle hoofden sullen kale sijn

19

Si sullen haer siluer henen op die straet werpen, ende haer gout, als eenen dreck achten, Want haer siluer ende gout en salse niet verlossen inden dage des thoorns des HEREN, ende en sullen hare sielen daer af niet versaden, noch haren buyc daer van vullen, Want het is haer gheweest een ergernisse tot haerder misdaet.

20

Si hebben van haren edelen cleynodien daer mede si houaerdije bedreuen, beelden haerder grouwelen, ende schouselen gemaect,

21

daeromme wil ict haer tot eenen drec maken, ende ic wilt den vreemden in die handen gheuen, dat sijt roouen, ende den godlosen opter aerden, tot eender buete, dat sijt ontheyligen sullen.

22

Ick wil mijn aensicht daer af keeren, om dat si mijnen schat ymmer wel ontheyligen (oft ontwijen) Iae die roouers sullen daer ouer comen, ende sullent ontheylighen, oft ontwijen

23

Maeckt eenen tuyn om haer, want dat lant is vol bloetsculden, ende die stadt vol violentie.

24

Daeromme wil ic die archste onder die heydenen laten comen, ⁺ dat si hare huysen in sullen nemen. Ende ick wil die houeerdije der geweldiger een eynde maken, ende hare kercken ontheylighen.

+ C vers 24

25

Die wtroeyer coemt, Dan sullen si vrede soecken, ende daer en sal geen sijn,

26

Dat een ongeual sal ouer dandere comen, Dat een geruchte ouer dander, Daeromme sullen si dan een ghesichte biden prophete soecken, Maer daer en sal noch wet biden priesters noch raet biden ouden ende raetsheeren meer sijn.

27

Dye coninc sal bedroeft sijn, ende die vorsten sullen met roucleederen ghecleedt sijn, ende die handen des volcx inden lande sullen versaecht sijn, Ick wille met hen omgaen, alsoo si gheleeft hebben, Ende ick wilse oordeelen, nae dat si verdient hebben, dat si beuin-

[p. *]

den sullen dat ick die HERE si.