Den Bybel met groter neersticheyt ghecorrigeert (Liesveltbijbel 1542)

¶ Een prophetie ouer dat geberchte Israels, van dat toecomende quaet dat ouer haer comen sal

Dat .vi. Capittel.

1

⁺ENde des HEREN woort gheschiede tot mi, ende sprack.

+ A vers 1

2

Du menschen soon, Keert dijn aensichte tegen die bergen Israels, Ende predict teghen haer,

3

ende segt, Ghi berghen Israhels hoort dat woort des HEREN der heyrscharen, Alsoe spreect die HERE der heyrscharen, beyde totten bergen ende

[p. *]

totten houelen, tsamen totten beken, ende tot die dalen,

4

Siet, ic wil dat sweert ouer v brengen, ende uwe Hoochten te niet brengen, also dat uwe outaers verwoest ende uwe goykens in stucken gebroken sullen worden,

5

ende ic wil uwe lichamen voor uwe beelden laten verslaen Ia ic wil die lichamen der kinderen Israels voor uwe beelden verdoen, ende ic wil uwe ghebeenten rontsomme uwe outaers stroyen,

6

So waer ghi woont, daer sullen die steden woest, ende die Hoochten tot eender eenlijcker plaetsen worden, Want men sal uwe outaers woest ende eensaem maken, ende uwe Goykens in stucken breken, ende te niet maken, Ende uwe beelden in stucken slaen, ende uwe stichtinghen wtroeyen,

7

Ende die verslagene onder v die sullen daer neder ligghen, alsoo dat ghijt beuinden sult, dat ic die HERE ben

8

⁺Mer ic wilder sommige van v laten ouerblijuen, ⁺ die tsweert ontgaen onder die heydenen, Wanneer ic v in die landen verstroyt hebbe,

+ B vers 8

+ Nu. xv. Ose. iiij

9

die selue uwe ouerghebleuen, die sullen dan aen mi ghedencken onder die heydenen, daer si gheuangen sijn moeten, als ic haer hoerachtich hert, dat van mi gheweken is, ende haer hoerachtige oogen, die na anderen Goykens gesien hebben, verslagen sal hebben, Ende dan sal haerder boosheydt berouwen, die si door allerley hare grouwelen bedreuen hebben,

10

ende sullen beuinden dat ic die HERE, ende nyedt te vergheefs ghesproken en hebbe, alsulcken ongeluc haer te doen

11

⁺Also seyt die HERE God, Slaet dijne handen tsamen, ende stampt met dijne voeten, ende segt. Wee ouer alle grouwelen der boosheyt inden huyse Israhels waeromme dat si door tsweert, honger, ende pestilentie vergaen moeten

+ C vers 11

12

So wie verre is, die sal vander pestilentie steruen, Ende so wie na bi is, die sal door tsweerdt vergaen. Ende so wie ouerblijft, ende daer voor behoet is die sal vanden honger steruen. Also wil ic mijn gramschappe onder haer voleynden, dat ghijt vernemen sult, dat ic die HERE ben.

13

Als uwe verslagen onder uwe Goykens oft beelden ligghen sullen, rontsomme uwe outaers, bouen op die houelen, ende bouen op alle bergen, ende onder alle groene boomen, ende onder alle dicke eycken, op welcke plaetsen dat si allerley Goykens soeten rueckoffer deden, Ic wil mijn hant tegen haer wtstrecken, ende dat lant woest ende eensaem maken, van die woestijne aen, tot Diblath toe, so waer dat si wonen, Ende si sullen beuinden dat ic die HEERE ben