Den Bybel met groter neersticheyt ghecorrigeert (Liesveltbijbel 1542)

¶ Die prekinghe oft straffinghe ouer Babylon.

Dat .l. Capittel.

1

⁺DIt is dat woordt, welcke dye HERE ghesproken heeft door den Propheet Hieremiam, teghen Babylon, ende dat ghansche landt der Chaldeen.

+ A vers 1

2

Vercondicht dat onder dye heydenen, ende latet wtroepen, steect een banier op, Latet wtroepen, ende en verberges niet, ende segt. Babylon is ghewonnen, Bel wordt beschaemt, ende Merodach is verslaghen, hare Godekens comen tot schanden, ende hare beelden zijn tot puluer in tween gheruyscht,

3

Want daer trect een volck van Tnoorden her op teghen haer, dwelcke haer landt tot eender wildernisse maken sal, dat daer oock nyemandt in woonen en sal, Maer beyde menschen ende beesten sullen van daer wech vlieden.

4

Inden seluen dagen, ende ter seluer tijt, spreeckt dye HERE, sullen comen die kinderen Israels, metten kinderen Iuda, al weenende derwaerts trecken ende den HERE haren God soecken,

5

Si sullen vraghen na den wech tot Zion, ende derwaerts haer keeren (Ende segghen) Coemt, laet ons totten HERE, ons voeghen, met een eewich verbont, dat nemmermeer vergheten en sal worden,

6

Want mijn volc is gheweest ghelijc een verloren cudde beesten, haer Herders hebbense verleyt, ende latense verdwaelt gaen opten berghen, also datse vanden berghen op die hueuelen gegaen sijn, ende hebben also hare koyen (oft stallen) vergheten.

7

Alle die ghene die tot haer ghecomen zijn, die hebben haer verslonden. Ende hare vianden spraken. Wy en doen geen onrecht daer aen, Want si hebben teghen den HERE gesondicht in die wooninghe der gerechticheyt, ⁺ ende aenden HERE die haerder vooruaderen hope is

+ B vers 7

8

Vliet wt Babel, ende treeckt wt den lande der Caldeen, ende stelt v als eenen bocke, dye voor dye cudden henen gaet.

9

Want siet, Ick wil groot volc met hoopen wt den lande vant Noorden verwecken, ende teghen Babilonien opbringhen, die haer teghen haer sullen wapenen, die welcke si ooc sullen gewinnen, Sijn pilen zijn als eens goets scutters dye niet misse en sciet

10

Ende dat landt der Chaldeen sal eenen roof worden also alle dye ghene dyese beroouen, ghenoech daer van hebben sullen seyt die HERE,

11

Daerom dat ghi v so verblijt ende beroemt, dat ghi mijn erfdeel gheplondert hebt, Ende springt gelijc die gheweldige calueren, ende briescht als die vrome henxsten.

12

Dijn moeder staet met grooter schande, Ende die v voortgebrocht heeft, die is tot eenen spot geworden.

13

Siet, onder die heydenen is si die verachste, woest, verdroocht, ende eenlick, ⁺ Want door den thoorne des HEEREN moet si onbewoont, ende gansch woest bliuen, also dat alle die gene die tot Babylonien voor bi gaen, haer verwonderen sullen, ende pijpen (oft suchten) ouer alle haer plaghen.

+ C vers 13

14

Wapent v tegen Babel, O alle ghy schutters van allen canten. Schiet op haer, en spaert geen pijlen, want si heeft teghen den HERE ghesondicht,

15

Roept op

[p. *]

haer, Sy moet haer opgeuen, haer fundamenten zijn gheuallen, haer mueren sijn afghebroken, Want dat is des HEREN wrake. Wreket v aen haer, doet haer ghelijc si gedaen heeft,

16

Reyct wt beyde den ploeger (oft sayer) ende den maeyer, Also dat een yeghelijcke voor tsweert der tyrannen hem keere tot sinen volcke, ende een yeghelijcke vliede in zijn lant. ⁺

+ Leuitici xxiiij. Iohe. iij

17

Israhel heeft moeten zijn een verstroyde cudde, dye dye leeuwen schou (oft bloode) gemaect hebben Eerstwerf verslindese dye coninck tot Assyrien, Daer na verweldichdese NebucadNezar dye coninck tot Babel.

18

Daerom seyt dye HERE der heyrscharen, dye God Israels also. Syet, ick wil versoecken den Babyloonschen Coninc, ende zijn lant, gelijc ick den Assyrisschen Coninck versocht hebbe.

19

Mer ick wil Israel weder thuys tot zijnder wooningen brengen, op dat si op Carmel ende Basan weyden, ⁺ ende haer sielen op dat geberchte Ephraim ende Gilead versaedt worden.

+ exo. xxi Hiere. li

20

Ter seluer tijt, ende inden seluen daghen salmen die misdaet Israels soecken, spreeckt dye HERE, mer daer en sal gheen zijn, Ende dye sonde Iuda, maer daer en salder gheen gheuonden worden, Want ick wil ghenadich zijn, den ghenen die ic hebbe laten ouerblijuen.

21

Trect op int landt (O ghy wreker) dwelcke dye ganssche werelt verpoft heeft. ⁺ Trect henen op, ende versoect die inwooners, verheert, ende verbrandt hare nacomelinghen, seyt die HERE, ⁺ Ende doet al dat ick beuolen hebbe.

+ Rom. iij vij. viij.

+ D vers 21

22

Daer is een ghescrey van eenen strijdt ende een groote moordt inden lande,

23

Hoe coemt doch dat den hamer des gansschen aertrijcx in stucken ghebroken, ende in tween ghemoorsselt is? Hoe gaet dat toe dat Babel een woestijne geworden is onder alle dye Heydenen?

24

Ick hebbe op v ghewacht, O Babel, ende daeromme bistu oock gheuanghen, eer dat ghy v oock versaecht. Ghi zijt ghetreft, ende gegrepen, Want ghy hadt den HERE getort.

25

Die HERE heeft sijn wapenhuys opghedaen, ende heeft dye wapenen des thoorns voortghebracht, Wandt sulcks heeft dye HERE God der heyrscharen inder Chaldeel landt ghedaen.

26

Coemt herwaerts tegen haer, ghy vanden eynden, Opent hare koren huysen werptse in eenen hoope ende verbrantse, alsoo datter oock nyet ouer en blijue,

27

Slaet doot alle haer runderen, voertse henen af, ter slachbanck. Wee haerder, want den dach is comen, die tijdt haerder versoeckinghen.

28

Men hoort (dunct mi) een gheroep der vluchtighen, ende der gheenre die ontuloden sijn wt den lande Babel, op dat si vercondighen in Zion, die wrake des HEREN ons Gods ende die wrake zijns Tempels.

29

⁺Roept veel lieden tegen Babel, belegertse rontsomme, alle ghi bogenscutters, en laet nyemanden daer van comen, loont haer, so si verdient heeft, Ghelijck si gedaen heeft, also doet haer weder. Want si heeft stoutelijcken gedaen tegen den HERE den heylighen in Israel.

+ E vers 29

30

Daerom sullen haer ionge mannen vallen, op hare straten, ende alle hare crijschlieden ondergaen ter seluer tijdt seyt die HEERE.

31

Siet, O du hoochmoedige Ick wil v aen spreect die HERE, God der heyrscharen, Want dijnen dach is comen, dye tijt dijnder besoeckingen.

32

Dan sal die stoute struyckelen ende vallen, also dat hem niemant oprichten en sal. Ic wil sine steden met vier aensteken, ende dat salt al verteren, so wat daer ontrent is

33

Also seyt die HEERE der heyrscharen. Siet die kinderen Israels met die kinderen Iuda moeten ghewelt ende onrecht lijden. Alle diese gheuanghen wech gheuoert hebben, dye houdense, ende en willense niet los laten,

34

Maer haer verlosser is sterck, dye HERE der heyrscharen sal hare sake so beschermen, dat hy dat lant beuende, ende die inwooners versaecht maken sal.

35

Dat sweert sal comen ouer die Chaldeen seyt die HERE, ende ouer dye inwoonders tot Babel, ende ouer hare Vorsten, ende ouer hare wijsen,

36

Dat sweerdt sal comen ouer hare waerseggers, alsoo dat si narren sullen worden.

37

Tsweert sal comen ouer hare stercke, so dat si versaghen sullen. Tsweert sal comen ouer hare ruyters ende waghens, ende alle tghemeen volck, dat daer in is, also dat si als wijuen worden sullen. Tsweert sal comen ouer hare schatten, also dat si gheplondert ende berooft sullen worden.

38

Droochte sal comen ouer hare wateren, also dat si versipen sullen. Wandt het is eender. Afgoden landt, ende verlaten haer op hare grouwelijcke Godekens.

39

Daeromme sullen daer in woonen ongheduere dieren ende voghelen, Ende dye ionghe Struyssen, ende en sal nemmermeer bewoont worden. Iae inder eewicheyt en sal daer yemant woonen.

40

Ghelijckerwijs als God Zodoma ende Gomorra, met hare omligghende steden omghekeert heeft spreect die HERE, also en sal daer oock nyemandt woonen, noch eenich mensche daer zijn wooninghe hebben.

41

⁺Syet daer coemt een volc vanden Noorden herwaerts, vele Heydenen, ende vele Coninghen sullen vander siden des landts haer op maken, dye boghen ende schilden hebben,

+ F vers 41

42

Sy sijn veruaerlick ende onbermhertich, haer gheroep is, ghelijc dat bruyssen des meyrs Sy rijden op paerden ghewapent, als crijschmannen, teghen v, O dochter Babylon,

43

So gheringhe als die Coninck tot Babel haer gheruchte hooren sal, so sullen hem dye handen ontsincken, Hem sal so banghe worden ende sulcken noot ouercomen, als eender vrouwen in kints nooden.

44

Syet, hi coemt hier op als een leeuwe, vanden stouten Iordane, teghen dye vaste hutten? Want ic wil hem derwaerts haestelijc laten loopen. Ende wye weet, wie die ionghelinc is? dien ick teghen haer wapenen sal? Ende wye is my ghelijck? Wie wil mi meesteren? Ende wi is die Herder, dye mi wederstaen can?

45

Daeromme hoort nv den raedt des HEREN, dyen hy ouer Babel voorghenomen heeft, ende sine ghedachten, dye hi heeft op die inwooners inden lande der Caldeen, wat soudt ghi daer toe segghen? oft der herders knapen haer nyet ter aerden slichten en sullen, ende haer wooninghe verwoesten.

46

Ende dye aerde sal beuen vanden gheschreye, Ende het sal onder dye heydenen ghehoort worden, als Babylon ghewonnen wort.