Den Bybel met groter neersticheyt ghecorrigeert (Liesveltbijbel 1542)

¶ Een claghe des propheten ouer die boosheyt sijns volcx.

Dat .ix. Capittel.

1

⁺ACh oft ic waters genoech hadde in mijnen hoofde, dat mijne ogen een fonteyne der tranen waren, op dat ic dach ende nacht beweenen mochte die verslagene in mijnen volcke.

+ A vers 1

2

Och oft ic een herberge (oft woninge) hadde inder woestijnen, so soude ic mijn volck verlaten ende trecken van haer, Want si sijn enckel ouerspeelders ende eenen wreeden hoope.

3

Sy scieten met haren tongen enckel logene, ende geen waerheyt, ende bedriuen ghewaldich onrecht opter aerden, Ende si gaen vander eender boosheyt totter ander, ende en achten mi niet seyt dye HERE.

4

¶ Een yeghelic hoede hem voor sinen vrient, ende en betrouwe ooc sinen broeder niet, Want deen broeder verdruct den anderen,

5

Ende deen vrient verraet den anderen. Deen vrient bedriecht den anderen, ende si en spreken geen warachtige woorden. ⁺ Si leggen daer op toe, hoe deene den anderen boeuerie doe, Ende tis haer ooc leet dat sijt niet arger gemaken en connen.

+ Mat. x.

6

Daer is ouer al enckel bedroch onder haer, Ende om des bedrochs wille, so en willen si mi niet kennen seyt die HERE.

7

Daerom seyt die HERE der heyrscharen alsoo Siet ic wilse smelten ende suyueren, Want wat sal ic anders doen? om dat mijn volc hem also verciert.

8

Haer valsche tongen dat sijn moordelijcke (oft scerpe pijlen) met haren monde spreken si vriendeliken tegen haren naesten, ⁺ Mer inder herten loeren si op den seluen,

+ B vers 8

9

En soude ick sulcx niet versoecken (oft straffen) aen haer seyt die HERE, ende en soude mijn siele haer niet wreken aen sulcke volck als dit is.

10

¶ Ic moet op die bergen weenen ende huylen, ende bi den herders hutkens clagen inder woestijnen. Want si sijn so geheelijcken verwoest, datter nyemant en wandelt, Iae datmen daer nyet een beeste roepen en hoort. Beyde die vogelen des hemels ende die beesten sijn alle wech,

11

Ende ick wil Ierusalem tot eenen steenhoop, ende tot een draken woninge maken, ende ic wil die steden Iuda woest maken, dat daer nyemant in wonen en sal, die nv wijs ware, ende lietet hem ter herten gaen, ende vercondichde wat des HEREN mont tot hem seyt, waerom dattet lant verderft ende verhert wort, gelijc als een woestijne daer nyemant en wandelt.

12

Ende die HERE seyde. Daerom dat si mijn wet verlaten, die ic haer gegeuen heb, ende en hooren mijne woorden niet, noch daer niet na en leuen,

13

mer si volgen haerder herten goetduncken, ende Baalim, gelijc haer hare vooruaders geleert hebben.

14

Daerom seyt die HEERE der heyrscaren God Israels also, siet, ic wil dit volck met alsene spijsen, ende galle te drincken gheuen,

15

ic wilse onder die heydenen verstroyen, die welcke noch si noch haer va-ders gekent en hebben, Ende ic wil tegen haer een sweert scicken tot dat icse gansschelijcken verniele.

16

⁺Also spreect die HERE der heyrscharen, Bescict ende bestelt claechwiuen, dat si comen, ende seyndt na dien, dyet wel connen, dat si haestelijcken ons beclaghen, oft een droeuich liet singhen)

+ C vers 16

17

also oock dat dye tranen wt onsen oogen vloeyen, dattet water wt onsen oogen schelen loope, datmen een clagelijc geschrey hoore tot Zion, te weten alsoo.

18

Och hoe sijn wi so gansch ghedestrueert, ende so iammerlijcken verdoruen. Wi moeten dat lant ruymen, want onse wooninghen sijn gelijcx der aerden gheslicht.

19

Daeromme so hoort nv, O ghy vrouwen des HEREN woordt, Ende vattet metten ooren dye redene sijns monts, Leert uwe dochteren weenen, ende die eene leere den anderen clagen, te weten also,

20

die doot is tot onsen veynsteren ingesteken, ende in onsen paleysen (oft huysen) gecomen te dooden die kinderen opter straten, ende dye iongelinghen voor der dueren.

21

So seyt die HERE, Segt, der menschen doode lichamen sullen liggen gelijc als mest opten velde, ende ghelijc die scoouen achter den maeyere, die niemant en vergadert.

22

⁺¶ Also seyt die HERE. Die wijse en verlate hem niet op sine wijsheyt, Een stercke en beroeme hem nyet van sijnder stercte, Ende een rijcke en gloriere niet in sinen rijcdomme.

+ D vers 22

23

Mer so wie beroemen wille, die beroeme hem dies, dat hi mi kenne ende wete, dat ick die HERE ben, die barmherticheyt recht ende gherechticheyt doet opter aerden, Wandt sulcx, behaecht my, seyt die HERE.

Siet die tijt coemt, dat icse alle besoecken sal, dye besneden met die onbesneden,

24

te weten Egipten, Iuda, Edom, die kinderen Ammon, Moab,

25

ende alle dyen inden eynde der woestijnen woonen, Want alle Heydenen hebben die voorhuyt des vleeschs onbesneden Maer dat gansche huys Israels heeft die voorhuyt der herten onbesneden.