Den Bybel met groter neersticheyt ghecorrigeert (Liesveltbijbel 1542)

Onder den persoone des propheten, so wordt die toecoemste ende dofficie Christi bescreuen ende inghebrocht dat die salichheyt niet alleen den Ioden, maer ooc den Heydenen vercondicht wordt.

Dat .xlix. Capittel.

1

⁺† HOort mi, O ghi eylanden, ende ghi volcken van verre, luystert toe, ⁺ Dye HERE heeft mi gheroepen, van moeders lichaem aen, hi heeft mijns naems ghedacht, doen ick noch in moeders lichaem was,

+ A vers 1

+ Hiere. i. Rom. ix.

2

Ende hi heeft mijnen mont ghemaect ghelijc ale een scherp sweert. Onder die schaduwe sijnder hant heeft hi mi bescermt. Hi heeft mi als eenen ^a huepschen pijl gemaect, ende mi in sinen kokere gesteken.

a Huepschen pijl dat is gesuyuert, ende gereynicht, door sijn ghena dye door cristum is, Apoc. v xix.c

3

Ende hi sprac tot mi, Du biste mijn knecht Israel, door den welcken ic ghepresen wil worden.

4

Ende ic dacht dat ic te vergheefs arbeyden soude, ende dat ic mijn crachte te vergeefs ende ounuttelijcken soude ghebruycken. Hoe wel nochtans mijn sake des HEREN, ende mijn officie mijns Gods is.

5

Ende nv spreect die HERE, die my van moeders lichaem aen, tot sinen knecht toebereyt heeft, dat ick Iacob tot hem soude bekeeren, op dat Israel niet en soude wech geruct worden. Daeromme ben ic voor den HERE heerlic, Ende mijne God is mijn stercte, ende spreect.

6

Het is een cleyn dinck, dat ghi mijn dienaer sijt, om dat geslachte Iacobs op te rechten, ende dat verdoruen is in Israel weder op te brengen, Maer ick hebbe v ooc tot een licht der heydenen gemaect, op dat ghi sout sijn mijn salicheyt tot aen die eynden der werelt.

7

Also spreect de HERE, ⁺ die verlosser Israels sijn heylige, tot die vercrachte sielen, totten volcke, waer afmen een grouwel heeft totten knechte, die onder die tyrannen is. Die coninghen sullen sien, ende opstaen. Ende die vorsten sullen aenbidden, om des HEREN wille, die ghetrouwe is, om des heyligen in Israels wille, die v wtuercoren heeft. *

+ ij.cor. vi.

8

⁺† Die HERE spreect also, Ic hebbe v ter aengenamer tijt verhoort, ende ic hebbe v inden dage des salicheyts gheholpen, ende hebbe behoedt, ende tot een verbont onder dat volc gestelt, op dat ghi dat lant sout oprechten, ende dat verdestrueerde erffenisse in soudt nemen,

+ B vers 8

9

ende seggen totten geuangenen Gaet wt. Ende totten ghenen die in duysternisse sitten. Coemt hier voor, op dat si haer opten weghe weyden, ende op alle houelen hare nootdruft mogen hebben

10

Ende si en sullen, noch honger, noch dorst meer hebben. Haer en sal gheen hitte noch onne steken Want die haerder ontfermhertich is, de salse leyden, ende aender fonteyn aderen te drincken gheuen

11

Ic wil alle mijn bergen tot weghen maken, ende mijne voetpaden sullen geeffent worden. Siet, dese sullen van verre comen.

12

Ende siet die ghene van Noorden, ende dese vanden meyre, ende die ghene vanden lande Synim.

13

Iuychet ghi hemelen, ende ghi aerde verblijt v, looft ghi bergen met juychen, Wandt die HERE heeft sijn volc getroost, ende het iammert hem haerder allenden. *

14

⁺Maer Sion spreect, die HERE heeft mi verlaten, Ende die HERE heeft mijns vergeten.

+ C vers 14

15

Mach ooc een vrouwe haers kints vergheten? dat si niedt en ontferme des soons van haren lichaem? Ende oft sulcke des seluen al vergate, so en wil ick nochtans dijns niet vergheten?

16

Siet, in die handen hebbe ic v gheteekent, dijne mueren sijn altijt voor my,

17

dijne tymmerlieden sullen haer haesten, v weder te bouwen. Maer dijne ^b verdestrueerders ende verwoesters sullen van v wijcken,

b Bi den verdestrueerders, worden bediet die door valsche leeringen der menscen herten verleyden ende bedrieghen Ie. xxi. ij.Tit. ij

18

Heft uwe oogen op rontomme, ende siet alle dese tsamen vergadert comen tot dy. Die HERE seyt, so warachtelic als ic leue, ghi sult alle dese gelijc, een cieragie aen trecken, ende sult gelijck een bruyt dese clenodien aen doen,

19

Want dijn woest verdestrueert, ende verdoruen lant, dat sal v dan te enge worden, om der inwoonders wille, als dijne verderuers verre wech zijn.

20

Also dat die kinderen dijnre onuruchtbaerheyt segghen sullen voor dijne ooren. Dye plaetse is mi te nauwe, schict v bi een, dat ic bi v woonen mach.

21

Mer ghi sult seggen in dijn herte, Wie heeft my dese gewonnen? want ic doch onuruchtbaer ben, ende eenlijcke verdreuen, ende verstoten. Wie heeft my dese opgeuoet? Siet, Ic was een eensame, ende verlaten, ende van waer comen dese?

22

⁺Also spreect die HERE der heyrscharen. Siet, Ic wil mijn handen totten heydenen opheffen, ende totten volcken mijn banier op steken, So sullen si dijne sonen inden armen brengen, ende dijne dochteren op die scouderen draghen.

+ D vers 22

23

Ende die coninghen sullen dijne voetsterheeren, ende die coninginnen dijne voetstervrouwen sijn. Si sullen voor v neder vallen ter aerden op haer aensicht, ende dat stof dijnre voeten lecken. Dan sult ghy beuinden dat ic die HERE ben, ⁺ aenden welcken niet bescaemt en sullen worden die op mi wachten.

+ Rom. ix j

24

Canmen ooc eenen Ruese den roof af iaghen? Oft canmen den gerechten sine geuangen los ghemaken?

25

Want also spreect die HERE. Nv sullen die geuangenen den ruese ghenomen worden, ende den roof des stercken los worden. Ende ic wil dijn saken teghen dijne wederpartije aenueerden, ende dijne kinderen helpen,

26

Ende ic wil dine vyanden spisen met haer eygen vleesche Ende si sullen met haer eygen bloet, ghelijc met soeten wijn droncken worden. Ende ^c alle vleesch sal beuinden dat ic die HERE ben, dijn salichmaker, ende dijn verlosser die machtige in Iacob.

c Alle vlees, dat is alle menschen