Den Bybel met groter neersticheyt ghecorrigeert (Liesveltbijbel 1542)

Die hoochmoedighe Babiloniers werden ghedreycht met haerder verderffeniste, ende toecomende straffinge, waer af hare goden ende beelden haer niet en sullen connen verlossen.

Dat .xlvij. Capittel.

1

⁺HOort mi, O ghi stoute van herten, dye verre vander gherechticheyt sijt, Ick hebbe mijn gherechticheyt na bi ghebracht, si en is niedt verre. Ende mijn salicheyt en sal haer niet versuymen, Want ic tot Sion salicheyt gheuen wil, ende tot Hierusalem mijne heerlicheyt.

+ A vers 1

2

O ioncfrou dochter Babel, ghi moet ter neder stelt v int ^a stof, settet v opter aerden, Want die Caldeesche maecht en heeft gheenen stoel meer. Men en sal v niet meer noemen, Vertaerde ende lieflijcke

a Int stof sitten, dat is verootmoedighet worden ende vernedert in sinen staet ende eere. Ioan. iij.c

3

Mer neemt die molen, ende maelt meele, ontdoet dijn gheulochten hayr, doet den borstlap wech, maect dijn voeten naect, ontdect v beenen, waet door dwater, Ia dat dijne schamelheyt, verthoont, ende dijne vrouwelicheyt ghesien worde,

4

Ic wil mi aen v wreken, ende nyemant en sals mi afbidden. Sulcx doet onse verlosser, die daer heet die HERE Sebaot, die heylighe in Israel.

5

Stelt v in die stilte, ende gaet int duystere, O ghy Chaldeesche dochtere, wandt ghi en sult niet meer heeten, een vrouwe bouen alle conincrijcken,

6

want doen ic op mijn volc toornich was, dat ick mijn erfdeel ontwijt (oft ontheylicht) hebbe, ende hebse in dijn hant ouergegheuen, Maer ghi en hebt haer gheene bermherticheyt bewesen, Iae haer ouden hebtstu seer beswaert met dijn iock,

7

Ende ghy dachtet, Ic ben een coninginne inder eewicheit. Ende ghi en hebt sulcx tot noch toe nyet ter herten ghenomen, noch daer op ghedacht, hoe dattet met haer hier na gaen soude.

8

Daeromme hoort nv dit, ghi die in wellusten leuest, ⁺ ende sonder sorgen sittest, ende segste in dijnre herten Ic bent, ende gheen meer, ⁺ Ick en sal gheen weduwe worden, noch ooc niet onuruchtbaer sijn.

+ B vers 8

+ Hie. xlix

9

Het sal v alle beyde gebueren, onuerhuets ende op eenen dach dat ghi weduwe ende onuruchtbaer sult sijn. Ia met gansser machte sullen si v oueruallen, om der menichte wille dijnre toouenaren, ende om dine besweerders wille, welcker eenen grooten hoop bi v is.

10

Want du hadtste dy op dijne boosheydt verlaten, doen ghi dachte. Men en siet mi niet, Dijne wijsheit ende conste hebben v verdoruen, ende spraect in dijn herte, Ic bent, ende anders nyemant.

11

Daeromme sal een ongeluc ouer v comen, dat ghi niedt en weet, wanneer dattet comen sal. Ende daer sal een ongeual op v vallen, dwelc ghy niet versoenen en sult moghen, Want daer sal bottelijc een ghedruyssche ouer v comen, daer ghi v niet voor en hoet.

12

Daeromme trect nv herwaerdts, ⁺ met dijne besweerders, ende metten hoope dijnre toouenaren, on-der den welcken ghi v van dijnre ioncheyt aen gheoeffent hebt, oft ghi dijns raet weet, oft dat ghi mogeste die stercken,

+ Ro. viij.

13

want ghi sijt moede geworden van de menichte dijnre opstellinghen. Laet voort comen ende v helpen die meesters des hemels loops, die sterrenkijckers, die na der mane rekenen, wat v ouercomen sal.

14

Siet, si sijn ghelijc als stoppelen, vanden viere verbernt, Si en moghen haer leuen vander vlamme niet verlossen Want het en sal geen gloet sijn, daermen bi ghewermen mach, noch ooc een vier, daermen bi ghesitten conde.

15

Effen also sijn si, daer ghy v mede ghemoeyt hebt. Dijnre hanteriers van dijnre iuecht op, Een yegelic sal sinen ganc herwaerts ende gintswaerts gaen, also dat ghi geenen hulper hebben en sult.