Den Bybel met groter neersticheyt ghecorrigeert (Liesveltbijbel 1542)

Een straffinghe dat si den getrouwen God Israels verlaten ende haer op die Egyptenaers crancke menschen betrouwen, Hy roepet volc weder tot God, ende hi seyt haer hulpe ende bescherminge toe.

Dat .xxxi. Capittel.

1

⁺WEe den ghenen die aftrecken in Egipten, ⁺ om hulpe, ende verlaten haer op peerden, ende hopen op wagenen, om datter veel sijn, ende op ruyters, Daeromme dat sy seer sterc sijn, ende en houden haer nyedt totten heyligen in Israel. Ende en vraghen nyedt na den HERE,

+ A vers 1

+ ezechie. xxix. Iud. ix

2

maer hi is wijs, ende brengt ongheluck daer toe, ende hi en wendt sine woorden niet, maer hi sal hem op maken teghen dat huis der boosen, ende tegen die hulpe der quaetdoenders.

3

Want die Egyptenaers sijn menschen, ende niet God. Ende hare peerden sijn vleesche, ende gheen gheest. Ende die HERE sal sine hant wtrecken, also dat die hulper struyckelen sal ende die ghene dien gheholpen soude worden, dat die ooc valle, ende alle beyde tsamen vernielt worden.

4

Want also seyt die HERE tot my, gelijc als een leeuwe, ende een ionge leeuwe brullet aen sinen roof, als dien die menichte der herderen daer aenroept, so en verscrict hi hem niet van haren roepen, ende hi en acht ooc op hare menichte niet,. Also sal die HERE Zebaoth neder varen om te strijden opten berch Syon, ende ende op sinen houel. Ende die HERE Sebaoth sal Hierusalem bescermen

5

(gelijc dye vogelen met haren vogelen doen) bescudden, verlossen, daer in rontsomme gaen ende wt helpen.

6

Keert omme O ghi kinderen Israhels, ghi dye seer afgeweken sijt.

7

⁺Wandt tot dier tijt sal een yeghelijc sijn silueren ende guldenen beelden wech worpen, dye welcke uwe sondige handen gemaect hebben.

+ B vers 7

8

Ende Assur sal vallen, maer niet door eens mans sweert, ende sal ooc verteert worden, ende niedt door smenschen sweerdt, ende hi sal nochtans voor dat sweert vlieden Ende sine iongelingen sullen onder tribuyt sijn moeten,

9

ende hare steenrootse sal van vreesen wech trecken ende sine princen sullen voor die baniere die vlucht gheuen, spreect die HERE Sebaoth, die tot Sion een vier heeft, ende tot Ierusalem eenen ouen.