Den Bybel met groter neersticheyt ghecorrigeert (Liesveltbijbel 1542)

Dat .xvij. Capittel.

1

⁺EEnen drooghen bete daer aen men hem ghenoegen laet, is beter dan een huis vol gheslagender beesten met twiste.

+ A vers 1

2

Een voorsienich knecht sal heerscappen ouer schandelijcke kinderen, Ende sal onder den broederen dat erue wtdeelen.

3

Ghelijc vier tsiluer, ende den ouen tgout, Also proeft die HERE die herten.

4

Een quade achtet op quade monden, Ende een valsche gheeft gehoore der valscher tonghen.

5

Wie den behoeuenden bespottet, die scheyndet des seluen schepper, ende wie hem van sinen ongheualle verblijdet, en sal niet onschuldich zijn.

[p. *]

6

Der ouder croone sijn kints kinderen, Ende der kinder eere sijn haren vader.

7

Costelike lippen en staen den sotte niet wel, Vele min eenen prince eenen luegenachtighen mont.

8

⁺Dat gheschencke is eenen edelen steen dien diet heeft, Werwaert hi hem keert hy doet voorsienlijc

+ B vers 8

9

Wie die sonde bedect, die soect liefde, Mer wie die sake ander ende andermael meldet, die maeckt princen oneens.

10

Schelden veruaert meer aenden verstandighen, Dan hondert slaghen aenden sotten.

11

Die wederspannighe soect ongheluc, Maer daer wort een grouwelike bode ouer hem gheseynt.

12

Het is beter eenen beyre ghemoeten, dien die ionghen berooft sijn, dan eenen sotte in sijnder sotheyt.

13

Wie goet met quade loont, Van dies huyse en salt quaet nyet gaen.

14

Beghinsel des kijfs is gelijc een water wtbreect, Ende door twist breyt hi hem wijde wt.

15

Wye den godloosen gherecht seyt te wesen, Ende den gherechten verdoemt, die sijn alle beyde den HEERE een vereysinge.

16

⁺Wat batet den sotte ghelt in die hant om wijsheit te coopen, daer hi doch een sot is?

+ C vers 16

17

Een vrient bemint altoos, Ende een broedere wort inder noot beuonden.

18

Het is een sotte dye aen die hant gelooft, Ende borge wort voor sinen naesten

19

Wie twistinge bemint dye bemint sonde, Ende soo wie sine dore hooch maect, soect dat breken.

20

Een verkeert herte en vindet niet goets, Ende dye van verkeerder tonghen is, sal in ongeluc vallen.

21

Een sotte maect hem seluen bedructheyt, Ende eens sotten vader en heeft ghene blijschap.

22

Een vrolic herte maect dat leuen lustich, Mer eenen bedroefden moet bedroeuet dat ghebeente.

23

Die godloose neemt gheschencken wt den schoot ⁺ Om den wech des oordeels te buyghen.

+ D vers 23

24

Wijsheyt is voor den verstandighen, Mer des sotten ooghen sien op die eynden der aerden.

25

Een sotte sone is sijns vaders trueren, ende bedroefnisse sijnder moeder die hem ghebaert heeft.

26

Het en is nyet goet schade den gherechtighen te doene, Den prince te slaen die recht handelt.

27

Wye bescheydenheyt weet, die matiget sine redene, ende een verstandich man hout sinen gheest diere.

28

Waert dat een sotte sweech, soo worde hy oock wijs gherekent, ende verstandich waert dat hy den mont stopte.