Den Bybel met groter neersticheyt ghecorrigeert (Liesveltbijbel 1542)

¶ Dat .xv Capittel.

1

⁺EEn saechte antwordt stillet dye gramscap, Mer een hardt woordt verwect verbolgentheyt.

+ A vers 1

2

Die tonghe der wijsen verchiert die kennisse, der sotten mont schuymt altoos sotheyt wt.

3

Die ooghen des HEREN aenschouwen in allen plaetsen, beyde quade ende goede.

4

Een heelsame tonghe is eenen boom des leuens, Mer een valsche bedroeft dat gemoete.

5

Die sotte lastert die castijende onderwijsinghe zijns vaders, Mer die straffinge behoudt, sal verstandiger worden.

6

Des gherech-

[p. *]

ten huys heeft groot goet, mer inden incomen des godloosen, is ongeoordineertheyt.

7

Die lippen der wijsen stroyen wt kennisse, Maer der sotten herte en is also niet.

8

Des godloosen offerhande is den HERE een afgrijselicheyt, Maer dat gebet der oprechtere is zijn welbehagen.

9

Des godloosen wech is den HERE een afgrijselicheyt, maer so wie der gerechticheyt na volcht, die wort bemint.

10

⁺Het is een quade onderwijsinge der geender dye den padt verlaten, Ende so wie die rechte strate hatet, die sal steruen.

+ B vers 10

11

Helle ende verderffenisse is voor den HERE, Hoe veel meer der menschen herte.

12

Die ^a spotter en bemint den genen niet die hem straft, Ende en gaet niet tot den wijsen.

a spotter, dats die valsche leeringhen saeydt voor goede ende voor dat woordt Gods.

13

Een vrolic herte maect een vrolic aengesicht, Mer in die becommernisse des herten, wort den geest neder geslagen.

14

Een verstandich herte soect kennisse, dat aensicht der sotten gaet met sotheyt omme.

15

Alle die dagen des allendigen zijn quaet, Mer eenen goeden moet is een dagelicx weerscap.

16

Het is beter een weynich metter vreesen des HEREN, Dan eenen grooten schat daer onruste inne is.

17

⁺Het is beter een moes gherecht cruyt met liefden, dan eenen ghemesten ossche met hate

+ C vers 17

18

Een toornich man beroct twist, Mer een verduldige stillet den twist.

19

Den wech des tragen is doornachtich, Maer den wech der oprechtigher is wel ghebaent.

20

Een wijse sone verblijt den vader, Ende een sotachtich mensche beschaemt sijn moeder.

21

Den sotten is die sotheyt een blijscap, mer een verstandich man rechtet sinen ganck.

22

Die ghepeynsen worden te nieute, waer geenen raet en is, Maer waer veel raetgheuers sijn, sijn si stantuastich.

23

Het is eenen blijscap, ist datmen hem haestelic antwoort, Ende een woort tot sijnder tijt is seer lieflic.

24

Den wech des leuens gaet opwaerts cloec te maken, Op datmen schouwe die helle onderwaerts.

25

Die HERE sal dat huys des houaerdigen te stucken breken, Ende sal vast maken die palen der weduwen

26

⁺Die raden des arghen zijn den HERE een afgriselicheyt, Mer suyuer reden zijn lieflic.

+ D vers 26

27

Die ghierige verwerret sijn eygen huis, Mer so wie die gheschencken hatet, die sal leuen.

28

Dat herte des gherechten dichtet wat te antwoorden is, Mer den mont der godlooser schuymet quaet wt.

29

Die HERE is verre vanden godloosen, Mer der gherechter ghebet verhooret hi.

30

Vriendelick sien verblijt dat herte, een goet gheruchte maket dat ghebeente vet.

31

Dat oore dat daer hooret die straffinge des leuens sal onder die wijse woonen.

32

Wie castiende onderwijsinge laet varen, die verworpt sine eygen siele, Mer so wie straffinge hooret die wort cloeck.

33

Die vreesen des HEREN is castiende onderwijsinge der wijsheyt, Ende allendicheyt gaet voor die eere henen.