Den Bybel met groter neersticheyt ghecorrigeert (Liesveltbijbel 1542)

¶ Dat .xiij. Capittel.

1

⁺EEn wijse soon laet hem den vader castijende onderwijsen, mer een spotter en hoort die straffinge niet.

+ A vers 1

2

Een man etet vander vrucht des monts, mer die siele der verachters is ongerechtich.

3

Wie sinen mont bewaert, die bewaert sine siele, maer wye met sinen mont ombehoedelick wt vaert, die sal verscricken.

4

Dye luye begeert, ende en heues nochtans niet, maer die siele der naerstiger sal versaet worden.

5

Die gherechtige hatet valsche woorden, maer dye godloose scheyndet ende lachtert.

6

Die gherechticheyt behoedt den vromen, maer dat godloos wesen brengt eenen totter sonde.

7

Daermen meynt datter rijckdom si daer en is niet, ende daermen meynt datter armoede is, daer is te vollen ghenoech.

8

⁺Metten rijckdomme verlost een sine ^a siele, maer een arme en hoort die straffinge niet.

+ B vers 8

a Siele dat is sijn leuen

9

Dat licht der gherechtiger maect vrolic, mer die keersse der godlooser wort wt ghebluscht.

10

Onder den stouten is altoos twist, maer die met rade alle dinghen doen, dye sijn wijs.

11

Rijckdom wert weynich, ist datment te mildelic verdoet, maer watmen tsamen houdet, dat wort groot.

12

Den hope die hem vertrect, die benaut dat herte, mer eene begheerte die daer coemt, is eenen boom des leuens.

13

Wie dat woort veracht die verderft hem seluen, Mer wie dat ghebot vreest, die sal vrede hebben.

14

⁺Die wedt des wijsen is een leuende fonteyne, om die stricken des dootc te mijden.

+ C vers 14

15

Een aengename cloeckheyt heeft gonste, Maer der verachters wech is hardt.

16

Een versiende doet alle dinck met bescheidenheyt, Maer een sotte breydet sotheyt wt.

17

Een godloose bode brengt ongeluck, mer een ghetrouwe legaet is heelsaem.

18

Wie castiende onderwijsinge laet varen, dye heeft armoede ende schande. Maer wie die straffinge bewaret, sal ter eeren comen.

19

Als een begeerte coemt, die doet der sielen saecht, maer die dat quaet mijdet, is den dwasen een afgrijselicheyt.

20

Wie metten wijsen omme gaet, die wort wijs, mer so wie der sotten geselle is, die sal ongeluc hebben.

21

⁺Ongeluc veruolget die sondaers, maer den gherechtighen wort goet vergouden,

+ D vers 21

22

Dye goede sal eruen op kints kinde, mer des sondaers goet wort den gherechtighen voorgespaert.

23

Daer is vele spijsen in die voren der groter, mer sommige vergaderen sonder oordeele.

24

Wie sine roede spaert, die hatet sinen sone Mer wie hem lief heeft, die onderwijst hem terstont.

25

Die gherechte etet dat sine siele sadt wort, Maer der godlooser buyck heeft altoos ghebreck.