Den Bybel met groter neersticheyt ghecorrigeert (Liesveltbijbel 1542)

¶ Die wijsheyt noot te gaste alle onuerstandighe sotten, sy belooft haer groote dinghen, wederomme so wort die dwaesheyt in die ghedaente van een clappeye bescreuen, welcke tot haerwaerts loct den sotten, die si verleyt.

Dat .ix. Capittel

1

⁺DIe wijsheyt tymmerde haer huys, ende hieuwe seuen calomnen, ende schencte haren wijn,

+ A vers 1

2

si sloech, ende bereyde haer tafele,

3

Ende seynde haer deernen wt, om te nooden bouen op dat palleys der stadt

4

Wie onwetende is, die come herwaerts, Ende totten dwasen sprac si,

5

Coemt etet van mijnen broode, ende drincket vanden wijn die ic schencke,

6

Verlaet dat onwetende wesen, so sult ghi leuen, ende gaet op den wech der verstandenisse.

7

⁺Wie den ^a spotter castijende onderwijset, die moet schande op hem seluen nemen, Ende wye den godlosen straft, die moet beschimpt worden,

+ B vers 7

a spotters, dat sijn dye den woorde gods tegen staen ende haer eygen leeringhen ende opinien goet achten

8

En straft den spotter niet, Hi hatet v, Straft den wijsen, die sal v beminnen,

9

Gheeft den wijsen, so sal hi noch wijser worden, Doet het condt den gherechtighen, so sal hi toenemen

10

Der wijsheyt begintsel is des HEREN vreese, Ende die verstandenisse is kennisse der heyligher dinghen,

11

want door mi sullen uwer dagen veel worden, Ende die iaren des leuens sullen v meer worden.

12

Sijt ghi wijs, so sijt ghi v seluen wijs, sijt ghy een spotter so sult ghijt alleen draghen.

13

⁺Daer is een dwaesachtich onrustich wijf, vol clapperien, ende en weet niet,

+ C vers 13

14

die sidt in die dore haers huys opten stoele bouen in die stadt,

15

om te nooden alle die voorby gaen, ende die recht op haren wech wandelen,

16

wie onwijs is, die make hem herwaerts, Ende totten sotten spreect si,

17

Die ghestolen wateren sijn soete. Ende dat verborghen broot is ghenoechlijc,

18

Maer hi en weet niet, dat aldaer dooden sijn, ende hare gasten inder dieper hellen.