Den Bybel met groter neersticheyt ghecorrigeert (Liesveltbijbel 1542)

Van dat rijcke ende vrome feyten des Conincx Iosie.

Dat .xxxiiij. Capittel.

1

⁺IOsia was .viij. iaer out, doen hy coninc wert, ende regneerde .xxxi. iaer te Ierusalem,

+ A vers 1

2

ende dede dat den HERE wel beuiel, ende wandelde inden wegen sijns vaders Dauid, ende en weke noch ter rechter, noch ter slincker hant,

3

Want inden achsten iare sijns conincrijcx doen hi noch een kint was, begonste hi den God sijns vaders Dauid te soecken.

4

Ende inden .xxij. iaer begonste hi Iuda ende Ierusalem te reynighen, vanden Hoochten ende boskens ende afgoden ende gegoten beelden,

5

ende liet voor hem afbreken die outaers Baalim. Ende dye beelden bouen daer op, hieu hi bouen af, ende die boskens ende afgoden ende beelden brack hi in stucken, ende maectese tot stof, ende stroydese op die grauen der gheenre dye hen gheoffert hadden,

6

ende verbernde die gebeenten der priesteren op die outaren, ende reynichde alom Iuda ende Iherusalem.

7

Daer toe inden steden Manasse, Ephraim, Symeon, ende tot Naphtali in haren woestinen rontomme.

8

Ende doen hi die outaers ende boskens af gebroken hadde, ende die afgoden cleyn in stucken ghemalen, ende alle die beelden af gehouden hadde int geheele lant Israel, so quam hi weder te Ierusalem.

9

Inden achtiensten iaer sijns conincrijcx, doe hy dat lant ende dat huys gereynicht hadde, ⁺ seynde hi Saphan den sone Azalia, ende Maeseia den stadthouder, ende Ioas den sone Ioalias den cancelier, te repareren dat huys des HEREN sijns Gods,

+ B vers 9

10

ende si quamen totten hoogen priester Hilkia, ende men gaf hem dat gelt dat totten huyse Gods gebracht was, dwelc die Leuiten die aenden dorpel bewaerden vergadert hadden, van Manasse Ephraim, ende van alle ouergebleuene in Israel ende van gheheele Iuda ende BenIamin, ende van dyen die te Ierusalem woonden,

11

ende gauent onder die handen der arbeyders, die bestelt waren aent huys des HEREN, ende si gauent dien, dye daer arbeyden aent huys des HEREEN, waer dattet veruallich was, dat si dat huys souden reken, oft weder maken.

12

Die selue gauent voort den timmerlieden, ende den metsers om ghehouden steenen ende gescaeft hout te coopen, totten balcken aenden huyse, dwelc die coningen Iuda bedoruen hadden

13

⁺Ende die mannen arbeyden aent werck op gelooue.

Ende ouer hen waren geoordineert Iohath ende Obadia, die Leuiten wt den kinderen Merari, Sacharia, ende Mesullam, wt den kinderen der Kahathiten om dat werc te drijuen, ende waren alle Leuiten die op musijcspelen consten spelen.

+ C vers 13

14

Mer ouer dye lastdragers tot alderhande

[p. *]

arbeyt, in allen ambachten waren wt den Leuiten, die scrijuers, officiers, ende die poortiers.

15

Ende als sijt gelt namen dat totten huyse des HEEREN in geleyt wert, ⁺ vant Hilkia dat boeck der wet des HEREN, door Mose ghegeuen.

+ D vers 15

16

Ende Hilkia antwoorde ende sprac tot Saphan den scriuer, Ic hebbe dat wetboec geuonden inden huyse des HEREN, ende Hilkia gaf dat boeck Saphan,

17

Saphan bracht totten coninc, ende seydet den coninc weder ende sprac. Allet wat onder die handen uwer knechten gegeuen is, dat maken si,

18

ende hebben dat gelt te hoope ghescut, dat inden huyse des HEREN geuonden is, ende hebbent gegeuen dien die geordineert sijn, ende den arbeyders.

19

Ende Saphan die scrijuer gaft den coninck te kennen ende sprack. Hilkia die priester heeft mi eenen boeck ghegheuen.

[afbeelding]

Ende Saphan las daer inne, voor den coninck,

20

Ende doe die coninc die woorden der wet hoorde, ⁺ scoorde hi sine cleederen.

+ E vers 20

21

Ende die coninc geboot Hilkia ende Ahikam den sone Saphan ende Abdon den sone Micha, ende Saphan den scrijuer, ende Asaia den knecht des conincx ende sprac.

22

Gaet vraecht den HERE voor mi ende voor die ouergebleuene in Israel, ende voor Iuda vanden woorden des boecx datter geuonden is, Want die verbolgentheit des HEREN is groot die ouer ons ontsteken is, dat onse vaders nyedt ghehouden en hebben dat woordt des HEREN, dat si ghedaen hadden, so in desen boeck ghescreuen staet.

23

Doe ghinc Hilkia met den anderen vanden coninc geseynt, totter propheterssen Hulda den wijue Sallum, des soons Thakehath, des soons Hasra, des cleeder bewaerders, die tot Ierusalem woonde int ander deel, ende spraken sodanich met haer.

24

Ende si sprac tot hen, So spreect die HERE die God Israhel. Segt den man die v tot mi gesonden heeft,

25

So spreect die HERE. Siet ic wil ongeluc brenghen ouer dese plaetse ende hare inwoonders, alle die vloecken die ghescreuen staen inden boec, datmen voor den coninc Iuda gelesen heeft,

26

Om dat si my verlaten hebben, ende anderen goden gerooct, dat si my tot gramschap souden verwecken, met alderhande wercken haerder handen, Ende mijn verbolgentheyt sal ontsteken worden op dese plaetse, ende niet wtgheblust werden.

27

⁺Ende tot den coninc Iuda die v gesonden heeft, den HERE te vragen sult ghi also seggen. So spreect die HERE die God Israhel, vanden woorden die ghi gehoort hebt,

+ F vers 27

28

Om dat v herte vermorwet is, ende sijt verootmoedicht voor God, doen ghy sine woorden hoordet tegen dese plaetse, ende tegen haer inwoonders, ende hebt v voor mi verootmoedicht, ende v cleederen gheschoort, ende voor mi gheweent, So heb ic v verhoort seyt die HERE,

29

siet ic wil v vergaderen tot uwen vaderen, op dat ghi in v graft met vreden vergadert wert op dat uwe oogen niet en sien, alle dat ongheluc dat ic ouer dese plaetse, ende haer inwoonderen brengen wil, Ende si seydent den coninck weder.

30

⁺Doen seynde die coninck ende liet te samen comen alle ouders Iuda ende Ierusalem.

+ G vers 30

31

Ende dye coninck ghinc op int huys des HEREN, ende alle mannen Iuda, ende inwoonders te Ierusalem, die priesters, die Leuiten, ende allet volc, beyde cleyn ende groot, ende voor haer ooren worden ghelesen, alle woorden int boeck des verbonts dat inden huyse des HEREN geuonden was,

32

Ende die coninc tradt op sijn plaetse, ende maecte een verbont voor den HERE, datmen na den HERE wandelen soude om sijn geboden, ghetuygenissen ende seden te houden wt geheelder herten, ende wt gheheelder sielen te doen na alle woorden des verbonts, die ghescreuen stonden in desen boecke.

33

Ende daer stonden alle dye te Ierusalem ende in BenIamin voor handen waren, ende die inwoonders te Ierusalem deden na dat verbont Gods haerder vaderen God,

34

ende Iosia dede wech alle afgrijselicheden wt allen landen, die den kinderen Israhel toebehoorden, ende maecte dat alle die in Israel gheuonden worden, den HERE haren God dienden also lange als Iosia leefde, en weken si niet vanden HERE haers vaders God.