Den Bybel met groter neersticheyt ghecorrigeert (Liesveltbijbel 1542)

Vanden rijcke ende leuen des godlosen conincx Manasse, Oock van sijn ghebet tot God, ende sine beteringhe.

Dat .xxxiij. Capittel

1

⁺MAnasse was twaelf iaer oudt, ⁺ doen hy coninc wert, ende regneerde viuenuijftich iaer te Ierusalem,

+ A vers 1

+ Iesaias die Propheet wert van Manasses ghemartelizeert om dat hi hem strafte van sine quade wercken als dye wereldt ghestaen hadde vier .M ccccc. ende xxvi. iaer voor cristus geboorte vi.c. ende lxiij. iaren.

2

ende dede dat den HERE mishaechde, nae den afgrijselicheden der heydenen, die die HERE voor dye kinderen Israel verdreuen hadde,

3

ende keerde hem om

[p. *]

ende timmerde die Hoochten, die sijn vader Hiskia afgebroken hadde, ende stichte Baalim outaren, ende maeckte boskens, ende aenbadt alderhande heyr aenden hemel, ende dienden hen.

4

Hi timmerde ooc outaren int huys des HEREN, daer die HERE af gesproken had. Te Ierusalem, sal mijnen name sijn eewelic,

5

Ende timmerde outaren alderhande heyr aenden hemel, ⁺ in beyde dye houen aent huys des HEEREN,

+ B vers 5

6

Ende liet sinen soon doort vier gaen, int dal des soons Hinnon, ende vercoos dagen ende achte op vogelen sanck, ende touerde ende stichte waerseggers ende teekenbedieders, ende dede vele dat den HERE mishaechde, om hem te verwecken tot gramschap.

7

Hi sette ooc beelden ende afgoden die hi maken liet int huys Gods, daer die HERE af gesproken hadde, ende Salomo sinen sone, in desen huyse te Ierusalem, die ick vercoren hebbe voor alle stammen Israel wil ic mijnen name setten eewleic,

8

ende en wil den voet Israel niet meer laten wijcken vanden lande dat ic haren vaderen gegeuen hebbe, so verre si hem houden, dat si doen al wat ic hen geboden hebbe, in allen wetten seden ende rechten, door Mose.

9

⁺Maer Manasse verleyde Iuda, ⁺ ende die van Ierusalem dat si argher souden doen, dan dye heydenen die die HERE voor die kinderen Israel verdreuen hadde,

+ C vers 9

+ Die stat van constantinopolen werdt in deser tijt ghetymmert voor cristus gheboorte .vc.xxxiiij iaer, als die werelt ghestaen had vier .M ccccc. ende ende lvi. iare. Dye stadt van Niniuen wert gedestrueret alsoo Naim de propheet ende die oude Tobias ghepropheteert hadden. Caleucus een heydens coninc in Lombaerdyen oordineerde in sinen rijcke dat so wie in ouerspel beuonden werden, dien soudemen beyde sine oogen wtsteken Het gheuiel dat sijn soon in ouerspel beuonden wert, ende hi gheboot datmen hem sijn oogen wt soude steken, maer sijn ondersaten vielen daer tegen Mer om dat dye wedt die van hem in ghesedt was, niedt en soude geuioleert ende gebroken worden, soo heeft hy eerste sijns selues een ooge wt laten steken, daer na sijns soons een ooge, ende so hielden si beyde haer ghesichte.

10

Ende al liet die HERE met Manasse ende sinen volck spreken, si en aenmerctens niet.

[afbeelding]

11

⁺Daerom liet die HERE ouer haer comen die ouersten des heyrs, des conincx te Assur, dye namen Manasse geuangen met boeyen, ende bonden hem met ketenen ende brachten hem te Babel.

+ D vers 11

12

Ende doen hi inder benautheit was, smeecte hi voor den HERE sinen God ende verootmoedichde hem seer voor den God sijnder vaderen,

13

ende badt ende smeecte hem. Doen verhoorde hi sijn smeeken ende bracht hem weder te Ierusalem tot sine conincrijc. Doen bekende Manasse dat die HERE God is.

14

Daer na timmerde hi die buytenste mueren aen die stadt Dauid van westwaert aen Gihon, in dye beke, ende daermen ter vischpoorten in gaet, ende rontom tot op Ophel toe, Ende maectese seer hooch, Ende legerde hooftlieden in die vaste steden Iuda.

15

Ende dede wech die vreemde goden ende die afgoden wt den huyse des HEREN, ende alle outaren die hi getimmert hadde, opten berch des huys des HEREN ende te Ierusalem, ende werpse wt voor die stadt,

16

Ende bereyde den outaer des HEREN, ende offerde daer op dootoffer ende danckoffer, ende beual Iuda, dat si den HERE den God Israel dienen souden,

17

Nochtans offerde dat volc op dye Hoochten den HERE haren God.

18

Wat meer van Manasse te seggen is, ende sijn ghebet tot sinen God, ende die reden der Scouwers die met hem spraken inden name des HEREN des Gods Israhel, Siet die sijn onder die ghesciedenissen der coningen Israel,

19

ende sijn gebet ende smeeken, ende alle sine sonden ende misdaet, ende die plaetse daer hi op die hoochten timmerde ende boskens ende afgoden stichte, eer hy verootmoedicht wert, siet, die sijn gescreuen onder die ghesciedenissen der bescouwers,

20

Ende Manasse ontsliep met sinen vaderen, ende si begroeuen hem in sijn huys, ende sine sone Amon wert coninck in sijn plaetse.

21

Amon was .xxij. iaer out doen hi coninc wert, ende regneerde twee iaer te Ierusalem,

22

ende dede dat den HERE qualic beuiel, gelijc sijn vader Manasse gedaen hadde. Ende Amon offerde alle den afgoden die sijn vader Manasse ghemaect hadde, ende diende hen.

23

Maer hy en verootmoedichde hem niet voor den HERE gelijc hem sijn vader Manasse verootmoedicht hadde, wandt Amon maecte der scult vele,

24

Ende sine knechten maecten een verbont tegen hem, ende dooden hem in sijn huys.

25

Doen sloech dat volc inden lande, alle die dat verbondt ghemaect hadden tegen den coninck Amon. Ende dat volck inden lande maecte Iosia sinen sone coninc in sijn stede.