Den Bybel met groter neersticheyt ghecorrigeert (Liesveltbijbel 1542)

¶ Vanden godloosen coninck Achas, Ende wat onder hem gheschiet is.

Dat .xxviij. Capittel.

1

⁺AHas was .xx. iaer out, doen hy coninck werdt, ende regneerde .xvi. iaer te Ierusalem, ⁺ Ende en dede nyet dat den HERE behaechde, ghelijck sijn vader Dauid,

+ A vers 1

+ Iesaias die propheteerde in deser tijdt, hy was dye sone Amos des Propheets Munitor een coninc van Italien, zijn dochtere hiet Ahea, si was besloten om den afgod Vaste te dienen, sy boeleerde, ende ontfinck ende baerde twee sonen Remus ende Romulus haer vader Munitor dedese daerom leuende begrauen ende die .ij kinderen dede hy buyten in tveldt wech draghen daer sy wonderlijck vanden woluinnen opgeuoedt ende ghesoocht werden.

2

maer hi wandelde inden weghen der kinderen Israel, Ende daer toe maecte hi ghegoten beelden, Baalim,

3

ende hi roocte inden dal der kinderen Himmon, ende hi verbernde sinen sone met viere, na den grouwelen der heydenen, die dye HERE voor den kinderen Israel verdreuen hadde,

4

Ende offerde ende roocte op die Hoochten, ende op dye houelen, ende onder alle groene boomen.

5

Daeromme gaf hem dye HERE sine God in dye handen des conincx te Sirien, dat si hem sloegen, ende eenen grooten hoope vanden sinen gheuangen wech leyden, ⁺ ende tot Damascum brachten, Ooc wert hy gegeuen onder die hant des conincx Israel, also dat hi eenen grooten slach aen hem dede,

+ B vers 5

6

Want Pekak die sone Remalia, sloech in Iuda, hondert ende .xx. duysent op eenen dach dye alle rassche oorloochs lieden waren, om dat si den HERE haerder vaderen God verlieten.

7

Ende Sichri een machtighe in Ephraim, doode Maesia den sone des conincx, ende Ariskam den huysvorste, ende Elkana den naesten na den coninc.

8

Ende die kinderen Israel leyden wech geuangen van haren broederen .ij. hondert duysent wijuen, sonen ende dochteren, ende namen daer toe grooten roof van hen, ende brachten den roof tot Samaria.

9

Aldaer was een propheet des HEEREN dye hiet Obed, dye ghinck wt, den heyr te ghemoet, dat tot Samaria quam, ende sprac tot hen, siet, want die HERE uwer vaders God ouer Iuda gram is, so heeft hise in dijnen handen gegheuen, ende ghy hebtse wredelijc ghedoot, dat het inden hemel reyckt,

10

Nv denct ghy v die kinderen Iuda, ende Ierusalem te onderworpen, tot knechten ende maerten, En is dan dat niet bi v schult tegen den HERE uwen God?

11

So hoort mi nv, ende brengt die gheuangen weder, die ghi wech gheleyt hebt, wt uwen broederen, Want des HEREN gramschap is ouer v verbolghen.

12

⁺Doen maecten hen op, sommige onder den principaelsten der kinderen Ephraim, Asaria die sone Ahanan, Berechia, die sone Mesillemoth, Iehiskia dye sone Sallum, ende Amasa die sone Hadlai, teghen dye wten heyr quamen,

+ C vers 12

13

ende spraken tot hen, Ghi en sult die geuangene hier niet in brengen, Want ghi en brengt niet dan scult voor den HERE ouer ons, op dat ghi onser sonden ende scult des te meer sout maken,

14

Want der schult is te voren te vele, ende die gramscap ouer Israel verbolghen, doen lieten die geharnaste lieden die geuangen, ende den roof voor den ouersten, ende voor der geheelder ghemeynten.

15

⁺Doen stonden die mannen die nv met namen genoemt zijn, ende namen die geuangene, ende alle dye bloot onder hen waren, ende cleedense vanden geroofde, ende trocken hen schoenen aen, ende gauen hen teten ende te drincken, ende salfdense, ende voerdense op ezelen, alle dye daer onsterc waren, ende brachtense tot Ieriho, totter palmen stadt bi haren broederen, ende quamen weder te Samaria.

+ D vers 15

16

Opter seluer tijt seynde die coninc Ahas, totten coninc van Assur, ⁺ om dat si hem souden helpen,

+ B vers 16

17

Ende dye Edomiten dye quamen noch eens ende sloeghen Iuda, ende voerden sommighe wech,

18

Die Philisteen daelden ooc neder inden steden, inden velden, ende tegen tzuyden Iuda, ende wonnen BethSemes, Aialon, Gederoth, ende Socho met haren dochteren, Thimna met haren dochteren, ende Gimso met haren dochteren, ende woonden daer inne,

19

want die HERE verootmoedichde Iuda om Achas des conincx Iuda wille, om dat hi Iuda bloot maecte, ende ontghinc hem aen den HERE,

20

ende TiglatPilnesser van Assur, quam tegen hem, dye belegherde hem, ende hi en was hem niet machtich ghenoech.

21

Want Ahas deelde dat huys des HEREN, ende dat huys des conincx, ende der ouerster dat hi den coninc Assur gaf, Maer ten halp hem niet,

22

Daer toe in zijnre noot, maecte dye coninc Ahas des ontgaens aenden HERE noch meer,

23

ende hy offerde den goden tot Damasco, dye hem gheslaghen hadden, ende sprack. Die goden der coninghen tot Sirien hebben hen geholpen, daerom wil ic hen offeren dat si mi ooc helpen, daer nochtans die selue hem, ende den geheelen Israel eenen val waren.

24

Ende Ahas bracht te samen dye vaten des huys Gods, ⁺ ende vergaderde die vaten inden huyse Gods, ende sloot die dueren toe aenden huyse des HEREN, ende maecte hem outaren in allen winckelen te Ierusalem

+ Die stat van Roomen wert in deser tijt ghesticht, voor cristus gheboorte seuen .c ende xxvij. iaer, als die werelt ghestaen had iiij.M.cccc. ende xxiij. iaren, ende Romulus deylde dat iaer eerst in .x. delen, ende hi beghint vanden Meerte ende noemt die maent na den afgod des strijdts, Mars die dye Poeten seggen dat sijn vader was.

25

ende inden steden Iuda, hier ende daer maecte hy hoochten om te roocken anderen Goden, ende verwecte den HERE zijnder vaderen God tot gramschap.

26

Wat meer van hem te seggen is, ende alle sine weghen beyde die eerste ende die leste, siet, dat is ghescreuen inden boecke der coninghen Iuda ende Israel.

27

Ende Ahas ontsliep met sinen vaderen, ende begroeuen hem in dye stadt Ierusalem, Want si en brochten hem niet onder die grauen der coninghen Israel, ende zijn sone Iehiskia wert coninc in sijn stede.