Den Bybel met groter neersticheyt ghecorrigeert (Liesveltbijbel 1542)

¶ Ioas wort coninck ouer Iuda, Hy tymmerde den Tempel ende wat totten dienst Gods behoort, Na dien dat Ioiada sterf so wort Ioas veruuert, ende hi doet boosheyt voor den HEERE. ende als hi van zacharia ghestraft wort, doet hi hem dooden, sine knechten doorstaken hem in sijn bedde.

Dat .xxiiij. Capittel.

1

⁺IOas was seuen iaer out doen hy coninc wert, ende regneerde .xl. iaer te Ierusalem, Sijn broeder hiet Zibia van Berseba,

+ A vers 1

2

ende Ioas dede dat den HEERE wel behaechde, also lange als dye priester Ioiada leefde,

3

Ende Ioiada gaf hem twee wijuen, ende hi genereerde sonen ende dochteren.

4

Daer na nam Ioas voor, dat huys des HEREN te vernyeuwen,

5

ende vergaderde die priesters ende die Leuiten, ende sprac tot hen, Trect wt tot allen steden Iuda ⁺ ende vergadert ghelt wt geheele Israel, om dat huys ws Gods iaerlicx te repareren oft te reken, ende haest v dat te doen, Maer die Leuiten en haesten niet.

+ B vers 5

6

Doen riep die coninc Ioiada den principaelsten, ende sprac tot hen, Waerom en hebdi geen achte op die Leuiten, dat si in brochten van Iuda ende Ierusalem, die hantreyckinge, die Mose die knecht des HEREN geset heeft, diemen vergaderde onder Israel totten tabernakel des ghetuygenissen?

7

Want die ongodlike Athalia ende haer sonen, hebben dat huys Gods bedoruen, ende allet wat totten huyse des HEREN gheheylicht was, hebben si aen Baalim vermaect.

8

⁺Doen beual die coninc datmen een kiste soude maken, ende settense buyten in die poorte aent huys des HEREN,

+ C vers 8

9

ende liet wtroepen in Iuda ende te Ierusalem, datmen den HERE dye hantreykinge in brengen soude van Mose den knecht Gods op Israel gheleget in dye woestijnen.

10

Doen verbliden hen alle ouersten ende allet volc ende brachtent ende worpent in de kist tot datse vol wert,

11

Ende alst tijt was datmen die kist brengen soude voor die Leuiten, na des conincx beuel, als si sagen datter veel gelts

[p. *]

in was, so quam die scrijuer des conincx, ende dye vanden principaelsten priester beuel hadden, ende scudde die kiste wt, ende droegense weder op haer plaetse, So deden si alle dage, dat si ghelts planteyt te hoop brachten.

12

Ende die coninc ende Ioiada gauent den arbeyders die daer wrachten aent huys des HEEREN, dye selue huerden steenmetsers ende timmerlieden, ⁺ om dat huys des HEREN te vernyeuwen, ooc den meesteren aen ysere ende metael, om dat huys des HEREN te repareren

+ D vers 12

13

Ende die werclieden arbeiden, dat die reparacie int werc toe nam, door haer handt, ende stelden dat huys in sijn weerde, oft eersten staet, ende maectent vaste.

14

Ende doen sijt voleynt hadden brachten si dat ghelt dat daer noch ouerscoot voor den coninc ende Ioiada, daer af maectemen vaten totten huyse des HEREN, vaten, totten dienst ende brantofferen, lepelen ende gulden ende silueren ghereetscap, Ende si offerden brandtoffer by den huyse des HEREN, also lange als Ioiada leefde.

15

⁺Ende Ioiada wert out ende des leuens sadt, ende sterf, ende was .c. ende .xxx. iaer out doen hi sterf,

+ E vers 15

16

ende si begroeuen hem in die stadt Dauid, onder dye coninghen, om dat hi wel hadde gedaen aen Israel, ende aen God, ende aen sinen huyse,

17

Ende na den doot Ioiada, quamen die ouersten in Iuda, ende aenbaden den coninc. Doen hoordese die coninc ende was hen te wille,

18

Ende si verlieten dat huys des HEREN des Gods haers vaders, ende dienden den Boschkens ende afgoden. Doen quam die gramscap ouer Iuda ende Ierusalem, om deser haerder schult wille,

19

Ende hi seynde propheten tot hen, dat si hen totten HERE bekeeren souden, ende die betuychdense, Mare si en nament niet ter ooren.

20

Ende die geest Gods trock aen Zacharia, den sone Ioiada des priesters, die tradt bouen ouer dat volck, ende sprack tot hen, So spreect God, Waeromme ouertreet ghi die gheboden des HEREN, dat v niet ghelucken en sal? ⁺ Want ghi den HERE hebt verlaten, so sal hi v weder verlaten, ⁺

+ F vers 20

+ ma. xxij b

21

Maer si maecten een verbont tegen hem, ende steenden hem na dat gebot des conincx, inden hof aenden huyse des HEREN,

22

ende die coninc Ioas en ghedachte der ontfermherticheyt niet die Ioiada sijn vader aen hem gedaen hadde, mer doode sinen soon. Doen hi sterf sprac hi, Die HERE salt sien ende versoecken.

23

Ende doen dat iaer omme was troc die macht der Siriers op, ende quamen in Iuda ende in Ierusalem, ende verdoruen alle ouersten int volc, ende alle haren roof seynden si den coninck tot Damascon.

24

Want der Siriers macht quam met weynich mannen, nochtans ghaf die HERE een seer groote macht in haer hant, om dat si den HERE haerder vaderen God verlaten hadden, Ooc deden si aen Ioas oordeelen.

25

Ende doen si van hem trocken, so lieten si hem in grooten crancheden.

⁺ Ende sine knechten maecten een verbont tegen hem om des bloets wille der kinderen Ioiada des priesters Ende si doodeden hem op sijn bedde, ende hi sterf, ende men begroef hem in die stadt Dauid, mer niet onder der coninghen grauen,

+ G vers 25

26

Die dat verbont tegen hem maecten, waren dese Sabad die sone Simeath die Ammonitinne, Ende Iosabad die sone Simrith, die Moabitinne,

27

Maer sine sonen ende die summa die onder hem vergadert was, ende die timmeragie des huys Gods, Siet die sijn bescreuen in die Historia inden boec der coninghen, Ende sine soon Amasia wert coninck in sijn stede.