Den Bybel met groter neersticheyt ghecorrigeert (Liesveltbijbel 1542)

¶ Iosaphat sterft, Ioram sijn sone wort Coninck, Ende hy slaet sine broeders doot, Hi verlaet den HERE, ende leeft als een godloose, Edom valt af van Iuda, God die HERE straft ende plaget den Coninck Ioram.

Dat .xxi. Capittel

1

⁺ENde Iosaphat ontsliep met sinen vaderen, ende werdt begrauen bi sine vaders in die stadt Dauid, Ende sine sone Ioram wert coninc in sijn stede,

+ A vers 1

2

Ende hy hadde broeders Iosaphats sonen, Asaria, Iesiel, Sacharia, Asaria, Michael, ende Sephatia Dese waren alle kinderen Iosaphats des Conincks Iuda.

3

Ende haer vader gaf hen veel gauen, van siluer, gout, ende cleynodien, met vasten stercken steden in Iuda, Maer dat conincrijck gaf hi Ioram, want hi was die eerste gheborene.

4

⁺Doen Ioram op quam ouer dat conincrijc sijns vaders, ⁺ ende sijns machtich wert, doodede hi sine broeders alle metten sweerde,

+ B vers 4

+ In deser tijt leefde Ligurgius een coninc van Italien. Hi en geboodt niet dat hi seluer nyet en dede, binnen sinen rijcke soo en mocht de een iongelinc nyet beter gecleet gaen dan de ander, hi ordineerde de ionge knechten op tlant te wonen om daer te arbeyden, om datse in die steden haer ioncheit niet en souden ouerbrenghen in oncuysheyt, ende datmen metten maechden geen houwelijckgoet gheuen en soude, om dat nyemant wt giericheyt ende om ghelts wille geen wijf trouwen en soude Hi was een Heydens Coninc van wtnemender duecht, leest Augustinum int tweede boeck vander stat gods, ende dye werelt had ghestaen vier duysent hondert ende vi. iaer voor cristus gheboorte viij.c. ende xciiij. iaer.

5

Daer toe ooc sommige ouersten in Israel. Ioram was .xxxij. iaer out doen hi coninck wert, ende regneerde acht iaer te Ierusalem,

6

ende wandelde in die weghen der Coningen Israel, gelijc dat huys Ahab gedaen hadde, Want Ahabs dochtere was sijn wijf, ende dede dat den HERE qualijck beuiel,

7

Maer die HERE en woude dat huys Dauids niet verderuen, om des verbonts wil dat hi met Dauiden ghemaect hadde, ende so hi ghesproken hadde, hem een keerse oft licht te gheuen, ende sinen kinderen altoos.

8

⁺Tot sijnder tijt vielen die Edomiten af van Iuda, ende maecten ouer hen eenen coninc,

+ C vers 8

9

Want Ioram was door ghetrocken met sinen ouersten, ende alle dye wagens met hem, ende hadde hem tsnachts op gemaect, ende die Edomiten om hem, ende die ouersten der wagens geslagen,

10

Daerom vielen die Edomiten af van Iuda tot op desen dach Ter seluer tijt viel Libna ooc van hem af, Want hy verliet den HERE sijnder vaders God,

11

Ooc maecte hi hoochten op die berghen Iuda, ende dede die van Ierusalem hoerderije bedrijuen, ende verleyde Iuda.

12

Mer daer quam ghescrift tot hem, vanden prophete Elia, die luyde also, Soo spreect die HEERE dye God ws vaders Dauid, om dat ghi niet ghewandelt en hebt inden wegen ws vaders Iosaphat, inden weghe Assa des conincx Iuda,

13

mer wandelt inden weghen der coninghen Israel, ende doet dat Iuda, ende dye van Ierusalem hoerderije bedriuen, na der hoerderie des huys Ahabs, ende hebt daer toe uwe broeders ws vaders huys ghedoodet, dye beter waren dan ghy,

14

Siet, so sal v die HERE met eender grooter plagen slaen, aen v volc, aen v kinderen, aen v wijuen, ende aen alle uwen goede,

15

Maer ghi sult veel crancheden hebben in v ingewant, totdat v ingewant van crancheit wt gae, van dage te dage.

16

Dus verwecte die HERE tegen Ioram den gheest der Philisteen, ⁺ der Arabiers, die neffens dye Moren liggen,

+ D vers 16

17

ende trocken op in Iuda, ende verdoruense, ende voerden alle haue wech, die voor handen was inden huyse des conincx, Daer toe sine sonen ende sine wijuen, also dat hem gheenen soon ouer en bleef, dan Iohas sijn ioncste soon.

18

Ende na alle dien, so plaechde hem die HERE in sinen ingewande, met sulcker crancheit die niet te helpen oft te ghenesen en was.

19

Ende doen dat van dage te dage duerde, als den tijt van twee iaren om was, ginc sijn ingewant van hem met sijnder crancheyt, Ende hi sterf aen boosen cranckheden, Ende si en maecten gheenen brant ouer hem, so si sinen vader ghedaen hadden.

20

Hi was .xxxij. iaer out doen hi coninck wert ende regneerde acht iaer te Ierusalem, Ende wandelde dat niet fijn en was, ende si begroeuen hem inder stadt Dauid, maer niet onder der coninghen grauen.