Den Bybel met groter neersticheyt ghecorrigeert (Liesveltbijbel 1542)

¶ Die Moabiten ende Ammoniten trecken wt teghen Iosaphat mer God helpt hem.

Dat .xx. Capittel.

1

⁺NA desen quamen die kinderen Moab die kinderen Ammon, ende met hem die van Amunim om tegen Iosaphat te strijden,

+ A vers 1

2

ende men bootschaptet Iosaphat, ende men sprac. Daer coemt een groote menichte tegen v van ouer gheen side der zee van Sirien, ende siet, si sijn te Hazezon Thamar, dat is Engegdi,

3

mer Iosaphat ontsach hem, ende stelde sijn aensicht den HERE te soecken, ende liet een vasten wtroepen onder geheel Iuda.

4

Ende Iuda quam te samen om den HERE te soecken. Ooc quamense wt allen steden Iuda den HEERE te soecken.

5

Ende Iosaphat tradt ouer dye ghemeynte Iuda ende Ierusalem, inden huyse des HEEREN, voor den nyeuwen hof, ende sprack.

6

HERE onser vaders God, en zijt ghi niet God inden hemel, ⁺ ende heerscapt in allen conincrijcken der Heydenen? Ende in v hant is cracht ende macht, Ende daer en is nyemant die tegen v staen mach,

+ B vers 6

7

En hebt ghi niet onse God, die inwoonders des lants verdreuen voor v volc Israel, ende hebbet ghegeuen dat zaet Abraham ws liefhebbers eewelic, dat si daer inne gewoont hebben

8

ende v een heylichdom tot uwen name daer inne ghetymmert hebben, ende geseyt,

9

Als een ongeluc, sweert oordeel, oft pestilencie, oft dieren tijt ouer ons coemt, so sullen wi staen voor desen huyse voor v (want uwen name is in desen huyse) ende roepen tot v in onsen noot so willet ghi hooren ende ons helpen.

10

⁺Nv siet die kinderen Ammon, Moab, ende die vanden geberchte Seir, ouer die welcke ghi die kinderen Israel niet en liet trecken, doen si wt den lande Egipti reysden, mer moesten voor hen wijcken ende die niet vernielen.

+ C vers 10

11

Ende siet, si laten ons dies ontgelden, ende comen om ons wt te stooten, wt dat erue dat ghi ons inghegeuen hebt,

12

Onse God en wilt ghijse niet oordeelen? want in ons en is geen cracht tegen desen groten hoop die teghen ons coemt, wi en weten niet wat wi doen sullen, maer onse ooghen sien tot v.

13

Ende gheheel Iuda stont voor den HERE met haren kinderen, wijuen ende sonen.

14

⁺Maer op Iehasiel den sone Zacharia, des soons Benaia, des soons, Iehiel, des soons Mathania, den Leuite wt den kinderen Assaph, quam die geest des HEREN midden inder ghemeynten,

+ D vers 14

15

ende sprack, Aenmerct geheel Iuda, ende ghi inwoonders te Ierusalem ende die coninc Iosaphat, So spreect dye HERE tot v, Ghi en sult niet vreesen, noch v verslaen voor desen grooten hoop, want ghy en strijt niet, mer God,

16

Morghen sult ghy tot hen af trecken,, ende siet, si trocken aen Zizop, ende ghi sultse aen die roode zee aencomen, in die beke voor die woestijne Ieruel,

17

want ghy en sult niet strijden in deser saken, En trect maer henen, ende staet, ende siet dat heyl des HEREN dye met v is, Iuda ende Ierusalem, en vreest noch en verslaet v niet, morgen trect tegen hen wt, de HERE is met v

18

Doen buychde hem Iosaphat met sijn aensicht ter aerden, ende gheheele Iuda, ende die inwoonders te Ierusalem vielen voor den HERE, ende aenbaden den HERE,

19

⁺Ende die Leuiten wt den kinderen der Kahathiten, ende wt den kinderen der Korhiten, maecten hen op om te loouen den HERE den God Israel met luyder stemmen opwaerts,

+ E vers 19

20

Ende si maecten hen tsmorgens vroech op, ende trocken wt totter woestijnen Thekoa. Ende doen si wttrocken stont Iosaphat ende sprakc, Hoort toe nae mi Iuda, ende ghi inwoonders te Ierusalem, Gelooft aenden HERE uwen God, so sult ghi seker sijn, Ende ghelooft sinen propheten, so sult ghi gheluc hebben

21

Ende hi gaf den volc raet, Ende stelde die Sangers den HEERE, ende die louers in heylighe cieragie, dat si voor die ghewapende souden trecken ende spelen, Dancket den HERE, want sine ontfermherticheyt duert eewelic.

22

Ende doen si begonsten met dancken ende louen, liet die HERE die gestelde lage die tegen Iuda gecomen was, ouer die kinderen Ammon, Moab, ende die vanden geberchte Seir comen, ende sloegense.

23

Doen stonden die kinderen Ammon ende Moab teghen die vanden gheberchte Seir, om te verbannen ende te vernielen. Ende doen si die vanden geberchte Seir te niete hadden gedaen, so halp deene den anderen dat si hen ooc verdoruen onder malcanderen.

24

⁺Doen Iuda tot Mizpe quam aen die woestijne, keerden si hen tegen den hoope, ende siet, doen lagen die doode lichamen opter aerden, also datter geen ontloopen en was.

+ F vers 24

25

Ende Iosaphat quam met sinen volcke om haren roof wt te deylen, Ende vonden onder hen so veel goeden ende cleederen, ende costelicx ghereetscaps ende ontnament

[p. *]

hen, also dattet niet te dragen en was, Ende si deelden drie dagen den roof wt, want daer was vele,

26

Opten vierden dach quamen si tsamen inden Seegendal, Want aldaer seeghenden oft benedijden si den HERE, Daer af hiet die plaetse Seegendal, tot op desen dach.

27

Also keerde elc van Iuda ende Ierusalem wederomme Ende Iosaphat voor aen die scherpte des heyrs, dat si tot Ierusalem trocken met blijschappen, Want die HERE hadde hen een blijscap gegeuen aen haer vianden,

28

Ende trocken tot Ierusalem in, met psalteren, herpen ende trompetten, totten huyse des HEREN,

29

Ende die vreese Gods quam ouer alle conincrijcken inden lande doen si hoorden dat die HERE tegen die vyanden Israel ghestreden hadde,

30

Alsoo was dat conincrijck Iosaphat stille, ende God gaf hen rontomme ruste.

31

Ende Iosaphat regneerde ouer Iuda, ende was .xxxv. iaer out doen hi Coninc wert, ende regneerde .xxv. iaer te Ierusalem, ⁺ Sijn moeder hiet Asuba, een dochter Sihi,

+ G vers 31

32

Ende hy wandelde in sijns vaders Assas wech, ende en liet daer nyet af, Dat hy dede dat den HERE wel beuiel,

33

mer die Hoochten en worden niet af ghedaen, Want dat volc en hadden haer herte noch nyet geschict oft gestiert totten God haerder vaders.

34

Wat meer van Iosaphat te segghen is, beyde dat eerste ende dat laetste, siet dat is ghescreuen in die geschiedenisse Iehu des soons Hanani, die hi opgheteekent heeft, inden boeck der coninghen Israel.

35

Daer na vereenichde hem Iosaphat die Coninck Iuda met Ahasia den Coninck Israel, welcke godloos was met sinen doen,

36

Ende hi vereenichde hen om met hen schepen te maken, datse op die zee souden varen, Ende si maecten die scepen tot Ezeon Gaber,

37

Mer Eliezer die sone Dodana, van Mareza, propheteerde tegen Iosaphat ende sprac, Daerom dat ghi v met Ahasia vereenicht hebt, so heeft die HERE v wercken gheschoort, Ende die schepen werden ghebroken, ende en mochten niet op die zee varen.