Den Bybel met groter neersticheyt ghecorrigeert (Liesveltbijbel 1542)

¶ Van Abia ende Ierobeam, ende hare strijden.

Dat .xiij. Capittel.

1

⁺INden achtiensten iare des Conincx Ierobeam, ⁺ wert Abia coninc in Iuda, ende regneerde drie iaer te Ierusalem,

+ A vers 1

+ ij.regum. xiiij.f

2

Sijn moeder hiet Michaia, een dochter Vriel van Gibea, Ende daer verhief eenen strijt tusschen Abia ende Ierobeam,

3

ende Abia wapende hem totten strijt met vier hondert duysent ionge gemonsterde mannen, stercke lieden ten oorloge. Ierobeam wapende hem om teghen hem te strijden, met acht hondert duysent ionge ghemonsterde stercke mannen.

4

Ende Abia maecte hem op bouen opten berch Semarim, welcke opt gheberchte Ephraim leget, ende sprac Ierobeam ende gheheel Israel hoort mi,

5

En weet ghi niet dat die HERE die God Israel, ⁺ dat conincrijc Israel Dauiden eewelic heeft ghegheuen, hem ende sinen sonen een sout verbont?

+ B vers 5

6

Maer Ierobeam die sone Nebat, die knecht Salomo Dauids soon wierp hem op, ende wert sinen heere wederspannich,

7

Ende loose ydele lieden ende kinderen Balial, hebben hen toe gheslaghen, ende hebben hen ghestrect teghen Rehabeam den sone Salomo, Want Rehabeam was ionck ende bloede van herten, dat hi hem voor haer niet en weerde.

8

Nv denct ghi v tegen dat rijcke des HEREN bouen den sonen Dauid te setten, om dat uwer een meerder hoop is, ende hebt gulden calueren, die v Ierobeam voor goden gemaect heeft,

9

En hebt ghi niet dye priesters des HEREN die kinderen Aaron, ende die Leuiten wt ghestooten, ende hebt v eygen priesters ghemaect, als die volcken inden landen, Wie daer coemt sijn hant te vullen met eenen ionghen verre, ende seuen rammen, die wert priester der gheenre, die geen goden en zijn.

10

Maer die HERE onse God is met ons, dien wi niet en verlaten, ⁺ Ende die priesters die den HEERE dienen, ⁺ die kinderen Aaron, Ende die Leuiten in haren wercke,

+ C vers 10

+ ij.re. vi.

11

ende ontsteken den HERE alle morghen brantofferen, ende alle auont, Daer toe dat goede ruecwerc, ende bereyden brooden op reynen tafelen, Ende den gulden candelaer met sinen lampen, datse alle auont ontsteken souden werden, want wi bewaren dye bewaringe des HEREN ons Gods,

12

maer ghi hebt hem verlaten Siet met ons int vorste des heyrs is God, ende sine prie-sters, ende die trompette om te trompetten datmen teghen v trompette, Ghi kinderen Israel en strijt niet teghen den HERE uwer vaderen God, want het en sal v niet ghelucken.

13

⁺Maer Ierobeam stelde lagen rontomme, dat hi van achter aen hen souden comen, Also dat si voor Iuda waren, ende die gestelde lage achter hen.

+ D vers 13

14

Doen Iuda hem omkeerde, sach hi voor ende achter strijt, Doen riepen si totten HERE, ende die priesters trompten met trompetten,

15

ende alle man in Iuda riep, Ende doen si riepen, soo plaechde God dat geheele Israel voor Abia ende Iuda,

16

Ende die kinderen Israel vluchten voor Iuda, ende God gafse in haren handen

17

also dat Abia met sinen volcke eenen grooten slach aen hen dede, ende wt Israel vielen vier hondert duysent ionge mannen verslaghen.

18

Also worden die kinder Israel op die tijt verootmoedicht, Mer die kinderen Iuda worden ghetroost, Want si verlieten hen opten HERE haerder vaderen God,

19

Ende Abia iaechde Ierobeam na, ende wan hen steden af, Bethel met haren dochteren, Iesana met haren dochteren, Ephron met haren dochteren,

20

Also dat Ierobeam voort niet tot cracht en quam, also lange als Abia leefde, ende die HERE plaechde hem dat hi sterf.

21

Doen nv Abia ghesterct was, nam hi veerthien wijuen, ende wan .xxij. sonen ende sesthien dochteren.

22

Wat meer van Abia te seggen is, ende sine wegen ende zijn daet, dat is ghescreuen in die historie des propheten Iddo

23

Ende Abia ontsliep met sinen vaderen, ende si begroeuen hem in die stadt Dauid, ende Assa sijn sone wert coninck in sijn plaetse, tot dien tijden was dat lant thien iaer stille.