Den Bybel met groter neersticheyt ghecorrigeert (Liesveltbijbel 1542)

Hier beghint dat tweede boeck der Croniken.

Van Salomons Conincrijcke, den seluen openbaert die HERE, ende Salomo bidt hem.

Dat eerste Capittel.

1

⁺ENde Salomo dye sone Dauid werdt in sijn rijcke becrachticht, ⁺ ende dye HERE sijn God was met hem, ende maecte hem altoos grooter.

+ A vers 1

+ ij.re. iij a

2

Ende Salomo sprac totten gheheelen Israel metten ouersten ouer duysent ende hondert, metten rechteren ende met allen vorsten in Israel, metten ouersten vaderen,

3

dat si souden ghaen, Salomo ende die gheheele ghemeynte met hem, totter Hoochten die te Gibeon was, want daer was den Tabernakel des ghetuygenis Gods, ⁺ die Mose die knecht des HEREN ghemaect hadde inder woestinen,

+ Exodi. xxxvi a

4

Want die Arcke Gods hadde Dauid op gebracht van Kiriath Iearim, daer hi haer bereyt had, want hi hadde haer eenen Tabernakel op geslagen te Ierusalem,

5

Maer den metalen outaer dien Bezaleel, die sone Vri, des soons Hur gemaect had, was aldaer voor die wooninge des HEREN, Ende Salomo, ende die ghemeynte plagen dien te versoecken.

6

Ende Salomo offerde opten eenen outaer voor den HERE, die voor den Tabernakel des ghetuygenis stont, duysent brantoffers.

7

Inder seluer nacht openbaerde God Salomo, ende sprac tot hem. Bidt, wat sal ick v gheuen?

8

⁺Ende Salomo sprac tot God, Ghi hebt groote ontfermherticheyt aen mijnen vader Dauid ghedaen, ende hebt mi in zijn plaetse coninc ghemaect,

+ B vers 8

9

So laet nv HERE God v woort warachtich worden aen mijnen vader Dauid, want ghi hebt mi coninck gemaect ouer een volck des so vele is, als stof opter aerden,

10

dus geuet mi nv wijsheit ende kennisse, dat ic voor desen volc wt ende inne gae, Want wie can dit v groote volc geuonnissen?

11

⁺Doe sprac God tot Salomo, Want ghi dat inden sinne hebt, ende en hebt niet om rijcdom, noch om goet, noch om eere, noch om uwer vianden sielen, noch om lanck leuen ghebeden.

Mer hebt om wijsheit ende kennisse gebeden, dat ghy mijn volc oordelen mocht, waerom ic v coninck ghemaect hebbe, so si v wijsheit ende kennisse ghegheuen

+ C vers 11

12

Daer toe wil ic v rijcdom ende goet ende eere geuen, dat ws gelijcx onder den Coninghen voor v niet geweest en is, noch worden en sal nae v.

13

Also quam Salomo vander Hoochten, die tot Gibeon was, tot Ierusalem vanden tabernacule des getuygenisse, ende regneerde ouer Israel.

14

Ende Salomo vergaderde hem wagens ende ruyters also dat hi te wege bracht duysent ende vierhondert

[p. *]

wagens, ende twaelfduysent ruyters, ende lietse inden wagen steden, ende biden coninc te Ierusalem.

15

Ende die coninc maecte des siluers ende gouts so vele te Ierusalem als der steenen ende der cederen, ⁺ als der moerbesie boomen, die inden beemden wasscen,

+ D vers 15

16

Ende men bracht Salomo peerden wt Egipten, Ende die cooplieden des Conincx haeldense tot Kena om ghelt, ende quamen op, ende brachten wt Egypten

17

eenen wagen, om ses hondert silueren penninghen, ende een peert om hondert ende vijftich. Also brachtense ooc allen coninghen der Hethiten, ende den coninghen tot Syrien.