Den Bybel met groter neersticheyt ghecorrigeert (Liesveltbijbel 1542)

Dauid spreect vander tymmeragie des tempels, Ende wat die daer toe belouen.

Dat .xxx. Capittel.

1

⁺ENde die coninck Dauid sprac totter geheelder ghemeynten, God heeft Salomo een van mijnen sonen verwect, die noch ionck ende teeder is, Mer dat werck is groot, want het en is niet eens menschen wooninghe, maer Gods des HEREN.

+ A vers 1

2

Ick hebbe wt alle mijne crachten beschicket totten huyse Gods gout tot guldenen, siluer tot silueren, metael tot eerenen, yser tot yseren, hout tot houtenen ghereetschap, Onix steenen, zeer dierbaer robijn, ende bonte steenen, ende alderhande edele gesteenten, marmoer steenen planteyt.

3

Ouer dat, wt welbehaghen aent huys mijns Gods, heb ic van mijnen eygenen goede, gout, siluer,

4

drie duysent ponden gouts van Ophier, ende seuen duysent ponden louters siluers, dat gheue ic ooc totten heylighen huyse Gods, bouen alle dat ic beschict hebbe om die wanden der huysen te ouertrecken,

5

dat gulden werde wat gulden, ende silueren wat silueren sijn sal, ende alderhande wercke, door die hant der wercmeesters, Ende wien is nv vrywillich sine hant heden den HERE te vullen?

6

⁺Doe worden die princen der vaderen, Die princen der stammen Israel, die princen ouer dusent, ende ouer hondert ende die princen ouer des conincx wercken, vrywillichlic

+ B vers 6

7

ende gauen totten dienst inden huyse Gods, vijf duysent ponden gouts, ende thien duysent gulden, ende thien duy-

[p. *]

sent ponden siluers, ende .xviij. duysent ponden metaels, ende hondert duysent ponden ysers.

8

Ende bi wien dat steenen geuonden waren, gauen si totten schat des huys des HEREN, onder die hant Iehiel des Gersoniters

9

⁺Ende dat volc was vrolijc, dat si vrywillich waren want si gavent wt geheelder herten, den HERE vrywillichlijc.

+ C vers 9

10

Ende Dauid die coninc verblijde hem ooc hoochlic ende loofde God, ende sprac voor die geheele gemeynte. Gelooft sijt ghy die HERE God Israhel onser vaders,

11

v behoort die grootheyt, glorie, der macht, victorie ende danc. Want allet dat in hemel ende in aerden is, is uwe, v is dat rijc, ende ghi sijt verhoget ouer al totten ouersten.

12

V is rijcdom ende eere voor v, ghi heerscapt ouer al, in uwer hant staet cracht ende macht, ende in uwer hant staet het elcken sterck ende groot te maken.

13

Nv onse God, wy dancken ende beroemen den naem uwer heylicheit, oft pronckerie,

14

⁺want wat ben ic? wat is mijn volc? dat wi souden vermoghen vriwillichlic cracht te gheuen, gelijc dit toe gaet? Want van v ist al gecomen ende van uwer hant hebben wi v dat gegeuen,

+ D vers 14

15

want wy sijn vreemdelingen ende gasten voor v, ghelijc onse vaders alle.

16

Ons leuen opter aerden is als een scaduwe, ende daer en is gheen vertoeuen, oft ophouden HERE onse God Al desen hoop die wi gescict hebben v een huys te timmeren, uwen heyligen name, dat is van uwer hant ghecomen, ende het is al uwe.

17

Ic weet mijn God, dat hi dat herte proeft, ende eenuuldicheit is v aengenaem. Daeromme hebbe ic dit al wt eenuuldiger herten vrywillich ghegeuen, ende hebbe nv met blijscappen gesien v volck dat hier voor handen is, dat het v vriwillichlic gegeuen heeft,

18

HEERE God onser vaderen, Abraham, Isaac ende Israel bewaert eewelijc sulck dichten ende ghedachten int herte ws volcx, ende voecht haer herten tot v.

19

⁺Ende mijnen sone Salomo, geeft een volcomen herte tot v, dat ic uwe geboden onderhoude, ende uwe getuygenisse ende seden, dat hijt al doe, ende tymmere dese wooninge, die ic geschict hebbe.

+ E vers 19

20

Ende Dauid sprac totter geheelder gemeynten, Louet den HERE uwen God, ende die geheele gemeynte loofde den HERE, den God haerder vaderen, ende neychden hen, ende aenbaden den HERE, ende den Coninck, ende offerden den HERE offer.

21

Ende des anderen morghens offerden si brantoffer, duysent varren, duysent rammen, duysent lammeren, met haren drancoffer, ⁺ ende offerden planteyt onder gheheel Israel,

+ ij.Re. ij:

22

⁺ende aten ende droncken inden seluen dage voor den HERE met grooter blijschappen, ende maecte Salomo den sone Dauid, anderwerf coninck, ende salfden hem den HERE tot eenen prince, ende Zadock tot eenen priester

+ F vers 22

23

Also sadt Salomo opten stoele des HEREN een Coninc in zijns vaders Dauids plaetse, ende wert geluckich, Ende geheel Israel was hem gehoorsaem,

24

ende alle ouerste ende machtige, ooc alle kinderen des conincx Dauids, deden hen onder den coninck Salomo.

25

Ende die HERE maecte Salomo altoos meerder voor gheheele Israhel, ende gaf hem een looflick conincrijc, dat gheene voor hem ouer Israel ghehadt en hadde.

26

⁺Soo is nv Dauid die sone Isai coninck gheweest ouer alle Israel. Ende die tijt dat hy coninc geweest is ouer Israhel, is .xl. iaer. Te Hebron regneerde hy seuen iaer, ende tot Hierusalem driendertich iaer.

+ G vers 26

27

Ende sterf in goeden ouderdom, vol leuens, rijcdoms ende eeren. Ende sijn soon Salomo werdt Coninc in sijn plaetse.

28

Dese gesciedenissen des conincx Dauid, beyde die eerst ende die laetste, siet, dye sijn ghescreuen on-der die ghesciedenissen van Samuel des Sienders, ende onder die gheschiedenisse des Propheten Nathan, ende onder die gheschiedenissen Gad des Sienders,

29

met allen sinen conincrijcken ende machticheden ende tijden die onder hem verghaen sijn, beyde ouer Israel, ende alle conincrijcken inden landen.

¶ Hier eyndet dat eerste boeck der Croniken.