Den Bybel met groter neersticheyt ghecorrigeert (Liesveltbijbel 1542)

Dauid bestrijdt sine omlinghende vyanden.

Dat .xix. Capittel

1

⁺NA desen sloech Dauid die Philisteen, ende verootmoedichdese, ende nam Gath, ende hare dochteren wt der Philisteen hant,

+ A vers 1

2

Ooc sloech hi die Moabiten, ⁺ also dat die Moabiten Dauiden onderdanich worden, ende ghiften brochten,

+ ij.re. viij

3

hy sloech ooc HadadEzer den coninc tot Zoba in Hemath, doe hi wt troc om sijn teeken op te rechten aent water Phrath,

4

ende Dauid wan hem duysent wagens af, seuen duysent ruyters, ende twintich dusent mannen te voete. Ende Dauid verleemde alle wagens ende hielt .C. wagens ouer

5

Ende die Siriers van Damasco quamen dien Hadad Ezer den Coninc Zoba te helpen Mer Dauid sloech dier seluer Siriers .xxij. duysent mannen.

6

Ende leyde volc tot Damascon in Sirien, dat die Siriers Dauiden onderdanich souden worden, ende hem gauen souden brenghen, Want die HERE halp Dauiden waer hi henen trock.

[p. *]

7

Ende Dauid nam die ghulden schilden, dye Hadad Ezers knechten hadden ende brachtse te Ierusalem.

8

Ooc nam Dauid wt den steden Hadad Ezers, Tibehath ende Chun zeer veel metaels. Waer af Salomo die metalen zee ende calomnen ende metalen vaten maecte.

9

⁺Ende doen Thogu die coninc tot Hamath hoorde dat Dauid alle die macht Hadad Ezers des conincx tot Zoba geslagen hadde, seynde hi sinen sone Ahadoran totten coninc Dauid ende dede hem groeten, ende segenen dat hi tegen HadadEzer ghestreden ende hem gheslagen hadde.

+ C vers 9

10

Want Togu hadde een oorloge tegen HadadEzer.

11

Ooc alle ghuldene, siluer, ende metalen vaten, heylichde die Coninck Dauid den HERE, met den siluere ende goude, dat hi den heydenen genomen hadde, te weten, den Edomiten, Moabiten, Ammoniten, Philisteen, ende Amalekiten,

12

ende Abisai dye sone Zeruia, sloech der Edomiten int sout dal, achtien dusent,

13

ende leyde volc in Edomea, dat alle Edomiten Dauiden onderdanich waren, Want dye HERE halp Dauiden werwaerts hi reysde.

14

Also regneerde Dauid ouer dat gheheele Israel ende onderhielt oordele ende gherechticheyt in alle sinen volck,

15

⁺Ioab die sone Zeruia was ouer dat heyr, Iosaphat dye sone Ahilud was Cancelier,

+ D vers 15

16

Zadock die sone Ahitob, ende AbiMelech, ende dye sone Abiathar waren priesters. Sawsa was scriuer,

17

Benaia die sone Ioiada was ouer die Chreti ende Plethi, ende die eerste sonen Dauid waren den coninc ter hant.