Den Bybel met groter neersticheyt ghecorrigeert (Liesveltbijbel 1542)

¶ Hoe dat die ouergebleuene geslachten geroepen worden, ende hoe dat si die Arcke wech voerden.

Dat .xiiij. Capittel.

1

⁺ENde Dauid hielt eenen raet metten hooftlieden, ouer duysent, ende ouer hondert, ende met allen vorsten, ende sprac totter gheheelder gemeynten Israhel,

+ A vers 1

2

Behaget v, ende ist vanden HERE onsen God, soe laet ons ouer al wt seynden tot onsen anderen broederen, in alle den lande Israel, ende met hen die priesters ende Leuiten in dye steden, daer si voorsteden hebben dat si tot ons vergadert worden,

3

ende laet ons die Arcke ons Gods, weder halen tot ons, want bi den tijden Saul en vraechden wi daer niet na.

4

Doe seyde die geheele gemeynte, men soude also doen, ⁺ want dat behaechde al den volcke wel. ⁺

+ B vers 4

+ ij.Regum vi.a

5

Also vergaderde Dauid dat ghehele Israel van Sihor Egipti, aen tot datmen coemt tot Hemath om die Arcke Gods te halen van KiriathIearim,

6

Ende Dauid troc op met geheel Israel tot KiriathIearim welcke in Iuda leget, op dat hi van daer op soude brengen die Arcke des HEREN die op Cherubim sidt, daer die name genoemt wert,

7

ende si lieten dye Arcke Gods op eenen nyeuwen wagen voeren wt den huyse Abinadab, Vsa ende sine broeders dreuen den wagen,

8

Maer Dauid ende alle Israel speelden voor God, wt geheelder macht, met liedekens, met harpen met psalteren, met tamborinen, ⁺ met cimbalen, ende met basuynen.

+ C vers 8

9

Doen si op die placke Chidon quamen, ⁺ stac Vsa sijn hant wt om die Arcke te houden, want die rinderen screden ter siden wt.

+ ij.re vi a

10

Doen vertoornde dye gramscap des HEREN ouer Vsa, ende sloech hem, om dat hi sine hant wt had gesteken aen die Arcke, alsoe dat hy aldaer sterf voor Godt,

11

doen wert Dauid ongemoet, om dat die HERE een volck gescoort had aen Vsa. Ende hiet die plaetse PerezVsa, ⁺ tot op desen dach toe.

+ ij re. vi.b

12

Ende Dauid vreesde God in dyen dage ende sprack Hoe sal ic die Arcke Gods tot my gebrengen?

13

Daeromme en liet hi die Arcke Gods nyet tot hem brengen in die stadt Dauid, mer hi keerdese int huys ObedEdom des Gathiters,

14

Also bleef die Arcke Gods bi Obedt-Edom, in sinen huyse drie maenden Ende die HEERE segende dat huys ObedEdom, ende allet wat hi hadde

[afbeelding]