Den Bybel met groter neersticheyt ghecorrigeert (Liesveltbijbel 1542)

Nathan wort vanden HERE tot Dauid gesonden, hem om sijnder misdaets wille te straffen, Dauid bekent sijn sonde, ende begeert genade, die soon die hi bi haer hadde sterf.

Dat .xij. Capittel.

1

⁺ENde die HERE seinde Nathan tot Dauid, Doen hi tot hem quam sprack hy tot hem, Daer waren twee mannen in een stadt, deen rijck dander arm.

+ A vers 1

2

Dye rijcke had seer veel scapen ende runderen

[p. *]

3

mer die arme en hadde maer een cleyn scaepken dat hi gecocht had, ende hi voedet op tot het groot wert bi hem ende bi sinen kinderen tsamen. Het adt van sinen bete ende dranc van sinen beker, ende sliep in sinen schoot, ende hi hielt als een dochter.

4

Als den rijcken man een gast ouer quam, soo spaerde hi te nemen van sinen schapen ende runderen, dat hi den gast wat bereyde, die tot hem ghecomen was, ende nam tschaep des armen mans, ende bereydet den man, die tot hem comen was.

5

Doen verbolch hem Dauid met groter toornicheyt tegen dien man, ende sprac tot Nathan. ⁺ So waerachtelic als die HERE leeft, die man is een kint des doots, die dat gedaen heeft,

+ B vers 5

6

daer toe sal hi dat scaep vieruoudelic betalen, om dat hi dat gedaen heeft, ende niet gespaert en heeft,

7

Doen sprac Nathan tot Dauid, ghi sijt de man, Dus spreect de HERE die God Israel, Ic heb v tot eenen coninc gesalft ouer Israel ende verlost wt der hant Saul,

8

ende heb v ws heren huys gegeuen, daer toe sinen wijuen in uwen scoot, ende heb v dat huys Israel ende Iuda gegeuen. Ende is dit te luttele, so sal ic noch dit ende dat daer toe doen,

9

Waerom hebdy dan dat woort des HEREN veracht, dat ghi sulc quaet voor sinen ooghen dedes? Vriam den Hethiter hebt ghi verslagen metten sweerde, sijn wijf hebdy v tot eenen wiue genomen, mer hem hebdi gedoot metten sweerde der kinderen Ammon.

10

⁺Nv en sal dat sweert van uwen huyse inder eewicheyt niet gaen om dat ghi mi veracht hebt, ende dat wijf Vrias des Hethiters genomen hebt, dat si v wijf soude sijn.

+ C vers 10

11

Dus spreect die HERE, siet ic wil ongeluc ouer v verwecken, wt uwen eygenen huyse ende uwen wijuen nemen voor uwen oogen, ende wilse uwen naesten geuen, also dat hi bi uwen wiuen slapen sal, bider lichter sonnen,

12

want ghi hebbet heymelic gedaen, mer ic wil dit doen voor geheel Israel, ende bider sonnen

Doen sprac Dauid tot Nathan.

13

Ic heb gesondicht tegen den HERE, ⁺ Nathan sprac tot Dauid, so heuet die HERE v sonde ooc wech genomen, ghy en sult niet steruen.

+ D vers 13

14

Mer want ghi die vyanden des HEREN door dese gesciedenisse hebt doen lasteren, so sal die sone die v geboren is den doot steruen

15

Ende Nathan ginc thuys, Maer dye HEERE sloech dat kint dat Vrias wijf Dauiden gebaert had, also dattet doot siec wert,

16

Ende Dauid versocht God, om dat knechtken, ende vaste ende ginc in ende lach snachs opter aerden,

17

Doe stonden die ouders sijns huys op, ende wouden hem oprechten vander aerden, ⁺ maer hi en woude niet, ende en adt ooc niet met hen.

Opten seuensten dach sterf dat kint.

+ E vers 17

18

Ende die knechten Dauid, vreesden hen dat te vercondigen dat het kint doot ware, Want si dachten, siet, doen dat kint noch leuende was spraken wy met hem, ende hy en hoorde onse stemme niet. Hoe veel te meer sal hi hem mismaken, ist dat wi hem seggen, dat kint is doodt

19

Ende Dauid sach dat sine knechten heimelic spraken, ende hi mercte dat dat kint doot was, ende sprac tot sinen knechten, Is dat kint doot? Si seyden Ia,

20

Doen stont Dauid op vander aerden ende wiesch hem, ende salfde hem, ende dede ander cleederen aen, ende ginc in dat huys des HEREN, ende aenbadt, ende doe hi weder thuys quam hiet hi hem broot op brengen, ende hi hadt.

21

Doen spraken sine knechten tot hem, Wat dinck is dat, dat ghi dat doet, doen dat kint noch leefde, vaste ghi ende weendet, maer nv het doot is, staet ghi op ende etet?

22

Hi sprac. Om dat kint vaste ic ende weende doen het leefde? want ic dacht, wie weet of mi de HERE genadich worde, dat dat kint leuende bleef,

23

mer nv het doot is, wat soude ic vasten, can ict ooc wederom gehalen Ic sal wel tot hem varen, mer het en sal niet wederom tot mi comen,

24

Ende doe Dauid zijn wijf BathSeba getroost had, ginc hi tot haer in, ende sliep bi haer, ende si baerde eenen soon dien hiet hi Salomo, ende die HERE beminde hem,

25

ende hi dede hem onder die hant Nathan des propheten, die hiet hem IedidIa om des HEEREN wille.

26

⁺Dus street nv Ioab teghen Rabba, der kinderen Ammon, ende wan die coninclicke stadt, ⁺

+ G vers 26

+ i.pa iij.d

27

ende seynde boden tot Dauid, ende liet hem seggen, Ic heb gestreden tegen Rabba, ende heb ooc gewonnen die water stat,

28

dus neemt nv te hoope dat ouer gebleuen volc, ende belegert die stadt, ende wintse, op dat icse niet en winne, ende ick den name daer af hebbe.

29

Aldus nam Dauid allet volc te hoope, ende troc wech, ende street tegen Rabba, ende wontse,

30

ende nam de crone haers conincx van sinen hoofde die in gewichte een pont gouts hadde, ende edele gesteenten, ende wert Dauiden op sijn hooft geset, ende voerde seer veel roofs wt der stat,

31

mer dat volc daer in leyde hi wt, ende leydese onder yseren sagen ende haken, ende yseren beytels, ende verbandese in tichgel ouens, So dede hi den lieden der kinderen Ammon, doen keerde Dauid ende allet volc weder te Ierusalem.